Выбрать язык
Книги Ветхого Завета
Книги Нового Завета
с русским текстом1 Аквта хōталыт колныл кон-квāлмет, Ӣсус ся̄рысь вāтан ӯнтыс.2 Сāв мир Тав палтэ атхатасыт, таимāгыс Тав хāпн тāлыс ос ӯнтыс, ос атхатам мир ся̄рысь вāтат лю̄ляхōлсыт.3 Ос тāнанылн сāв ханисьтапыл ханисьтасанэ, тох лāвим: ”Ань колассам ӯнттын хум колассам ӯнттуӈкве квāлыс.4 Хунь тав колассамыт пāхвтысанэ, тōва колассамыт лё̄ӈх пōхан рагатасыт, ос ӯйрисит тув тыламласыт ос тāнаныл та нāхвсаныл.5 Тōва самыт āхвтасыӈ мāн рагатасыт, хōт мосься мā лōмт ōлыс. Молях та пум нэ̄глапас, тот вōвта мā ōлыс.6 Хунь хōтал нэ̄глыс, тув-тōсыс, ос тар ат ōньсюм мāгыс порсыг та минас.7 Тōва колассамыт пēлялахтын йӣв сяхыл халн рагатасыт, та порс-пум яныгмас, коласпумыт лап та яныгмавēсыт.8 Тōва колассамыт пōртыӈ мāн рагатасыт ос тэ̄нут тотсыт: аква яныгсāт, мōтан хōтпан сёс сāвнувēг, тōва ос вāт сёс сāвнувēг тэ̄нутыг яныгмасыт.9 Хотъют хӯнтлын паль ōньси, вос хӯлытэ!”
10 Ханисьтахтын хумиянэ ляпан йисыт ос Ӣсус нупыл лāвсыт: ”Манрыг Наӈ ханисьтапыл тāнанылн потыртэ̄гын?”11 Тав тāн нупланыл ювле-лāвыс: ”Нāнан Тōрум йильпи нот сытам наке вāӈкве маим ōлы, ос тāнан таи вāӈкве маим ат ōлы.12 Хотъют матыр ōньси, таин миве тах, ос ōсьнэ утэ усьпылнэ̄г сāвыг ēмты тах. Ос хотъют ат ōньси, тавēныл хот виве мāныр ōньси.13 Таимāгыс тāнанылн ханисьтап лāтӈыл та потыртэ̄гум, тāн сунсым ат кāсалэ̄гыт, ос хӯнтлым ат хӯлэ̄гыт, ат торгамтэ̄гыт.14 Тōрум лāтыӈ тотнэ Исая хум лāвме сирыл сōль ēмты тах: ‘Хӯнтлэгы̄н кос – ат торгамтылы̄н, ос самыл сунсуӈкве патэгы̄н кос – ат кāсалылы̄н тах.15 Ты мāхум сыманыл сурумыг ēмтсыт, ос паляныл лю̄льсаӈ хӯлэ̄гыт, ос саманыл лап-пантсаныл. Самыл тāн кāсалаӈкве ат таӈхēгыт ос палил хӯлуӈкве ат таӈхēгыт. Тāн сыманыл торгамтаӈкве ат таӈхēгыт, тāнаныл пусмалтан мāгыс Ам нупылум ат ё̄ӈхēгыт’.
16 Кāсаланэн мāгыс нāн саманы̄н сōтыӈыт, ос хӯлнэн мāгыс нāн палянын сōтыӈыт.17 Алам мāк нāнанн ты лāвēгум: сāвсыр тōрум лāтыӈ тотнэ хумит ос вēськат хумит таи кāсалаӈкве тахсыт, мāныр нāн кāсалэгы̄н, ос ат та кāсаласыт, ос таи хӯлуӈкве тахсыт, мāныр нāн хӯлэгы̄н, ос ат та хӯлсыт”.
