1Davidan psalmu. Sinuu kirrun, Ižändy. Sinä olet minun lujus. Älä ole vaikkani, konzu pagizen Sinunke! Gu et vastanne, minä kuolen. 2 Kuule minun malitut, konzu kirrun Sinuu abuh, konzu nostan käit Sinun pyhäkodih päi. 3 Älä hävitä minuu jumalattomienke da viäryönluadijoinke, kuduat lähimäzienke paistah rauhan paginoi, a syväimes heil on pahus. 4 Anna heile heijän ruadoloi myö, heijän viharuadoloin mugah. Heijän käzil ruatun mugah tazua heile, anna heile se, mi maksau andua. 5 Hyö ei kačota Ižändän ruadoloih, ei kačota Hänen käzil luajittuh. Sikse Häi hävittäy heidy, ei anna heile enämbiä nosta. 6 Kiitetty olgah Ižändy! Häi kuuli minun malitut. 7 Ižändy on minun vägi da suojusraudu, Häneh minä uskoin i sain avun. Sendäh minun syväin on täyzi hyviä mieldy, minä ylendän Ižändiä minun pajol. 8 Ižändy on Oman rahvahan vägi, Häi on Oman voijeltun abu da suoju. 9 Piästä pahas Omua rahvastu, hyvitä Sinun omii, kačo da vardoiče heidy ilmazenijän.
с русским текстом