Выбрать язык
Книги Ветхого Завета
Книги Нового Завета
с русским текстом1 Хунь Ӣсус пуссын ты лāтӈанэ лāвсанэ, Такви ханисьтахтын хумиянэ нупыл лāвыс:2 ”Нāн вāглын, кит хōталыг миннэ юи-пāлт Яныг ялпыӈ хōтал*а ēмты тах, ос Э̄лумхōлас Пы̄г тах пēрнан ратнэ мāгыс тыналаве тах”.3 Тōнт Каифа нампа пӯп-ōйкат кӯсяй колн пӯп-ōйкат кӯсяит, Сāккон ханисьтан хумит ос мир пуӈкхумит атхатсыт,4 тāн Ӣсус осьмарыл виӈкве ос алуӈкве потыртахтасыт.5 Ос тāн лāвыгласыт: ”Ялпыӈ хōтал порат ат э̄ри ты вāрмаль вāруӈкве, атиӈк тах мир хот-кантмаяве”.
6 Хунь Ӣсус Вифаният, проказал āгвмыӈ Симон колт ōлыс,7 Тав палтэ алабастерныл*б вāрим сулья ёт, нэ̄ ляпан-рōвыс. Сулья кӣвырт тыныӈ вōй ōлыс, та атыӈ вōй Ӣсус тэ̄нэ̄тэ порат Тав пуӈке тармыл сōсыстэ.8 Таи кāсалым, Тав ханисьтахтын хумиянэ хот-кантмувесыт ос лāвыглалсыт: ”Манрыг наскасыг тасāвит олн холтуӈкве?9 Ты вōй рōвыс яныг тын мāгыс тыналаӈкве ос нуса мāхумн та ōлнэ уртуӈкве”.10 Хунь Ӣсус ты урыл торгамтастэ, тāнанылн лāвыс: ”Манрыг нэ̄ э̄ссамтаптылалы̄н? Тав ёмас вāрмаль Ам мāгсылум вāрыс.11 Нуса хōтпат акваг нāн ётын ōньсиянын, ос Āнум акваг хунь ёт ōньсилы̄н.12 Ам палтум вōй сōсым, тав Āнум ёл-сё̄питан мāгыс тох ты вāрыс;13 мāк ты лāвēгум: Мā яныт, хōт ты Ёмас Ля̄ххал лāваве, тот тах тав ос номтыл патаве, тав вāрум утэ урыл потыртаӈкве ты патаве”.
14 Китхуйпловныл ōлнэ акв Иуда Искариот нампа ханисьтахтын хум пӯп-ōйкат кӯсяит палт та минас15 ос лāвыс: ”Мāныр нāн āнумн мыгы̄н тах, ам Таве нāнанн тыналанэм мāгыс?” Тāн тавēн вāт ся̄лыг олнкēр миӈкве лāвсыт.16 Та пасныл тав тамле э̄рнэ нак кинсыс, хунь Таве тах тāнанылн тыналытэ.
17 Ōвыл сумтāл ня̄нь тэ̄нэ ялпыӈ хōталт ханисьтахтын хумиянэ Ӣсус палт ляпан рōвсыт, Таве китыгласаныл: ”Хот мāнавн Наӈ мāгсылын Яныг ялпыӈ хōтал тэ̄нэ пāсан сё̄питаӈкве рōви?”18 Тав лāвыс: ”Ӯсын тамле-тамле хōтпа палт минэ̄н, тавēн лāвен: ‘Ханисьтан хумув лāви: Ам сё̄сум ляпан ты ёхтыс; наӈ колынт Амти ханисьтахтын хумиянум ёт Яныг ялпыӈ хōтал тэ̄нэ тэ̄п вāрēгум’”.19 Ӣсус лāвум сирыл ханисьтахтын хумиянэ та вāрсыт, ос Яныг ялпыӈ хōтал тэ̄нэ пасан та сё̄питасыт.20 Хунь э̄типалаг ēмтыс, Тав китхуйплов ханисьтахтын хумиянэ ёт пасан ватат атхатас.21 Тэ̄пъяманыл порат, лāвыс: ”Сōль нāнанн та лāвēгум, тах нāн халынт акв утын Ам та тыналавēм”.22 Тāн сака кāстāл патсыт, ос кāсыӈ хōтпа Тавēн лāвуӈкве патыс: ”Ос ам āти, Кӯсяй?”23 Тав ос ювле-лāвыс: ”Ам ётум катэ āнын тотнэ хумн тах та тыналавем;24 Э̄лумхōлас Пы̄г, хансым сирыл, та сысы-мины, ос таин яныг саватпи паты, хотъютн Э̄лумхōлас Пы̄г тыналаве тах: ёмаснуве ōлнув таин самын ат патуӈкве”.25 Тōнт Таве тыналан Иуда лāвыс: ”Равви, ул ам āти ман?” Ӣсус тавēн лāвыс: ”Наӈ ты лāвсын”.
