Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
85 Псалом
Давидлӧн кеймӧ́м.1 Дӧсвидзисьӧ,
бергӧт меланьӧ пельтӧ
да кыв менӧ.
Шудтӧм ме морт,
менам эд нем абу.
2 Эн лэдз босьтны менчим лолӧс,
ме эд Тэнат надейнӧй морт.
Менам Енӧ, мезды менӧ, Ассит рабтӧ!
Ме эд Тэ вылӧ надейтча.
3 Дӧсвидзисьӧ,
ло ме дынӧ небыт сьӧлӧма,
ме быд лун Тэныт горӧн кеймися.
4 Дӧсвидзисьӧ,
гажӧт Ассит рабтӧ,
ассим сьӧлӧмӧс ме Тэныт осьта.
5 Дӧсвидзисьӧ,
Тэ бур да небыт сьӧлӧма.
Тэ ӧддьӧн радейтан быдӧннысӧ,
кӧдна Тэнӧ корӧны отсавны.
6 Дӧсвидзисьӧ,
кыв менчим кеймӧ́мӧс,
кывзы менчим кеймисьӧ́мӧс.
7 Сьӧкыт кадӧ ме Тэныт горӧн кеймися,
Тэ эд менӧ кылан.
8 Дӧсвидзисьӧ,
еннэз коласын абу Тэ кодьыс,
и Тэнат кодь керӧ́ммес абуӧсь.
9 Дӧсвидзисьӧ,
Тэ аркмӧтін быд отирсӧ.
Нія быдӧнныс локтасӧ,
Тэныт копыртчасӧ
Тэнчит нимтӧ сьылӧтасӧ.
10 Тэ вына,
керан адззы́влытӧммесӧ,
Еныс ─ Тэ,
Тэ кодьыс некин абу.
11 Дӧсвидзисьӧ,
велӧт менӧ Аслат туйезӧ,
и ме понда овны Тэнат быль сьӧрті.
Вынсьӧт менчим сьӧлӧмӧс,
медбы меным овны Тэнат нимись полӧмӧн.
12 Дӧсвидзисьӧ, менам Енӧ,
сьӧлӧмсянь понда буркы́втны Тэнӧ,
пыр понда ошкыны Тэнчит нимтӧ.
13 Тэнат небыт сьӧлӧмсянь керӧ́мыт ӧддьӧн ыджыт.
Тэ мездін менчим лолӧс пыдӧстӧминісь,
кулӧммезлӧн оланінісь.
14 Енӧ, асьнысӧ вылына пуктіссез лэбтісисӧ ме вылӧ.
Унася-уна зык лэбтіссез вӧтлісьӧны,
менчим лолӧс босьтны кошшӧны.
Нія Тэнӧ абутӧм туйӧ пуктӧны.
15 Но Тэ, Дӧсвидзись Енӧ, абу надз,
Тэ небыт сьӧлӧма, ыджыт мылаа,
небыт сьӧлӧмсянь Тэ ёна радейтан,
пыр веськыта керан.
16 Видзӧт ме вылӧ
да ло ме дынӧ небыт сьӧлӧма.
Аслат раблӧ сет вынтӧ,
инька-рабытлісь мезды зонсӧ.
17 Мыччав менам ола́нын Ассит бур сьӧлӧмтӧ.
Меным отсалӧ́мтӧ адззыласӧ да гӧрдӧтасӧ нія,
кӧдна ме вылӧ и синӧн озӧ вермӧ видзӧтны.
Дӧсвидзисьӧ, Тэ эд меным отсалін,
менӧ бурӧтін.
Глава 85
