Выбрать язык
Книги Ветхого Завета
Книги Нового Завета
с русским текстом1 ”Тōнт Тōрум йильпи нот лов āги хурипаг ēмты тах, тāн тāнти вōйил постын лампаныл вуим ос хумияныл ёт хōнтхатуӈкве кон-квāлсыт.2 Тāн халанылт ат номтыӈыт ос ат номттāлыт ōлсыт.3 Номттāл āгит лампаныл ёт висаныл, ос лампа вōй ат висыт;4 Номтыӈ āгит лампаныл ёт ос сōпас мāгыс лампа вōй висыт.5 Нэ̄ тотнэ хум лāсял йис, āгит юнсуӈкве патсыт ос ёл та ойвēсыт.6 Ос э̄т котильт тай рōӈх сумыллас: ‘Тыт ты вāпс юв, кон-квāлэн тав ётэ хōнтхатуӈкве’.7 Тōнт пуссын āгит нох-квāлсыт ос тāнти лампаныл сё̄питасаныл.8 Номттāл āгит номтыӈ āгит нупыл лāвсыт: ‘Нāн вōянынныл мāнавн маēн, мāн лампанув ты харыглэ̄гыт’.9 Номтыӈ āгит ювле-лāвыглāлсыт: ‘Тасир ул вос ēмты: мāнавн ат тōвылхаты тах, нāнан ос ат тōвылхаты тах, ялэ̄н тыналахтын мāхум палт ос нāнтинан мāгсылын ёвтэ̄н’.10 Хунь тāн минасыт тāнти мāгсыланыл вой ёвтуӈкве, вāпс та ёхтыс, сё̄питахтам āгит тай тав ётэ пӯри вāрнэ мāн та сялтсыт, ос āвит лап та пантвēсыт.11 Ётылнув ань та мōт āгит ёхтысыт ос лāвēгыт: ‘Кӯсяй! Кӯсяй! Мāнавн палыг пӯнсэ̄лын!’12 Тав ос тāнанылн ювле-лāвыс: ‘Мāк ты лāвēгум: нāнан ат вāганум’.13 Ос ӯрхатым ōлэ̄н, нāн ат вāглын, хоты хōталт, хоты сё̄сыт Э̄лумхōлас Пы̄г тах ёхты”.
14 ”Ос Тōрум йильпи нот та э̄лумхōлас хурипаг ōлы, хōӈха мōт э̄лы мāн миннэ̄тэ порат такви мēтхумиянэ ляпан вōвсанэ ос такви ōлтуланэтыл тāнанылн кӯсяйлахтуӈкве лāвсанэ.15 Ос акван тав ат талант мис, мōтанын китыг, тōван аква, кāсыӈ хōтпан тав ё̄ре сирыл; тувыл тāра та минас.16 Ат талантыл маим хум минас, войлам олнанэ̄ныл матыр вāрмаль вāрыс ос та коны-пāл мōт ат талант кāтын паттыс.17 Тасир ос кит талант вим хум вāрыс ос мōт кит талант кāтын паттыс.18 Акв талант вим хум минас ос таве мāн хилыстэ ос такви кӯсяе олнкēр хот та тӯйтыстэ.19 Хоса пора минаме юи-пāлт, мēтхумит кӯсяяныл ты ёхтыс ос тāнанылн олнкēранэ мāгыс ловиньтахтуӈкве лāвыс.20 Ос ат талантыл мāйлым хум ляпан йис, мōт ат талант тотыс ос лāвыс: ‘Кӯсяй! Ат талантанын наӈ āнумн мисанын; тыт ты мōт ат талант, ам тāнаныл та ат талант хосыт кāтн ты паттысанум’.21 Тав кӯсяе тавēн лāвыс: ‘Тасир ты ёмас. Ёмас ос вēськат мēтхумум! Ты мāнь вāрмальт наӈ вēськатыг ōлсын, ань яныг вāрмаль тармыл наӈын тӯсьтылум; наӈти кӯсяйн пӯри вāрнэ мāн сялтэ̄н’.22 Кит талантыл майлым хум ос тасир ляпан йис ос лāвыс: ‘Кӯсяй! Кит талант наӈ āнумн мисагы̄н; тыт ты мōт кит талант, ам тэ̄натэ̄ныл та кит талант хосыт кāтн ты паттысагум’.23 Тав кӯсяе тавēн лāвыс: ‘Тасир ты ёмас. Ёмас ос вēськат мēтхумум! Ты мāнь вāрмальт наӈ вēськатыг ōлсын, ань яныг вāрмаль тармыл наӈын тӯсьтылум тах; наӈти кӯсяйн пӯри вāрнэ мāн сялтэ̄н’.24 Акв талантыл мāйлым хум ляпан йис ос лāвыс: ‘Кӯсяй! Ам вāслум наӈ тāк хум: ня̄нь пум якытлэ̄гын, хōт колас сам ат ӯнттыслын, ос атэ̄гын, хōт колас сам ат пāхвтыгласын.25 Ос пилым ōлмумт наӈ талантын мāн тӯйтыгласлум; тыт ты наӈ утын’.26 Кӯсяе тавēн ювле-лāвыс: ‘Лю̄ль ос савыӈ мēтхум! Наӈ вāслын, ам ня̄нь пум якытлэ̄гум, хōт ат ӯнттыслум, ос атэ̄гум, хōт ат пāхвтыгласум;27 Таимāгыс наӈын э̄рыс ам олнанум банкн сāвмалтан мāгыс миӈкве. Тōнт ам ювле-ёхтумумт олнум нё̄тмиланыл ёт винуванум.28 Тавēныл талантэ хот-вуēлын ос таи лов талант ōсьнэ хōтпан маēлын.29 Кāсыӈ матыр ōсьнэ хōтпа ос миве тах ос майнэ утэ сāвыг ēмты тах, ос хотъют мосься ōньси, таиныл мосься ōсьнэ утэ ос хот-виве тах.30 Ос нэ̄матрыг ат хōйхатнэ мēтхум турман мāн кон-вуськасэ̄лын, хōт тах лю̄нсь ос пуӈк сихыртан суй суйты’”. Тыи лāвим, рōӈхувлас: ”Хотъют паль ке ōньси, та вос хӯнтлы!”
