Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен: «Тый фараон деке кае да тудлан каласе: ”Господь тыге ойла: Мыйын калыкем Мыланем кумалаш колто.2 Тый колташ от келше гын, Мый уло элетым ужава дене темем.3 Эҥер ужава дене шолаш тӱҥалеш. Нуно, эҥер гыч лектын, тыйын пӧртышкет, малыме пӧлемышкет, вакшышкет пурат, тыйын тарзет-влак ден калыкетын пӧртышкышт, тыйын коҥгашкет, руашвочкышкет пурат.4 Ужава-влак тыйын ӱмбакет, тыгак калыкет ден чыла тарзетын ӱмбакышт кӱзат”».5 Господь Моисейлан каласен: «Тый Аарон [изатлан] каласе: тек тудо пондым кучымо кидшым эҥер, йогын, пӱя-влак могырыш шуялта да ужава-шамычым Египет мландышке луктеш».6 Аарон кидшым пӱтынь Египетысе вӱд могырыш шуялтен [да ужава-влакым луктын]. Ужава-влак вӱд гыч лектыныт да Египет мландым теменыт.7 [Египетысе] юзо-влакат шке ю вийышт дене тыгак ыштеныт да Египет мландышке ужава-шамычым луктыныт.
8 Фараон шкеж деке Моисей ден Аароным ӱжын да каласен: «Господьлан [мылам верч] кумалза, тек Тудо мый дечем да калыкем деч ужава-влакым кораҥда. А мый Израиль калыкым Господьлан надырым кондаш колтем».9 Моисей фараонлан каласен: «Ужава-влак тый дечет, [калыкет деч,] пӧртлат гыч кайышт да эҥерыште гына кодышт манын, тылат верч, тарзет-влак да калыкет верч кунам кумалман, тый шке каласе».10 Фараон «эрла» манын. Моисей вашештен: «Каласымет семынак лийже. Тый пален налат: мемнан Господь Юмына гай нигӧат уке.11 А ужава-влак тый дечет, пӧртлат гыч, [пасулат гыч,] тарзет-влак деч, калыкет деч каят да эҥерыште гына кодыт».
12 Моисей ден Аарон фараон деч лектыныт. Фараон ӱмбаке колтымо ужава-влакым кораҥдыже манын, Моисей Господьлан кумалын.13 Господь Моисейын йодмыж почеш ыштен. Ужава-влак пӧртлаште, кудывечылаште да пасулаште колен пытеныт.14 Нуным ора дене чумыреныт, да виля ӱпш уло мландым темен.15 Фараон орлык эртымым ужын, но ӱскыртланымыжым чарнен огыл. Господьын ойлымыж семынак, тудо Моисей ден Аароным колыштын огыл.
16 Господь Моисейлан каласен: «Тый Ааронлан кӱштӧ, тек тудо пондыжым шуялта да мланде пуракым пера, [тунам айдеме, вольык, фараон ӱмбаке, тыгак тудын пӧртшӧ да тарзыж-влак ӱмбаке ӱвыра-влак толын темыт, чыла] мланде пурак пӱтынь Египет мландыште ӱвыраш савырна».17 Нунышт тыгак ыштеныт: Аарон кидшым шуялтен да пондыж дене мланде пуракым перен. Тунамак айдеме ден вольык ӱмбаке ӱвыра-влак толын темыныт. Мланде пурак пӱтынь Египет мландыште ӱвыраш савырнен.18 Юзо-влакат ю вийышт дене ӱвырам ышташ тӧченыт, но кертын огытыл. Ӱвыра-влак айдеме ден вольык ӱмбалне лийыныт.19 Юзо-влак фараонлан каласеныт: «Тиде Юмын кидше». Но фараонын шӱмжӧ вустыкак кодын, Господьын ойлымыж семынак, тудо нуным колыштын огыл.
20 Господь Моисейлан каласен: «Эрла эр кынел да фараон деке кае. Эҥер деке кайымыж годым тудлан каласе: ”Господь тыге ойла: Мыйын калыкем [ир мландыш] Мыланем кумалаш колто.21 Калыкем от колто гын, Мый тый декет, тыйын тарзет-влак, калыкет дек, пӧртлашкет пормо-влакым колтем – египет еҥ-влакын пӧртышт да нунын илыме уло мландышт пормо дене темыт.22 А Мыйын калыкемын илыме Гесем мландым Мый арален кодем, тушто пормо огеш лий. Тый палаш тӱҥалат: Мый пӱтынь мланде дене озаланыше Господь [Юмо] улам.23 Мый шкемын калыкем да тыйын калыкет коклаште ойыртемым ыштем. Тиде палдарыше пале [мландымбалне] эрла ончыктымо лиеш”».
24 Господь тыгак ыштен. Пеш шуко пормо фараонын пӧртышкыжӧ, тарзыж-влакын пӧртышкышт да пӱтынь Египет мландышке чоҥештен толын. Пормо-влак мландыште илыше-влаклан кугу орлыкым конденыт.25 Фараон Моисей ден Аароным ӱжын да каласен: «Кайыза да шке [Господь] Юмыланда тыштак, тиде мландыштак, надырым кондыза».
26 Но Моисей вашештен: «Тыге ышташ огеш лий, вет мемнан Господь Юмыланна надыр кондымашна египет калыклан йырнык лиеш. Ме египтян-влак ончылно нунын йырныклан шотлымо надырым кондаш тӱҥалына гын, нуно мемнам кӱм кышкен пуштыт!27 Ме ир мландышке, кум кечаш корнышко каена да Господьлан, шкенан Юмыланна, Тудын кӱштымыж семынак, надырым кондена».28 Фараон каласен: «Мый тендам Господьлан, шкендан Юмыланда, надырым кондаш ир мландыш колтем, пеш торашке гына ида кае. [Господьлан] мылам верчынат кумалза».29 Моисей каласен: «Теве мый тый дечет лектам да Господь [Юмылан] кумалам. Пормо-влак тый дечет, тыйын тарзет-влак ден калыкет деч эрлак каен пытат. А тый тетла ондалкалыметым чарне, калыклан каяш да надырым кондаш чаракым ит ыште».30 Моисей фараон деч лектын да Господьлан кумалын.31 Господь Моисейын йодмыж семынак ыштен: фараон, тудын тарзыже-влак да калыкше деч пормо-влакым кораҥден. Ик пормат кодын огыл.32 Но тиде ганат фараонын шӱм-чонжо ӱскырт кодын: тудо калыкым колтен огыл.
Глава 8