26 Хунь тāн тэ̄пъяласыт, Ӣсус ня̄нь катн вистэ, Тōрумн пӯмасипа лāвыс, ня̄нь лōмтыг сакватастэ ос ханисьтахтын хумиянэ̄н маим, лāвыс: ”Вуелы̄н, тāēн. Ты Ам алпим”.27 Āны вис, Тōрумн пӯмасипа лāвыс, тāнанылн мистэ ос лāвыс: ”Пуссын тыгыл аēн,28 тыи Ам кēлпум ос йильпи потыртахтын нак кēлуп, тав сāв мир кареканыл тāратанэ мāгыс ты сōсхаты.29 Нāнанн ты лāвēгум: воссы̄г тах ты виноградныл вāрим айнут та хōтал мус ат патэ̄гум аюӈкве, хунь нāн ётын Амти Āсюм йильпи нотыт йильпи вина аюӈкве патэ̄гум тах”.30 Тāн Тōрум янытлан э̄рыг э̄ргысыт, ос Вōййӣв урын минасыт.
31 Тōнт Ӣсус тāнанылн лāвыс: ”Ты э̄т нāн пуссын Āнум оссувлылы̄н, хансым сирыл ōлы: ‘Пāля ӯрнэ хум тэ̄рнлылум, пāлят лакква-хайтэ̄гыт тах’.32 Хунь нōх-ялтэ̄гум тах, нāнанныл моляхнуве Галилея мāн минэ̄гум”.33 Пēтыр Тавēн ювле-лāвыс: ”Тāн пуссын Наӈынныл хот-воратэ̄гыт ке, ос ам Наӈын ат оссувлылум”.34 Ӣсус тавēн лāвыс: ”Мāк наӈын ты лāвēгум, ты э̄т тах сиськурек ат āлыми рōӈхувлаӈкве, хумус наӈ хӯрум сё̄с тах Āнумныл пōхан воратэ̄гын”.35 Пēтыр Тавēн лāвыс: ”Āнумн Наӈ ётын сорумн патуӈкве вос э̄рыс кос, Наӈыныл пōхан сяр ат воратэ̄гум”. Тысир пуссын ханисьтахтын хумиянэ лāвыглāлсыт.
36 Тувыл тāн ётаныл Ӣсус Гефсимания нампа мāн ёхты, ос ханисьтахтын хумиянэ̄н лāвыс: ”Ам ялнэм сыс тыт ӯнлахōлэ̄н, Ам тот мось пойксēгум”.37 Такви ётэ Пēтыр ос Зеведей кит пы̄гаге вис, тувыл Тав такем та алпи-харе нас тōргуӈкве патыс ос сяр кāстāлыг ēмтыс.38 Тōнт Ӣсус тāнанылн лāвыс: ”Ам сымум пилысьмаӈ тыстылын патыс, Ам ётум тыт ōлэ̄н, ёл ул вос оилматавēн”.39 Мось пōханнув минамēт, хоми мā тармыл рагатас, пōйксим лāвыглалыс: ”Ам Āсюм! Рōви ке ты саватпиӈ āны Ам тāрам вос тотаве; Ам таӈхнэм сирыл ул вос ēмты, Наӈ таӈхнэн сирыл вос ēмты”.40 Ханисьтахтын хумиянэ палт ёхтыс, тāнаныл ёл-ойим хōнтсанэ, ос Пēтыр нупыл лāвыс: ”Нāн акв сё̄с Ам ётум ӯлумтāл ат та вēрмысы̄н?41 Ёл ул вос оявēн ос пōйксēн, савалан вāрмалин ул майхатэ̄н. Кивыр лылы тāк кос, алпи-хар тай вāгтал”.42 Ос, мōт сё̄с пōхан миным, пōйксяс, потыртым: ”Ам Āсюм! Ты саватпиӈ āны Ам тāрам ат ке рōви тотуӈкве, Āнумн ат айнэ мāгыс, тōнт Наӈ лāвмын сирыл вос паты тах”.43 Ос ёхтумēт, таиганэ ōс ёл-ойим хōнтсанэ, тāн саманыл тāрвитыӈы̄г ēмтманыл мāгыс.44 Тāнаныл хӯлим, ос хӯрмиттыг пōйксяӈкве минас, ос акв та лāтӈэ лāвыс.45 Тōнт Такви ханисьтан хумиянэ палт ёхтыс, тāнанылн лāвыс: ”Нāн иӈ та хуегы̄н ос ӯсьлахтэгы̄н? Ань ты сё̄с ляпан та ёхтыс, ос Э̄лумхōлас Пы̄г карекыӈ мāхум кāтын та миве.46 Нōх-квāлэ̄н, минэ̄в, Āнум тыналан ут ляпан ты ёхтыс”.
