Выбрать язык
Книги Ветхого Завета
Книги Нового Завета
с русским текстом1 Ты лāтӈанэ юи-пāлт Ӣсус тōрум нупыл нōӈхаль āӈкватас ос лāвыс: ”Āся̄! Сё̄сум та ёхтыс, Наӈти Пы̄гын янытлэ̄лын, Наӈ ос Наӈти Пы̄гы̄н тах янытлāвен.2 Наӈ Таве пуссын мāхум тармыл влāстил мислын. Наӈ Тавēн мим мāхманын Тав акваг э̄лаль ōлнэ ōлупсал миӈкве вос вēрмыслын.3 Ты ань акваг э̄лаль ōлнэ ōлупса: тāн Наӈын вос вāгāныл, Наӈ наӈтен ōлнэ Мāк Тōрум ты, ос Наӈ кēтум Ӣсус Кристос вос вāганыл.4 Ам Наӈын ты мāт янытласлум, Наӈ Āнумн лāвум вāрмалин Ам вāрыслум.5 Ос ань Наӈ Āнум янытлэ̄лын, Āся̄. Тасир янытлэ̄лын, хумус Наӈ Āнум хосат ты тōрум-мā ӯнттум э̄лы-пāлт янытлāслын.6 Наӈ Āнумн мим э̄лумхōласытын Ам Наӈ намын хӯлтыслум, тāн Наӈ мāхманын ōлсыт, ос Наӈ тāнаныл Āнумн мисанын, ос тāн Наӈ лāтӈын ӯргаласаныл.7 Ань тāн усьта торгамтасаныл, мāныр ōлы, пуссын Наӈ Āнумн мисāнын.8 Таимāгыс Наӈ Āнумн мим лāтӈанын Ам тāнаны̄лн мисанум, тāн та лāтӈыт висāныл, ос вēськаты̄г торгамтасаныл, Ам Наӈынныл ōлэ̄гум, ос тāн агтсыт, Наӈ Āнум ты кēтыслын.9 Ам тāн мāгсыланыл Наӈын пōйксēгум: ты мир янытэ мāгыс ат пōйксēгум, Наӈ Āнумн мим хōтпанын – та Наӈ утанын мāгыс пōйкилум.10 Ос пуссын, мāныр Ам ōньсēгум, тай Наӈ утанын, ос Наӈ ōсьнэ утанын тай Ам утанум; ос Ам тāн хосытанылт янытлавēсум.11 Ам ань мир халт āтимум, тāн мир халт хультсыт, ос Ам Наӈ палтын минэ̄гум. Ялпыӈ Āсюм! Тāнаныл – ургалэ̄н, Наӈ Āнумн мим хōтпанын, хумус Мēн аквъёт ōлымēн, тāн ос вос аквъёт ōлэ̄гыт.12 Ам мир халт ōлмум сыс тāнаныл Наӈ намын мāгыс ӯргаласāнум, Наӈ Āнумн мим хōтпанын Ам ӯргаласанум. Тāн нэ̄мхотъютаныл ат порсыс, акв пы̄г коны-пāл, тав Тōрум нэ̄пакт порсланэтэ урыл хансым ōлыс.13 Ань ос Ам Наӈ палтылын ты ювум, ань мир халт ōлнэ сыс лāвēгум, тāн сыманылт Ам вēськат ся̄гтылум вос ōньсияныл.14 Ам тāнāны̄лн Наӈ кēтум лāтӈын лāвыслум; таимāгыс тāн мирын лавыл нэ̄гылттаӈкве патвēсыт, Ам хольттылум тāн ты мирныл ат ōлэ̄гыт.15 Тāнаныл мир халныл хот-вӣнэ мāгыс Ам ат пōйксēгум, яныг кантныл ӯргалан мāгыс Ам пōйксēгум.16 Тāн Ам хольттылум ты мирныл ат ōлэ̄гыт.17 Наӈти вēськат наканынт тāнаныл ялпыӈы̄г вāрēн; Наӈ лāтӈын мāк вēськат накы̄г ōлы.18 Наӈ Āнум мир халн кēтмын хольт Ам ос тāнаныл ахвтох мир халн кēтсāнум.19 Тāн вēськат накыл ялпыӈыг вāрнэ̄ныл мāгыс Ам Амкинанум тāн мāгсыланыл мы̄глум.20 Тāн мāгсыланыл тӯп хунь пōйксēгум, Āнумн лāтӈум тāра агтнэ мир мāгыс ōс пойксēгум.21 Вос пуссын акваг аквъёт юртыӈысь ōлэ̄гыт, хумус Наӈ, Āсюм Ам сымумт ōлэ̄гын, ос Ам Наӈ сымынт ōлэ̄гум, тāн ōс ахвтох Мēн палтыламēн вос ōлэ̄гыт, – Наӈ Āнум кēтмын, мир вос агтэ̄гыт.22 Наӈ Āнумн мим āнум янытлан вāрмалин Ам тāнанылн мӣслум: Мēн акв сымыл ōлнэмēн хольт тāн ос вос акв сымыл ōлэ̄гыт.23 Ам тāнанылт ōлэ̄гум, Наӈ Āнумт ōлэ̄гын; тāн ōс акв сымыл вос ōлэ̄гыт, Наӈ āнум кēтмын урыл ос тāнаныл хумус Āнум э̄руптанэн хольт ос э̄руптанэн урыл мирн вос вāве.24 Наӈ мим Āнум янытлан вāрмаль вос кāсалыяныл, тōрум-мā ӯнтхатнэ э̄лы-пāлт Наӈ Āнум э̄руптамын мāгыс. Āся̄! Наӈ Āнумн мим утанын Ам ōлнэ мāмт Ам ётум вос ōлнэныл урыл таӈхēгум.25 Вēсар Āсюм! Наӈ мирын тāра иӈ ат паттувēсын, Ам наӈын вāглум, ос Наӈ Āнум кēтмын урыл тāн ōс вāганыл.26 Ос Ам тāнанылн Наӈ намын хӯлты̄слум, э̄лаль тах ос хӯлты̄лум, Наӈ Āнум э̄руптан э̄рупсан тāн палттыланыл вос ōлы, Ам ос тāн палттыланыл вос ōлэ̄гум”.
Глава 17