31 ”Хунь тах Э̄лумхōлас Пы̄г Такви посэ ёт ёхты ос пуссын Ялпыӈ Ангелыт Тав ётэ, тōнт Такви Янытлапе хōн улас тармыл та ӯнты тах.32 Тав э̄лы-пāлэн пуссын мирыт тах акван-атавет; ос мāхум халанылт лāкква-уртыянэ тах, хумус пāля ӯрнэ хум пāлянэ козатныл лāкква-уртыянэ.33 Ос пāлянэ Такви ёмас кāт пал нупыл тӯсьтыянэ тах, козат ос – вōртыпал кāтпал нупыл тӯсьтыянэ тах.34 Тōнт Хōн ёмас кāт пал нупыл лю̄льнэ утанэ̄н лāви тах: ‘Ёхтэ̄н, Ам Āсюмн э̄рупсал вōвим утыт, мā ӯнтум порат нāн мāгсылын сё̄питым Тōрум йильпи нот вуēлын:35 Ам сымум э̄тгалавес, нāн Āнумн тэ̄нут мисын; вит аюӈкве тахсум, ос нāн Āнум айтыслы̄н; колтāл ōлсум, ос нāн Āнум ляпан-вислы̄н;36 Ня̄р алпил ōлсум, ос нāн Āнум мастыслы̄н; āгвмыӈ ōлсум, ос нāн Āнум уральтаслы̄н; турманколт ōлсум, ос нāн Ам палтум ёхтысы̄н’.37 Тōнт вēськат мāхум Тавēн ювле-лāвēгыт: ‘Кӯсяй! хунь мāн Наӈын тэ̄тал ōлнэн вāслув, ос тыттыслув? Ман ос аюӈкве тахсын, ос айтыслув?38 Хунь мāн Наӈын колтāл ōлым вāслув, ос ляпан-вислув? Ман ос ня̄р алпил ōлсын, ос мастыслув?39 Хунь Наӈын āгвмыӈыг кāсаласлув, ман ос турман колт ōлнэнт, ос Наӈ палтын ёхтыгласув?’40 Ос Хōн тōнт тāнанылн ювле-лави: ‘Сōль нāнанн ты лāвēгум: нāн таи вāрсын акв Ам сяр мāнь āпсим мāгыс, таи Ам мāгсылум та вāрсын’.41 Тōнт вōртыпал кāтэ торыг ӯнлын утытн ос лāви тах: ‘Āнумныл пōхан минэ̄н, лю̄ль накыӈ утыт! Акваг э̄лаль тэ̄нэ нāй капайн минэ̄н! Ты куль ос тав ангеланэ мāгыс сё̄питым ōлы:42 Ам сымум э̄тгалавес, ос нāн Āнумн тэ̄нут ат мисы̄н; вит аюӈкве тахсум, ос нāн Āнум ат айтыслы̄н.43 Ам колтāл ōлсум, нāн Āнум ляпан ат вислы̄н; ня̄р алпил ōлсум, ос Āнум ат мастыслы̄н; āгвмыӈ ос турман колт ӯнлысум, нāн Āнум ат уральтаслы̄н’.44 Тōнт таит ос тах ювле Тавēн лāвēгыт: ‘Кӯсяй! Хунь мāн Наӈын тэ̄тал, ман вит аюӈкве таӈхим, ман колтāл ōлым, ман ня̄р алпил, ман āгвмыӈы̄г, ман мāн турман колт васлув, ос Наӈын ат лусытасув?’45 Тōнт тāнанылн лāви: ‘Мāк нāнанн ты лāвēгум: нāн тыи ты акв сяр мāнь утум мāгыс ат вāрсын, Āнумн ат та вāрсын’.46 Ос тыит тах акваг э̄лаль ōлнэ савалан мā нупыл та минэ̄гыт, ос вēськат утыт акваг э̄лаль ōлнэ ōлупсан та минэ̄гыт тах”.
Глава 25