47 Ӣсус иӈ потыртас, тыт ты Иуда – китхуйпловныл акв ут ос тав ётэ сāв сыраиӈ ос йивсупыӈ тāгыл хумит ёхтысыт, тāн пӯп-ōйкат кӯсяитныл ос мир пуӈкхумитныл кēтым ōлсыт.48 Таве тыналан хум тāнанылн пōс хӯлтыс, лāвим: ”Хотъют ам тах аниглылум, Таи ты, Таве та пувилы̄н”.49 Тāра та ос Ӣсус пōхан ёмыс, лāвыс: ”Пася ōлэн, Равви!” Ос Таве та анигластэ.50 Ӣсус ос тавēн лāвыс: ”Рума, наӈ тыи мāгыс ёхтысын”. Тōнт хумит та ёхтыгпасыт, Ӣсус кāтыл та пувумтасаныл.51 Ӣсус ёт ōлум акв хум, кāтэ тактапастэ, сырае кон-хасумтастэ, пӯп-ōйкат кӯсяй мēтхум сыраил ю̄ныгтастэ, таи пале хот та сāграпастэ.52 Тōнт Ӣсус тавēн лāвыс: ”Наӈти сыраин такви сыпалēн пинэ̄лн, алам хотъют сырай вы̄г, таи сыраил та порсы тах.53 Э̄рыӈ наӈ номсэ̄гын Ам ань Амти Āсюмныл ат вēрмēгум вōвуӈкве, Тав аквтаторыг Āнумн китхуйплов Ангел легионытыл*в сāвнув миӈкве вēрми?54 Хумус тōнт Нэ̄пакт хансым лāтӈыт ēмтэ̄гыт тах, тасир ты вāрмале минуӈкве э̄ри?”55 Та сё̄ст Ӣсус хумитн лāвыс: ”Нāн сыраиӈ ос йивсупыӈ тāгыл Āнум пувнэ мāгыс аквтупыл хорахси пувуӈкве сё̄питахтасы̄н; кāсыӈ хōтал ялпыӈ колт мир ханисьтым ӯнлахōлсум, ос нāн Āнум ат пувыглалыслы̄н.56 Ты вāрмаль пуссын тысир та ēмтыс, Тōрум лāтыӈ тотнэ мāхум Нэ̄паканыл сирыл вос ēмтэ̄гыт”. Тōнт пуссын Тав ханисьтахтын хумиянэ Таве оссувласаныл, та оясыт.
