Выбрать язык
Книги Ветхого Завета
Книги Нового Завета
с русским текстом1 Аквнакт Ӣсус сабат-хōталт ня̄ньпум янмалтан тэ̄пкан хосыт ё̄мыс; Тав ханисьтахтын хумиянэ тэ̄тал ōлсыт, колас-самыт маныгтаӈкве ос тэ̄ӈкве патсыт.2 Хунь фарисейт тамле вāрмаль кāсаласыт, Тавēн лāвсыт: ”Наӈ ханистахтын хумиянын тамле вāрмаль вāрēгыт, мāныр сабат-хōталыт вāруӈкве ат рōви!”3 Тав тāнанылн лāвыс: ”Нāн ман ат ловиньтāсын, хумус Давид-хōн вāрыс, хунь тав такви ос тав ётэ ōлум мāхманэ тэ̄ӈкв тахмаясыт?4 Хумус тав Тōрум колын сялтыс, Тōрумн пиным ня̄нит тэ̄с, мāнарыт тавēн ос тав ётэ ōлум мāхманэн тэ̄ӈкве ат рōвсыт кос, та ня̄нит пӯп-ōйкатн туп тэ̄ӈкве рōвсыт?5 Нāн ман сāккон ат ловиньтāсын, сабат-хōтал пӯп-ōйкат ялпыӈ колыт рӯпитэ̄гыт, ос карекыӈы̄г ат ловиньтаве?6 Ос нāнан лāвēгум: тыт Таи, Хōӈха ялпыӈ колныл яныгнувег ōлы;7 Нāн вāслын ке тамле лāтӈыт: ‘Сāлитан вāрмаль таӈхēгум, йир тотнэ вāрмаль ат э̄ри’, тōнт наскасыг мāхум ат сутытанувын;8 Э̄лумхōлас Пы̄г ос сабат-хōтал кӯсяйг ōлы”.
9 Тувыл Ӣсус пōхан минас ос та мā синагоган юв-сялтыс.10 Тот кāтэ тув-тōсум хум ōлыс. Ос фарисейт Ӣсус, Таве нуралан мāгыс, китыгласаныл: ”Ман сабат-хōталт пусмалтаӈкве рōви?”11 Тав ос тāнанылн лāвыс: ”Нāнанылныл хотъют акв пāля ōньси ке, пāлятэ сабат-хōталт вōӈхан ке рагаты, таве ман ат вы̄гтэ ос нōх ат харттытэ?12 Ос э̄лумхōлас сāв сё̄с пāляныл тыныӈнуве! Таимāгыс сабат-хōталт ёмас вāрмаль вāруӈкве хōйхаты”.13 Тōнт та э̄лумхōласн лāвыс: ”Кāтын тактэ̄лын”. Тав кāтэ тактыстэ; ос кāтэ мōтпал кāтэ хольт пусыг та ēмтыс.14 Фарисейт кон-квāлсыт, номсахтасыт хумус тах Таве алуӈкве. Ӣсус та урыл ханьсюмет тувыл пōхан та минас.
15 Ӣсус юи-пāлэ̄т сāв мир минмыгтасыт, ос Тав тāнаныл пуссын пусмалтасанэ.16 Тав тāнанылн Такви хӯлтмалтāлыглаӈкве ат тāратахтыс.17 Тох та ēмтыс, хумус Кӯсяй такви лāтыӈ тотнэ хум Исая сирыл лāвыс:18 ”Тыи Ам Мēтхумум, Таве Ам пēрияслум, Ам Э̄руптан утум, лылым Тав мāгсылэ ся̄гты. Ам лылым Тав нуплэ пинылум, ос Тав мирытн вēськат сут вāрмаль урыл тах ля̄ххал тоты.19 Тав ворасьлаӈкве ос рōӈхуӈкве ат паты, ос нэ̄мхōтъютын ӯс хулытт Тав турсуе ат хӯлаве тах;20 вēськат сут вāрмаль нōх ат патнэтэ мāгыс, мāнь пум ат сакваты ос нāйил суртгин понал пум ат харыгты тах.21 Пуссын мирыт Тав вēстын намēн агтуӈкве патэ̄гыт тах”.
22 Тōнт Ӣсус палт сампыльтāл ос сӯп-нēлумтāл кулил вуим хōтпа тотвес. Ӣсус таве пусмалтастэ, ань сампыльтāл ос сӯп-нēлумтāл хōтпа потыртаӈкве ос кāсалаӈкве патыс.23 Ос пуссын мир ōсятахтыглалсыт ос потыртасыт: ”Ты аман Кристос, Давид Пы̄г?”24 Ты урыл фарисейт хӯлманылт, лāвсыт: ”Туп вēльзевул, куль канась ё̄рыл Тав кулит пōхан ня̄влы”.25 Ӣсус тāн номтаныл вāим, тāнанылн лāвыс: ”Кāсыӈ хōн-мā, хōт тāнти халанылт воритотэ̄гыт, воньсялыг мины; ос кāсыӈ ӯс ман колтāгыл, хōт тāнти халанылт воритотэ̄гыт, порсыг та мины.26 Ос куль такви ке ня̄влы, тав такви ётэ воритотыстэ: хумус тав хōн-мāтэ ӯнлуӈкве паты?27 Ам вēльзевул ё̄рыл кулит пōхан ня̄влыянум ке, тōнт ос нāн ня̄враманы̄н мāныр ё̄рыл кулит пōхан ня̄влыяныл? Таимāгыс тāн нāн мāгсылын сутытан хōтпаг вос патэ̄гыт.28 Ам Тōрум Лылы ё̄рыл ке кулит пōхан ня̄влыянум, тōнт нāн палтын Тōрум йильпи нот та ёхтыс.29 Манос, хумус рōви тāксар хōтпа кол кӣвырн сялтуӈкве ос тав пормасанэ тӯлмантаӈкве, аман сāртын та хōтпа ёл нэ̄гсалаӈкве ат э̄ри? Тōнт усь та тав кол пормасанэ вēрми тӯлмантаӈкве.30 Хотъют Ам ётум āтим, таи Ам торгум ōлы; хотъют Ам ётум матыр ке ат аты, таи лāкква-ня̄влы.
