Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
56 Псалом
1 Сьыліссезӧн веськӧтлісьлӧ. Сьылӧны «Эн разь*а» сьыланкы́влӧн проглаз сьӧрті. Давидыс сійӧ гижис, кӧр пышшис Саул дынісь керӧс гыркӧ*б.2 Енӧ, ло ме дынӧ небыт сьӧлӧма,
жалейт менӧ,
ме эд Тэ вылӧ надейтча.
Ме дзебсися Тэнат борддэз увтӧ,
кытчӧдз оз чулав сьӧкыт кадыс.
3 Ме горӧн кеймися Медвылісь Енлӧ,
Кӧда керӧ быдӧс,
мый Сія ме понда лӧсьӧтіс.
4 Сія енӧжсянь меным отсӧтсӧ ыстас
да менӧ мездас.
Кӧдна ме сьӧрын вӧтлісьӧны лолӧс босьтны,
нійӧ рожа куля́нӧдз вайӧтас.
Еныс меным Ассис бурсетӧ́мсӧ да быльсӧ козьналас.
5 Ме ола леввез коласын,
биӧн лолалісь вӧрпаэз
*в коласын.
Ме ола сэтшӧм отир коласын,
кӧдналӧн пиннезныс шыэз
*г да ньӧвьёссез,
нылӧн кывныс ─ лэчыт шыпурт
*д.
6 Енӧ, Тэнӧ лэбтӧ́м-ошкӧ́мыс
енӧжжезся вылынжыка ась горалӧ!
Тэнат югьялӧ́мыт му пасьта ась тыдалӧ!
7 Менам коккезлӧ нія кыйся́н лӧсьӧтісӧ.
Сьӧлӧм вылам лоис ӧддьӧн сьӧкыт.
Нія меным яма гарйисӧ
да асьныс сэтчӧ усисӧ.
8 Енӧ, менам сьӧлӧмӧ лӧсьӧтчис ни,
сьӧлӧмӧ лӧсьӧтчис ни
Тэнӧ сьылӧтны да ошкыны.
9 Mенам лолӧ, саймы!
Саймӧ, сиа орса́ннэз: арфа да гусли!
Ме чечча асъяпоннас.
10 Дӧсвидзисьӧ,
ме понда ошкыны Тэнӧ отиррез коласын,
понда сьылӧтны Тэнӧ
быд кыв вылын баитісь йӧзын.
11 Тэнат небыт сьӧлӧмсянь керӧ́мыт
енӧжжезся вылынжык,
Тэнат быльыт кымӧррезӧдз.
12 Енӧ, Тэнӧ лэбтӧ́м-ошкӧ́мыс
енӧжжезся вылынжыка ась горалӧ!
Тэнат югьялӧ́мыт му пасьта ась тыдалӧ!
*а 56:1 разьны ─ уничтожать
*б 56:1 керӧс гырк ─ пещера
*в 56:5 вӧрпа ─ зверь
*г 56:5 шы ─ копьё
*д 56:5 шыпурт ─ меч
Глава 56
