Библия
Выбрать язык
Книги Ветхого Завета
Книги Нового Завета
с русским текстом
ЕКЛЕСИАСТЛОН НЕБОГ
Глава 12
1 Том кадӧ ассит Аркмӧтісьтӧ эн вунӧт.
Бӧрынжык эд сьӧкыт луннэз да воэз локтасӧ.
Сэк тэ шуан: «Пӧрисьувья ола́ныс менӧ оз ни гажӧт».
2 Сэк шонді, тӧлісь да кӧдзу́ввез
тэныт югытсӧ озӧ ни сетӧ,
а зэр бӧрын бӧра кымӧр кайӧ
*а.
3 Сія кадӧ керку сьӧрын видзӧтіссез пондасӧ зэгсьыны,
вынаэз кусіньтчасӧ,
изіссез дугдасӧ изны,
етша кольччасӧ да.
Ӧшынӧ видзӧтіссез дугдасӧ адззыны,
4 ӧтӧрӧ пета́н ыбӧссэз пӧднассясӧ,
изыннэзлӧн шыыс оз понды кывны,
нывкаэзлӧн сьылӧ́мыс оз понды горавны,
нельки кайезлӧн дзульзьӧ́мыс онтӧ пальӧтас.
5 Сэк вылынжыка кайӧ́мсянь полӧ́м кутас,
туйыс пондас ӧддьӧн повзьӧтны.
Миндаль пу пондас дзоридза́сьны,
кӧбылка лоас сьӧкыт,
каперс вынсӧ ӧштас.
Мортыс мунӧ кулӧммез дынӧ,
и герьясиссез мунӧны туйез кузя.
6 Сійӧн томувья ассит Аркмӧтісьтӧ эн вунӧт,
кытчӧдз эзы́сь гасникыт эз на ор,
зарни дозыт эз на пот,
гумышта́н гырничыт ва петанін дорас эз на жугав,
ва лэбта́н гӧгыльыт
*б юкмӧсас эз на усь.
7 Муись керӧм вывты́рыт бертас муӧ,
а лолыт мунас Ен дынӧ, Кӧда сійӧ сетіс.
8 Весись, быдӧс весись,
─ шуис мывкыда велӧтісь.
Медбӧрья кыввез
9 Велӧтісьыс вӧлі мывкыда мортӧн, сія уна тӧдіс и отирсӧ сэтчӧ велӧтіс. Сія уна мый видзӧтіс-тӧдмаліс да гижис уна велӧта́н висьталӧ́м.10 Велӧтісь кошшис бур да басӧк висьталӧ́ммез, и веськыта гижис быльсӧ.
11 Мывкыда отирлӧн висьталӧ́ммезныс ─
лэчыт йыла зор кодьӧсь,
бура пыра́н кӧрттув кодьӧсь.
Нійӧ висьталіс ӧтік баля видзӧтісь*в.
12 Зонӧ, видз тӧдвылат:
небӧггесӧ гижны позьӧ орӧттӧг,
и уна лыддьӧтӧ́мыс мыдзӧтӧ.
13 Быдӧсын, мый тэ кылін, медколанаыс то мый:
Енісь пов да ов Сылӧн тшӧктӧ́ммез сьӧрті.
Сія висьталӧ́мын быдӧс эм, мый мортлӧ колӧ.
14 Еныс эд быд мортӧс вайӧтас суд вылӧ
сылӧн керӧ́ммез понда: бурӧсь нія, умӧльӧсь я,
да и сы понда, мый гусьӧн вӧлі керӧм.
*а 12:2 12:2-6 торын гижӧм пӧрись морт йылісь.
*б 12:6 гӧгыль ─ колесо
*в 12:11 баля видзӧтісь ─ Сідз шувлісӧ отирлісь ӧксуӧс.
Глава 12