31 Таимāгыс нāнанн ты лāвēгум: пуссын карек ос сāвсыр лю̄ль лāтӈыт э̄лумхōласыт тāратавет; ос Ялпыӈ Лылы нупыл лāвнэ лю̄ль лāтӈыт Тōрумын ат тāратавет.32 Хотъют лю̄ль лāтыӈ Э̄лумхōлас Пы̄г нупыл лāви ке, таи тāратаве; ос хотъют Ялпыӈ Лылы нупыл матыр лю̄ль лāтыӈ ке лāви, таи ань ты йисыт ат тāратаве, э̄лаль ōлнэ йисыт ос ат тāратаве тах”.
33 ”Манос йӣв ёмас – тав пиланэ ос ёмасыг ōлэ̄гыт; манос йӣв лю̄ль, тав пиланэ ос лю̄лиг ōлэ̄гыт; йӣв яныгман пиланэ сирыл лāваве, ёмас ман лю̄ль.34 Ялпыӈӯйныл тэ̄лум утыт! Хумус нāн, кантыӈ утыт, ёмас вāрмаль урыл потыртаӈкве вēрмегы̄н? Мāныр сым кӣвырт ōньси, та урыл сӯп-нēлм та потырты.35 Ёмас хōтпа такви сымēныл ёмасэ мы̄г, ос кантыӈ хōтпа такви сымēныл кантэ мы̄г.36 Ос ам нāнанн ты лāвēгум: кāсыӈ наскāссыг лāвум лāтӈе мāгыс э̄лумхōлас тах сутытан хōталыт ювле-лāваве:37 тах наӈти лāтӈаныныл наӈ вēськатыг лāвавēн, манос наӈти лāтӈаныныл сутытавен”.
38 Тōнт тōва Саккон ханисьтан хумит ос фарисейт лāвсыт: ”Ханисьтан хум! Мāн Наӈыныл матыр хӯлтхатнэ пос кāсалаӈкве тахсув кос”.39 Тав ювле-лāвыс: ”Лю̄ль ос Тōрумн ат хӯнтлын ань ōлнэ мāхум хӯлтхатнэ пōс кинсэ̄гыт, Тōрум лāтыӈ тотнэ Иона хӯлтхатнэ пōсэ коны-пāл нэ̄матыр пōсыл тах ат мивет;40 Хумус Иона кит кӣвырт хӯрум хōтал ос хӯрум э̄т ōлыс, тасир ос Э̄лумхōлас Пы̄г мā сым кӣвырт хӯрум хōтал ос хӯрум э̄т ōлы тах.41 Ниневи мāхум сутытан хōталыт аньйис ōлнэ мир ёт нōх-лю̄лēгыт. Тāн Иона ханисьтап хӯлсыт ос Тōрум нупыл ё̄хсыт. Ам тай Ионаныл яныгнуве!42 Алы мā хōн-нэ̄ сутытан хōталыт аньйис мāхум ёт нōх-лю̄ли ос тāнаныл сутытыянэ тах. Тав май мōтпал мā ерныл Соломон мутрат хӯнтлуӈкве ёхталас. Ос Ам Соломонныл яныгнуве!”
43 ”Хунь куль э̄лумхōласныл кон квāлы, тав виттāл мāт хосыт яласы ос ӯсьлахтын мā кос кинсы, ос ат та хōнты.44 Тōнт тав лāви: ‘Ювле, амти колумн минэ̄гум, хотыл ам кон-квāлсум’. Ос ёхтумēт, сунсы, колэ нэ̄мхотъютын ат сялтым, хосгим ос хот-сё̄питым ōлы.45 Тōнт мины ос ёт сāт мōт лылы вы̄г, таквинāтэныл усьпылнэ̄г кантыӈыт, сялтэ̄гыт ос тот ōлэ̄гыт; та э̄лумхōлас мāгыс юи-ōвыл вāрмаль лю̄льнуве ōвылтыт ōлум вāрмалил. Тох паты тах ты аньйис ōлнэ кантыӈ мāхум ёт”.
46 Хунь Тав мирн потыртас, Ся̄не ос Тав āпсиянэ кон-лю̄льсыт, Тав ётэ потыртаӈкве тахсыт.47 Хотъют тай Тавēн лāвыс: ”Танай, Наӈ Ся̄нин ос āпсиянын кон-лю̄лēгыт, Наӈ ётын потрамаӈкве таӈхēгыт”.48 Тав ты лāвум хōтпа нупыл ля̄галас: ”Хотъют Ам ся̄нюм, ос хотъют Ам āпсиянум?”49 Ос Такви кāтэтыл ханисьтахтын хумиянэ нупыл хӯлтым лāвыс: ”Тытты Ам ся̄нюм ос Ам ягпыганум.50 Хотъют Ам Āсюм лāтыӈ сирыл ōлы, таи Ам ягпыгум ос ягāгим, ос ся̄нюм та”.
Глава 12