18 ”Нāн колассам ӯнттын хум урыл ханисьтап хӯнтлэлы̄н:19 Сāвсыр хōтпа тōрум йильпи нот урыл лāтыӈ хӯнтлы ос ат торгамты, тамле хōтпа палт я̄вол ёхты ос ты хōтпа сымēт ӯнттум утанэ та я̄волин хот-тулмантавет: та урыл лё̄ӈх пōхан патум колассамыт та ōлэ̄гыт.20 Ос āхвтасыӈ мāн ӯнттым колассамыт – тай тамле хōтпа урыл, хотъют лāтыӈ хӯлы ос ся̄гтым та лāтыӈ аквтыторыг таквинāтэн вы̄гтэ,21 ос тāр ат ōньси, таимāгыс хоса ат вēриты: хунь лāтыӈ мāгыс тāрвит пора ёхты манос ня̄влын вāрмаль ēмты, тōнт тāра тав лāтӈаныл хот-вораты.22 Ос пēлялахтын йӣв сяхыл халн патум колассамыт, тай тамле хōтпа, хотъют лāтыӈ хӯлытэ кос, ос кāсыӈ хōтал сāв рӯпата ōсьнэтэ мāгыс ос сёлыӈы̄г ōлуӈкве тахнэ̄тэ мāгыс лāтӈэ хот та ёрувлытэ, тамле лāтыӈ пōрт ат ōньси.23 Пōртыӈ мāн ӯнттым колассамыт – тай лāтыӈ хӯлнэ ос торгамтан хōтпа, тай пōртыӈыг ты ōлы, таимāгыс тōва яныгсāт, тōва хōтпан, тōва вāт сёс сāвнувēг пōртыӈ тайм янмалты”.
24 Мōт ханисьтап Тав тāнанылн потыртас: ”Тōрум йильпи нот, тай аквтуп такви тэ̄пканэт пōртыӈ колассам ӯнттын э̄лумхōлас.25 Хунь мāхум ёл-хуясыт, тав ётэ воритотнэ утэ ёхтыс ос колас пум халын порс пум самыт пāхвтыс ос та минас.26 Хунь ня̄рпум нэ̄глыс ос колассамын яныгмаве, тōнт порс пум ос та нэ̄глыс.27 Кӯсяй ёхтум мēтхумиянэ тавēн лāвсыт: ‘Кӯсяй! Ман наӈ пōртыӈ сам ат ӯнттысын наӈти тэ̄пканынт? Хотыл тот порс пум яныгмас?’28 Тав лāвыс: ‘Ам ётум воритотнэ э̄лумхōлас тыи вāрыс’. Мēтхумит тав нуплэ лāвсыт: ‘Таӈхēгын ке, мāн минэ̄в, порсыт хот-маныгтыянув?’29 Ос тав тāнанылн лāвыс: ‘Ат э̄ри. Нāн тах порс пум маныгтым, атиӈк колас пум лӯптат ос хот-манумтыяны̄н.30 Колас пум сāгрын мус тыи ос таи аквъёт яныгмим хультуптэ̄н. Ос колас пум сāгрын порат ам пум сāгрын хōтпатн лāвēгум тах: сāртын порс пумыт атэ̄н ос акван нэ̄гсалэ̄н, нāйин тыттын мāгыс, ос колас пум ам сӯмъяхумын тах пинэ̄н’”.
31 Ос акв ханисьтап Тав тāнанылн потыртас: ”Тōрум йильпи нот корчица-сам*а хурипа. Э̄лумхōлас та сам вистэ ос такви тэ̄пканэт та ӯнттыстэ.32 Тав мōт самытныл сяр мāнь кос, ос хунь яныгми, тōнт тэ̄пкан пумытныл сяр янгы̄г ōлыглы. Тувыл йӣвыг ēмты, товлыӈ ӯйит тав тованэ̄н пити вāрēгыт тах”.
33 Ос мотсыр ханисьтап Тав тāнанылн потыртас: ”Тōрум йильпи нот ня̄ньсум хурипа. Э̄ква таве яныг колас āнын*б рāвтыстэ, ос ня̄ньсум*в нōх-пāялтыс”.34 Ты пуссын Ӣсус мирын ханисьтан потрыт сирыл потыртасанэ, ханисьтан потыртал тāнанылн нэ̄матыр ат потырталыс.35 Тох та ēмтыс, хумус Кӯсяй такви лāтыӈ тотнэ хум сирыл лāвыс: ”Ханисьтан потранум мāгыс Ам сӯп-нēлмагум пāлыг-пунсыягум, лāвēгум та урыл, мāныр нэ̄мхōтпа мā ӯнтум пасныл ат васинтас”.36 Тувыл мāхум хот-тāртым, Ӣсус колн сялтыс. Ханисьтахтын хумиянэ Тав палтэ рōвим лāвсыт: ”Мāнавн тэ̄пкан порс пум урыл ханисьтапын торгамтаптэ̄лын”.
