Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 4
Мывкыда туй вылӧ туйдӧтӧ́м
1 Челядь, кывзӧ айнытлісь велӧтӧ́мсӧ,
босьтӧ сійӧ юраныт, медбы вежӧрсявны.
2 Ме тіянӧс бурас велӧта.
Менчим тшӧктӧ́ммезӧс эд вунӧтӧ.
3 И ме вӧлі учӧт зонӧн айӧлӧн да мамӧлӧн.
Нія менӧ ӧддьӧн радейтісӧ.
4 Айӧ велӧтіс менӧ сэтшӧм кыввезӧн:
«Менам кыввезӧ сьӧлӧмат ась йиджӧны,
видз нійӧ тӧдвылат,
сэк тэ пондан бура овны.
5 Ӧкты мывкыдтӧ, ӧкты вежӧртӧ.
Менчим кыввезӧс эн вунӧт,
велӧтӧ́мсим мӧдӧрӧ эн кеж.
6 Мывкыдсӧ эн чапкы, и сія тэнӧ дорьяс.
Радейт сійӧ, и сія тэнӧ видзас.
7 Медколанаыс ола́нын ─ мывкыд.
Ӧкты мывкыдсӧ.
Пажытьтӧ быдӧс сет, медбы вежӧрсявны.
8 Мывкыдсӧ пукты меддона торӧ,
и сія тэнӧ лэбтас.
Лякасян кӧ сы бердӧ,
сія ошкӧ́м тэныт ваяс.
9 Басӧк юркытш сія юр вылат пуктас,
югьяла́н юркытш сія тэныт ваяс».
10 Зонӧ, кывзы менӧ,
босьт менчим кыввезӧс,
и тэнат ола́ныт нюжалас.
11 Ме тэнӧ мывкыда туй вылӧ туйдӧта,
веськыт туй вылӧт нуӧта.
12 Мунтӧннят тэнӧ нем оз падмӧт,
котӧртікат он чужйись.
13 Ов велӧтӧ́мӧ сьӧрті, сійӧ эн вунӧт.
Менчим кыввезӧс тӧдвылат видз,
нія эд отсаласӧ тэныт бура овны.
14 Ентӧг оліссезлӧн туй вылӧ эн сувт,
умӧль кериссезлӧн туй вылӧт эн ветлӧт.
15 Ылӧ коль нылісь туйсӧ,
эн мун сы вылӧт.
Орддьы сійӧ да мун одзлань.
16 Умӧльсӧ кериссез и онмӧссьыны озӧ вермӧ,
озӧ кӧ керӧ умӧльсӧ.
Нылӧн онныс ӧшӧ,
озӧ кӧ вайӧтӧ кинӧскӧ усьӧ́мӧдз.
17 Умӧльсӧ керӧ́мныс нылӧ нянь туйӧ,
лёка дзескӧтлӧ́мныс ─ вина туйӧ.
18 Веськыта оліссезлӧн туйыс кыдз асъяпонся югыт,
кӧда луншӧрӧдз лоӧ югытжык и югытжык.
19 Умӧльсӧ кериссезлӧн туйыс са пемытын.
Нія озӧ тӧдӧ, мый бердӧ чужйисясӧ.
20 Зонӧ, кывзы менчим висьталӧ́мӧс,
пель саят каттьы баитӧ́мӧс.
21 Кыввезӧс син одзсит эн ӧшты,
нійӧ пыр видз сьӧлӧм пытшкат.
22 Кин велӧтӧ́мӧс кошшис да адззис,
сія сылӧ ола́н сетӧ,
а быдсӧн вывты́рлӧ ─ шогавтӧг видзсьӧ́м.
23 Медбура видз ассит сьӧлӧмтӧ,
сэтісь эд ола́ныс визывтӧ.
24 Бӧбӧтчӧ́мыс ась оз пет тэнат ӧмись,
ылӧтлӧ́мсӧ ылӧжык вешты.
25 Тэнат синнэт ась веськыта видзӧтӧны,
юртӧ лэбтӧмӧн одзлань нёджжӧвт.
26 Бура видзӧт, кытшӧм туй кузя мунны.
Оськӧввет ась лоӧны чорытӧсь.
27 Не веськытланьӧ, не шульгаланьӧ эн кежлась,
эн оськӧвт керны умӧльсӧ.
28 [Веськыт туйез сьӧрын Дӧсвидзись видзӧтӧ,
а чукыля туйез абу Сы сьӧрті.
29 Тэнчит туйетӧ Сія веськӧтас,
Сы отсӧтӧн тэ повтӧг верман ветлӧтны.]
Глава 4