57 Ос Ӣсус пувум хумит Таве Каифа нампа пӯп-ōйкат кӯсяй палт тотсаныл, тув Сāккон ханисьтан хумит ос мир пуӈкхумит атхатасыт.58 Пēтыр тāн юи-пāланылт юилнув, пӯп-ōйкат кӯсяй кол кāрта мус йис. Хунь ось кӣвырн сялтыс, лусытан мāхум ёт ёл-ӯнтыс, э̄лаль миннэ вāрмаль суснэ мāгыс.59 Пӯп-ōйкат кӯсяит, мир пуӈкхумит ос пуссын синедрион*г хумит Ӣсус урыл урккыӈ вāрмаль киссыт, Таве алнэ мāгыс,60 ос нэ̄матыр ат вēрмысыт хōнтуӈкве; тыкос сāв урккыӈ мāхум ёхталасыт, ос ат та хōнтсыт. Ос тувыл кит урккыӈ хōтпаг ёхтысы̄г61 ос лāвсы̄г: ”Тав лāвыглас: ‘Вēрмегум Тōрум ялпыӈ кол хот-сакватаӈкве ос тувыл хӯрум хōтал сыс таве нōх-ӯнттуӈкве’”.62 Ос, нōх-лю̄лим, пӯпыт кӯсяй хум Тавēн лāвыс: ”Манрыг нэ̄матыр ювле ат лāвēгын? Мāныр тāн Наӈын пōри мāгыс хӯлтэ̄гыт?”63 Ӣсус нэ̄матыр ат лāвыс. Ос пӯп-ōйкат кӯсяй Тавēн лāвыс: ”Ам лылыӈ Тōрум намēтыл Наӈын тāкысь лāвēгум: мāнавн лāвен, Наӈ ман Кристос, Тōрум Пы̄ге?”64 Ӣсус тавēн лāвыс: ”Наӈ тасир лāвсын, ос нāнанн лāвēгум: ты пāсыл нāн кāсалылы̄н тах, Э̄лумхōлас Пы̄г Тōрум ёмас кāтпал торыг ӯнлы тах ос тōрум тулыт халн ёхты тах”.65 Тōнт пӯп-ōйкат кӯсяй такви маснутанэ пулиг манумтасанэ ос лāвыс: ”Тав Тōрумыл мовиньты! Манрыг воссыл ӯлты хумит э̄рēгыт? Ань танай Тав Тōрум урыл мовиньтанэтэ нāн хӯлыслын!66 Хумус нāн номсэгы̄н?” Тāн ювле-лавсыт: ”Тав ōвылн патум, Тавен сорумн патуӈкве э̄ри!”67 Тōнт Тав вильтэ̄ полхыл сальгувес ос сяхныл рāтвес; мōтанытн Тав пāйтагет рāтвес68 ос лāвыгласыт: ”Кристос, э̄лаль потыртэн, хотъютын Наӈ ю̄ныгтавесын?”
69 Пēтыр кол кāртат ӯнлыс. Тав ляпатэ̄н акв лусытан нэ̄ ёхтыс ос лāвыс: ”Наӈ ос Галилеяныл ōлнэ Ӣсус ёт ōлсын”.70 Ос тав таил мир э̄лы-пāлт хот-воратас ос лāвыс: ”Ат торгамтылум, мāныр урыл наӈ потыртэ̄гын”.71 Кāрта āви пōхан ёхтумет, мōт нэ̄н кāсалавес, таи тот ōлум мāхумытн лāвыс: ”Тыи ōс Назаретныл ōлнэ Ӣсус ёт ōлыс”.72 Ōс тāк лāтыӈ маим тав таиныл пōхан воратас, э̄рттэм Ты Э̄лумхōлас ат вāгтэ.73 Мось ётылнув тот лю̄ляхōлнэ мāхум ляпан йисыт ос Пēтырн лāвсыт: ”Соль, наӈ ос тāнанылныл ты ōлэ̄гын, наӈ потрын ос тасир ты”.74 Тōнт тав ля̄втуӈкве патыс ос тāк лāтыӈ мистэ, э̄рттэм Ты Э̄лумхōлас ат вāгтэ. Ос илттыг сиськурек та рōӈхалтахтас.75 Ос Пēтыр Ӣсусн лāвим лāтӈэ та номылматастэ: ”Сиськурек рōхнэ э̄лы-пāлт Āнумныл хӯрум сё̄с пōхан воратэ̄гын тах”. Ос кон-квāлым, саватпиӣг лю̄ньсюӈкве та патыс.
*а 2 26:2 Яныг ялпыӈ хōтал – ты русь лāтӈыл пасха
*б 7 26:7 алабастер – я̄ӈк сӯли, русь лāтӈыл алебастр
*в 53 26:53 легион – 6000 хōнт хум
*г 59 26:59 синедрион – яныг совет, тот та мā кӯсяйг ōлыс
Глава 26