37 Тав ос тāнанылн ювле-лāвыс: ”Ёмас колассам ӯнттын хум тай Э̄лумхōлас Пы̄гыг ōлы.38 Тэ̄пкан тай мир. Пōртыӈ сам – таи Тōрум йильпи нот ня̄врамыт, порс пум – таи я̄вол ня̄врамыт.39 Порс самыт ӯнттум воритотнэ ут, тай я̄вол. Колас пум сāгрын пора, тай йис холнэ пора, ос колас пум сāгрын хумит – тыи Ангелыт.40 Таимāгыс, хумус порс пум акван-атаве ос нāйин пāхвтаве, тох йис холнэтэ порат паты тах.41 Э̄лумхōлас Пы̄г тах Такви Ангеланэ кēтыянэ, ос Тав йильпи нотэ̄ныл тāн пуссын карек вāруӈкве хуйтнэ ос сāккон тал ōлнэ утыт акван-атыяныл42 ос тāнаныл нāйиӈ кур кӣвырн воськасыяныл. Тот лю̄ньсь ос пуӈк сихралтан суй тах суйты.43 Тōнт вēськат мāхум хōтал хольт Āсяныл йильпи нотыт суртгэ̄гыт тах. Хотъют хӯнтлын паль ōньси, вос хӯлытэ!”
44 ”Тōрум йильпи нот тэ̄пкант тӯйтым тыныӈ ут хурипаг ōлы, ōйка тай хōнтыстэ ос хот-тӯйтыстэ. Хот-ся̄гтым пуссын мāныр ōньси тыналыянэ, ос та тэ̄пканэ ёвты.45 Ос Тōрум йильпи нот вāтахум хурипа, та вāтахум тыныӈ, нё̄тнэ āхвтасыт кинсы.46 Тав акв тыныӈ āхвтас хонтыс, минас ос пуссын мāныр ōньсяс та тыналасанэ ос таи та ёвтыстэ”.
47 ”Ос Тōрум йильпи нот ся̄рысьн воськасым толыг хурипа, тав сāвсыр хӯл āмартас,48 та толыг хунь тāгинтас, вāтан пāг-хартвес ос ӯнлым ёмас утыт хусапытн атвесыт, ос лю̄ль утыт пōхан пāхвтувесыт.49 Тох паты тах йис холнэ порат: Ангелыт ёхтэ̄гыт ос лю̄ль мāхум вēськат мир халныл хот-хартыглалавет50 ос тāн нāйиӈ кур кӣвырн воськасавет; тот лю̄ньсь ос пуӈк сихралтан суй тах суйты”.51 Ӣсусн тāн китыглавесыт: ”Пуссын тыи нāн торгамтаслын?” Тāн Тавēн лāвсыт: ”Тасир та, Кӯсяй!”52 Тав ос тāнанылн лāвыс: ”Таимāгыс кāсыӈ Сāккон ханисьтан хум, хōӈха Тōрум йильпи нот ханисьтам хумыг ēмтыс, аквтуп кӯсяй, тав такви āмпареныл йильпи ос пēс утыт кон-тотыянэ”.
53 Хунь Ӣсус ты ханисьтапанэ потыртасанэ, тувыл та минас.54 Ос Такви самын патум ӯсэ̄н ёхтыс, тāн синагоганылт тāнаныл ханисьтас, тāн ōсятахтылалсыт ос лāвыглалсыт: ”Хотыл Тав тамле номт ос ё̄р вāрмалит ōньси?55 Йӣвныл матыр вāрнэ хōтпа пы̄г Тав āти? Тав ōматэ Марияг ат лāваве, ос Тав āпсиянэ Яков, Ӯсюп, Симон ос Иуда?56 Ос Тав э̄сянэ ман пуссын мāн халувт ат ōлэ̄гыт? Хотыл Тав палтэ пуссын тыи ōлы?”
57 Таимāгыс тāн Тав урет пōхан-ё̄ӈхысыт. Ӣсус ос тāнанылн лāвыс: ”Тōрум лāтыӈ тотнэ хум акваг янытлаве. Туп такви самын патум ӯсэ̄т ман такви колэ̄т тав ат янытлаве”.58 Ос тāн ат агтнэ̄ныл мāгыс Тав тот сāв ōлыглаттāл вāрмаль ат вāрыс.
*а 31 13:31 кортница – ты русь лāтӈыл горчица
*б 33 13:33 яныг колас āны – хӯрумхуйпловкем литра
*в 33 13:33 ня̄ньсум – восьрамыӈ колас (ты русь лāтӈыл закваска)
Глава 13