Выбрать язык
Книги Ветхого Завета
Книги Нового Завета
с русским текстом1 Господь Моисейым ӱжын да Юмо дене вашлийме омаш гыч тудлан каласен:
2 «Израиль калыклан увертаре: тендан кокла гыч иктаж-кӧ Господьлан вольык надырым пуынеже гын, шолдыра вольыкымат, тыгыде вольыкымат конден кертеш.
3 Йӱлалтен пуымо надырлан тудо шолдыра вольыкым кондынеже гын, тек экшыкдыме*а ӱшкыжым налеш. Господьлан йӧрышӧ лийже манын, тек тудым Юмо дене вашлийме омашыш пурымо вер дек вӱден толеш4 да йӱлалтен пуышаш вольыкын вуйышкыжо шке кидшым пышта. Тыге тиде еҥын надырже Господьлан келшыше лиеш, да сулыкшо касаралтеш.5 Вара Господь ончылно ӱшкыжым тек шӱшкылеш, а Ааронын иерей*б эргыж-влак ӱшкыж вӱрым налыт да тудым Юмо дене вашлийме омашыш пурымаште улшо жертвенник ӱмбак чыла велым шыжыктат.6 Тидын деч вара тек тудо йӱлалтен пуымо надыр вольыкым ньыктеш да капшым ужашын руа.7 А Ааронын иерей эргыж-влак жертвенникыш тулым кондат да тушко пум пыштат.8 Йӱлышӧ пу ӱмбаке нуно тек руымо ужаш-влакым, тыгак вольык вуйым, коям шарен оптат.9 Тек надырым кондышо еҥ вольыкын кӧргарвержым, йолжым вӱд дене мушкеш, да иерей чыла тидым жертвенникеш йӱлалтен тӱргыкта. Тиде Господьлан келшыше тамлыпушан йӱлалтен пуымо надыр лиеш.
10 [Господьлан] йӱлалтен пуымо надырже тыгыде вольык – шорык але каза – гын, тек экшыкдыме тагам але казатагам конда, [тудын вуйышкыжо кидшым пышта]11 да Господь ончылно жертвенникын йӱдвел могырешыже шӱшкылеш, а Ааронын иерей эргыж-влак вольык вӱрым жертвенник ӱмбак чыла велым шыжыктат.12 Тек шӱшкылмӧ вольыкым ужашын руат, вуй ден кояжым ойырат, да иерей нуным жертвенникыште йӱлышӧ пу ӱмбалан шарен пышта.13 Тек тудо кӧргарвер ден йолым вӱд дене мушкеш. Тек чыла тидым иерей, жертвенникеш йӱлалтен тӱргыктен, надырлан конда. Тиде Господьлан келшыше тамлыпушан йӱлалтен пуымо надыр лиеш.
14 Господьлан йӱлалтен пуымо надыр шотеш тудо кайыкым конда гын, тек тиде кеде*в але самырык кӧгӧрчен лиеш.15 Тек иерей кайыкым жертвенник деке намия, вуйжым пӱтыралеш да жертвенникеш йӱлалтен тӱргыкта, а вӱржым жертвенник пырдыж деке йоктара.16 Вара кайыкын пагаржым, пыстылжым ойыра да жертвенник деч эрвел могырыш, ломыж улмо верыш, кудалта.17 Тек тидын деч вара кайыкын шулдыржым куча да капшым тодылеш, но мучаш марте ок ойыро, да кайыкым жертвенникыште йӱлышӧ пу ӱмбалан йӱлалтен тӱргыкта. Тиде Господьлан келшыше тамлыпушан йӱлалтен пуымо надыр лиеш.
*а 1:3 Экшыкдыме – без изъяна.
*б 1:5 Иерей – священник.
*в 1:14 Кеде – горлица.
Глава 1