Выбрать язык
Книги Ветхого Завета
Книги Нового Завета
с русским текстом1 Тōнт Пилат Ӣсус вистэ ос Таве рāтуӈкве лāвыстэ.2 Тōнт хōнт хумит пēлялахтын пумныл пуӈк лāкв сагсыт, та лāкв Тав пуӈкēн пинсāныл, ос вы̄гыр маснутыл мастысāныл,3 ос рōхсыт: ”Еврей Хōн, торген ся̄гтэн!” ос Таве вӣльтэ̄т та рāтсāныл.4 Пилат ōс кон-квāлыс ос тāнанылн лāвыс: ”Ам ань Таве нāн палтын кон ты тоты̄лум, нāн вос вāглы̄н, ам Тав палтэ ōвылн патнэ нэ̄матыр вāрмаль ат-хōнтсум”.5 Тōнт Ӣсус пуӈке пум лāквыл пиным ос багрянцыл пēрим кон ты квāлыс. Ос Пилат тāнаны̄лн тох ты лāвыс: ”Тыт-ты Э̄лумхōлас!”6 Ос Тав пӯп-ōйкатын ос лусытан мāхмытн кāсалыматэ̄т, тāн рōӈхалтāхтасыт: ”Таве пēрна тармыл порслэ̄лы̄н!” Пилат тāнанылн лāвыглас: ”Нāн Таве вуелы̄н, ос нāнки Таве пēрна тармыл порслэ̄лы̄н, ам Тав палтэ ōвылн патнэ нэ̄матыр вāрмаль ат хōнтсум”.7 Еврейт тавēн ювле-лāвыглāлсыт: ”Мāн сāккон ōньсēв. Тавēн мāн сāкконув хосыт сорумн патуӈкве э̄ри, Тав таквинатэ Тōрум Пы̄гы̄г лāвылтытэ”.8 Пилат тамле лāтыӈ хӯлмет, усьпылнэ̄г хот-рохтыс.9 Ос яныг колэ̄н юв-ся̄лтыс ос Ӣсусын лāвыс: ”Наӈ хотыл ōлэ̄гын?” Ос Ӣсус ювле нэ̄матыр ат лāвыс.10 Пилат Тавēн лāви: ”Наӈ ман ам ётум потыртаӈкве ат таӈхēгын? Наӈ ман ат вāглын ам ё̄р ōньсēгум: наӈын вēрмилум пēрна йӣвн рāтуӈкве, вēрмилум лыпась тāратаӈкве”.11 Ӣсус лāвыглас: ”Нумыл тамле ё̄рыл маим ат ке ōлсын, наӈ нэ̄матыр ё̄р ат ōсьнувын; таимāгыс Āнум наӈын хӯлтум хōтпан сāвыӈ пāл кāреке тавēн паты”.12 Та юи-пāлт Пилат Таве лыпась тāратаӈкве таӈхыстэ кос. Та сыс тай еврейт рōхсыт: ”Наӈ Таве тāратылын ке, тōнт наӈ кесарӣн румаг ат ōлэ̄гын тах; таквинатэ хōныг лōвинтан кāсыӈ хōтпа, кесарюв ёт каснэ хумы̄г ōлы”.13 Пилат тамле лāтыӈ хӯлмэ̄т Ӣсус кональ квāлттыстэ, такви Лифостротон (еврейт лāтыӈ сирыл – Гаввафа) нампа мир сутытан уласн ӯнтыс.14 Тōнт Пасха э̄лы-пāл сāт атыт хōталэ хōтыт сё̄сы̄г ōлыс. Ос Пилат еврей мāхумн тох ты лāвыс: ”Тыи нāн Хōны̄н!”15 Тāн тай роӈхувласыт: ”Вуēлын, вуēлын, Таве пēрна палт рāтэ̄лы̄н!” Пилат тāнанылн лāви: ”Нāн Хōнын ман ам рāты̄лум?” Пӯп-ōйкат ювле-лāвыглāсыт: ”Мāн кēсарь коны-пāл воссыг нэ̄мхоты хōн ат ōньсēв”.
16 Юи-ōвылт тав Таве тāнанылн пēрнан рāтнэ мāгыс та мистэ. Ос Ӣсус пӯвсаныл ос та вāнттысаныл.17 Ос такви пēрнатэ алмтым, Тав пуӈк хопалы нампа мāн (еврей лāтыӈ сирыл Голгофа) та ёхтыс;18 Тот йив пēрна палт кēрсолил Тав кāтанэ-лāгланэ тув та рāтвēсыт, Тав китпāлэн ос кит хōтпа пēрна палт рāтвēсыг; Тав – кōтильт ōлыс.19 Пилат тамле лāтӈыт хāнсуӈкве лāвыс: ”Ӣсус Назарет ӯсныл – еврей хōнаныл”. Та хансым пāрт пēрна палт тув-рāтыстэ.20 Ты хансым лāтӈыт сāв еврей мирн лōвиньтавēсыт, Ӣсус пēрнан рāтым саватым мāтэ ӯс похат ōлыс, та лāтӈыт еврейт, грекыт, рим мāхум лāтӈанылт хансым ōлсыт.21 Еврей пӯп-ōйкат Пилатын лāвсыт: ”‘Еврей Хōн’ ул-хāнсэн, наӈ тох хансэн: ‘Тав лāвыглас: Ам еврей Хōн’”.22 Пилат лāвыглас: ”Мāныр ам хāссум, та хāссум”.23 Хōнт хумит Ӣсус пēрнан рāтыматэ юи-пāлт, Тав маснутанэ висаныл ос нилаг уртсаныл, кāсыӈ хōнт хум акв лōмтыл патвес, алпихар маснутэ ю̄нтым ат ōлыс, тав янытэ̄т сāгим маснуты̄г ōлыс.24 Ос тāнки халанылт лāвсыт: ”Таве маныгтаӈкве ат патылув, учалахтын мāгыс матыр вуськасалэ̄в, хотъютувн тав паты”. Тōнт ань Ялпыӈ нэ̄пакыт хансым сирыл та емтыс: ”Ам маснутанум тāнки халанылт уртсаныл, акв маснутум мāгыс учалахтым матыр пāхтысыт”. Тох ань хōнт хумит та вāрыгласыт.
