Выбрать язык
Книги Ветхого Завета
Книги Нового Завета
с русским текстом1 Сāт ōвыл хōталэ̄т āлпыл, иӈ турманыг ōлмēт, Магдалина Мария āхвтас кэраскурсип палт ёхтыс, сӯнсы, курсип āвиныл яныг āхвтас пōхан-лаквтыма.2 Таи кāсаламēт, ос Симон Пēтыр ос Ӣсусын э̄руптым ханисьтахтын хум палт ёхтыгпас, ос тэ̄натэ̄н лāви: ”Кӯсяй курсипēныл хотталь тотыма ос ат вāглӯв, хоталь Таве пинсаныл”.3 Пēтыр ос мōт ханисьтахтын хумитэ тāра кон-квāлапасы̄г, ос курсип палт минасы̄г.4 Тэ̄н аквъёт аквторыг хāйталтасы̄г; ос ханисьтахтын мōт хумитэ Пēтырныл моляхнувēг хāйтыс, ос тав сāртын курсип палт ёхтыс.5 Ё̄л-хӯтмēт тӯп Тав пēрыгтāлым тōранэ хуйнэ̄ныл кāсаласанэ; курсип кӣвырн ат-ся̄лтыс.6 Тав юи-пāлэ̄т Симон Пēтыр ёхтыс, ос курсип кивырн ся̄лтыс, туп пēрыгтāлым тōрыт хуйнэ̄ныл кāсаласанэ.7 Ос пуӈк тōре кāсалас, пēрыгтāлым тōрытныл янас пиным ōлыс, пуӈк тōре тув-манигтым ōлыс.8 Āхвтас курсип пōхан сāртын ёхтум ханисьтахтын мōт хум ōс тув-ся̄лтыс, тав ōс кāсаластэ ос та агтыс.9 Тэ̄н иӈ ат вāстэ̄н, ань Тōрум нэ̄пакыт тай хансым ōлыс: Тавēн сорумныл тах нōх-ялтуӈкве э̄рыс.10 Ань ханисьтахтын хумиӣг ōс ювле-минасы̄г.
11 Мария курсип коны-пāлт лю̄ляхōлыс ос лю̄ньсис. Лю̄ньсиматэ, сопамн ёл-хӯтыс.12 Я̄ӈк маснутыӈ кит ангелы̄г кāсаласаге: Ӣсус хуям мāт, акватэ пуӈке торыг ӯнлыс, мōтанэ лāглаге торыг ӯнлыс.13 Тэ̄н тавēн лāвēг: ”Нэ̄ хōтпа! Манры̄г лю̄ньсēгын?” Тав ювле-лāвыс: ”Ам Кӯсяюм хотталь тотыма, ос ат вāглум, Тав хоталь пинвēс”.14 Тох лāвмēт, ювле-аӈкватас, ос Ӣсус лю̄льнэ̄тэ кāсаластэ; ос Тав Ӣсусыг ōлнэтэ ат-хāньсистэ.15 Ӣсус тавēн лāвыс: ”Нэ̄ хōтпа! Наӈ манры̄г лю̄ньсēгын? Хотъют кинсэ̄гын?” Мария номсыс, тый садовникыг рупитан хōтпа, Тавēн лāвыс: ”Кӯсяй! Наӈ Таве кон ке тоты̄слын, лāвēн, хоталь Таве пины̄слын, ам Таве ювле-вы̄глум”.16 Ӣсус тавēн лāвыс: ”Мария!” Мария Тав нупылэ ёӈхыгпас ос Тавēн ля̄галас: ”Раввуни!” – тай толмасьлан лāтӈе: Ханисьтан хум!17 Ӣсус тавēн лāвыс: ”Ам палтум ул-карсмахтэн, Ам Āсюм палт иӈыт ёхтэ̄гум; Наӈ Ам апсиянум палт минэн ос тāнанылн лāвен: Āсюм палт ос нāн Āсин палт Ам нōх ты лаплахтэ̄гум, Тōрмум палт ос нāн Тōрмын палт Ам нōх ты лаплахтэ̄гум”.18 Мария Магдалина ханисьтахтын хумит палт минас ос Кӯсяй кāсалалме ос Тав мāныр тавēн лāвыглас, пуссын ханисьтахтын хумиянэ̄н потыртасанэ.
19 Ос э̄типалāг, сāт ōвыл хōталэ̄т Тав ханисьтахтын хумиянэ еврей мāхумныл пилым, āвияныл лап-товарттым атхатыглахтын коланылт ӯнлыманылт, Ӣсус тув-ёхтыс. Тав колкан котильн лю̄лис ос лāвыс: ”Ротты̄г ōлэ̄н!”20 Ты лāтӈанэ юи-пāлт Тав Такви кāтагэ, лāглаге ос оӈтыллуванэ тāнанылн сунсылтасанэ. Кӯсяяныл кāсаламаныл порат ханисьтахтын хумиянэ хот-ся̄гтсыт.
21 Ӣсус китынтыг тāнанылн лāвыс: ”Ротты̄г ōлэ̄н! Хумус Ам Āсюмн кēтвēсум, Ам ос нāнан аквтох ты кēтыя̄нум”.22 Ты лāтӈыт лāвмēт, пувласас ōс лāвыс: ”Ялпыӈ Лы̄лы вӯелы̄н.23 Хотъютыт кāреканыл мāгыс кāнтлын вāрмалин пōйилттыянын, таит кāреканэныл ёрувлахтэ̄гыт тах; хотъютыт палт хӯльтуптыяны̄н, таит палт ос хӯльтэ̄гыт тах”.24 Ӣсус ёхталам порат китхуйплов хōтпаныл ōлум аквныл Юртыӈ пы̄грисиг лāвнэ Фома тыт āтим олыс.25 Мōт ханисьтахтын хумит тавēн лāвсыт: ”Мāн Кӯсяю̄в вāслув”. Ос тав тāнаны̄лн лāвыс: ”Тав кāтагēт кēрсоль ёрныл хультум асыг ам ат ке кāсалыягум, тулё̄влум та асы̄гын ат ке пиныглы̄лум, ос пōхатэ нюлми кāтыл ат пиныглы̄лум, сяр ат агтэ̄гум”.26 Нёлолов хōтал юи-пāлт Тав ханисьтахтын хумиянэ ос та колт ōлсыт, Фома ос тāн ётаныл ōлыс. Āвит лап-лякантым ōлме порат Ӣсус тыг ёхтыс, тāн халанылн лю̄лис ос лāвыс: ”Роттыг ōлэ̄н!”27 Тувыл Фома нупыл лāвыс: ”Тулё̄влын тыг маēлын ос Ам кāтагум сунсэ̄гын; кāтын тыг-маēлын ос Ам мāглӯмн пинэ̄лын; ос ат агтнэ хōтпаг ул ōлэ̄н, āгтнэ хōтпаг ōлэ̄н”.28 Фома Тавēн ювле-лāвыс: ”Ам Кӯсяюм, ам Тōрмум!”29 Ӣсус тавēн лāви: ”Наӈ Āнум кāсаламын мāгыс агтсын; Āнум кāсалаттāл агтнэ хōтпа, тав яныг сōтыӈы̄г ōлы”.30 Ос ты коны-пāл Ӣсус ханисьтахтын хумиянэ э̄лы-пāлт сāв ōлыглаттāл вāрмалит вāрыглāлыс, хансым ты нэ̄пакын тāн ат ōлэ̄гыт.31 Тыи ос таимāгыс хансым ōлы, нāн вос агтэгы̄н Ӣсус Тав ты Кристос, Тōрум Пы̄г. Нāн ōлупсан Тав Намēн агтым вос мины.
Глава 20