25 Исус пēрна похат Тав Ся̄не ос Тав Ся̄нэ увситэ ос Клеопова Мария, ос Мария Магдалина нампа нэ̄, тāн ты тот лю̄льсыт.26 Ӣсус Ся̄не ос Такви э̄руптам ханисьтахтын хумитэ кāсаласаге, Такви Ся̄нēн лāвыс: ”Нэ̄ хōтпа, Наӈ пы̄гын тыттыя!”27 Тувыл ханисьтахтын хумитэ̄н лāвыс: ”Тыттыя, наӈ Ся̄нин!” Ос ты пасыл Ӣсус ханисьтахтын хумитэ̄н ся̄нэ такви палттылэ ōлуӈкве вуйвес.
28 Та юи-пāлт Ӣсус, ты нак тōвлуптыматэ урыл вāстэ ос Ялпыӈ нэ̄пакыт хансым нак вос ēмты, Тав лāвыс: ”Нēлмум тув-тōсыс”.29 Тыт ляпат тāглыӈ уксус āны ӯнлыс. Хōнт хумит иссоп нампа пулп уксусыл тытылтасаныл ос Тав сӯпēн йив товыл āлмысаныл.30 Ӣсус уксус айме юи-пāлт ля̄галас: ”Та тōвлуптахтас!” Ос пуӈке хӯтылтым лы̄лытэ та оигпас.
31 Тōнт ань сāт атыт хōталэ ōлыс, пēрнан рāтым утын пēрна тармыл хӯлюӈкве ат рōвыс, холытан сабат хōтал ōлыс, – еврейт яныг ялпыӈ хōтал. Таимāгыс тāн Пилатныл вōвхатсыт, тав порслым утыт кēрсолил пēрна тармыл рāтым лāглсораныл хот-сакватаӈкве, ос пēрнатныл ёл-виӈкве вос тāратыя̄нэ.32 Ос ань хōнт хумит ёхтысыт, Тав ётэ пēрнан рāтыглым акв хум лāглсораге сакватавесы̄г, тувыл ос мōтанэ лāглсораге сакватавесы̄г.33 Ос ань Ӣсус пōхан ёхтуманылт, кāсаласāныл, Тав нāсати сорумн патум, таимāгыс Тав лāглсораге ат сакватасаныл.34 Ос акв хōнт хум Тав мāгылъя̄тэ ōвтал пувтмыстэ, ань кēлпе-витэ тāра та сōсхатасыт.35 Ос та нак вāсинтам хум та урыл ты хансыс, сяр мāк тав ты хансыс. Тав нак хумус ōлыс сяр мāк вāгтэ, нāн агтнэ̄н мāгыс тох ты хансыс.36 Ос тамле нак сōль та ōлыглас, Тōрум ялпыӈ нэ̄пакт хансым сирыл вос ēмты: ”Тав лувесāме ат сакватаве тах”.37 Ос Тōрум ялпыӈ нэ̄пакыт мōт мāт хансым ōлы: ”Овтал тӯсьтӯм Утаныл нупыл пуссын сунсэ̄гыт тах”.
38 Ты вāрмалит юй-пāлыт Аримапея мāныл ōлум Иосиф – Ӣсус тав ханисьтахтын хумите, – еврей мāхумныл пӣлым, сытамыг Пилатныл вōвхатас, Ӣсус алпитэ пēрнаныл хот-виӈкве вос тāратытэ. Пилатын тāратавес. Тав минас ос Ӣсус алпитэ кēрсолил рāтыглым пēрна йивныл хот-оглатастэ.39 Ты накыт э̄лы-пāлт Ӣсус палт потрамаӈкве э̄ти ёхталам хум Никодим ос ёхтыс, – тав смирна ōс алоэ нампа лӯптатныл тэ̄лыгтым яныгсāт литракем тэ̄рпи вӣт тотыс.40 Тāн ань сорумн патум Ӣсус висаныл, алпи-харе тэ̄рпи вӣтыл сартым тōрыл лап-пēрсаласаныл. Юдея мāт тох ты э̄рыс сорумн патум ут ёл-сёпитаӈкве.41 Тав пēрнан рāтыглыматэ мāт сāд ōлыс, та сāдыт āхвтас йильпи курсип ōлыс. Та курсипн нэ̄мхотпа иӈ ат сёпиталвес.42 Еврей мāхум сāт атыт хōталэ мāгыс ос āхвтас сопаме ляпат ōлме мāгыс Ӣсус тув та пинвес.
Глава 19