Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
21 Псалом
1 Сьыліссезӧн веськӧтлісьлӧ. Шонді петікӧ сьылӧ́м. Давидлӧн псалом.2 Енӧ, менам Енӧ! [Кыв менӧ!]
Мыля Тэ менӧ колин?
Ме герьясьӧмӧн кеймися,
медбы Тэ менӧ мездін,
но Тэ ме дынісь ылӧ вешшин.
3 Менам Енӧ!
Ме луннас Тэныт горӧн кеймися,
но Тэ меным шы он сет.
Ойнас горӧта,
но менӧ лич оз лэдз
*а.
4 Тэ Вежа,
Тэ пукалан юрала́н пукӧ́с
*б вылын,
Израиль отирлӧн сьылӧтӧ́м-ошкӧ́мыс Тэнӧ кытшӧвтӧ.
5 Айезным отсӧтсӧ Тэсянь видзчисьлісӧ,
Тэ вылӧ надейтчисӧ,
и Тэ нійӧ мездывлін.
6 Нія Тэныт горӧн кеймисисӧ,
и Тэ нійӧ мездін.
Нія Тэ вылӧ надейтчисӧ,
и нылӧ эз ковсьы гӧрдӧтны
*в.
7 Но ме гаг, абу морт.
Отирыс менӧ умӧльтӧны,
абутӧм туйӧ пуктӧны.
8 Быдӧнныс, кин адззӧны менӧ,
ме вылын сералӧны.
Юрнаныс гогиня́лӧмӧн шуӧны:
9 «Сія Дӧсвидзись вылӧ надейтчис,
ась Дӧсвидзисьыс и мездӧ сійӧ,
Еныслӧ кӧ сія сьӧлӧмви».
10 Но Тэ менӧ петкӧтін мамӧ кынӧмись,
мамӧ морос бердсянь велӧтін надейтчыны Тэ вылӧ.
11 Шогмӧ́мсянь менӧ сетісӧ Тэнат киӧ,
мамӧ кынӧмсянь менам Енӧ ─ Тэ.
12 Енӧ, ме дынісь ылӧ эн мун,
умӧль лоӧ́мыс матын,
а отсасисьыс абу.
13 Пороззэс унася-унаӧсь ме гӧгӧрӧ чукӧртчисӧ,
Васанісь вына ӧшкаэз менӧ кытшӧвтісӧ.
14 Ме вылӧ горшнысӧ паськӧтісӧ
кыдз эрзісь леввез,
кӧдна уськӧтчӧны кинӧскӧ кутны.
15 Менам вынӧ ва моз визывтіс,
быдӧс лыэзӧ торьясисӧ.
Менам сьӧлӧмӧ лоис масісь кодь,
морос пытшкам сыліс.
16 Менам вынӧ бырис,
ме лои жугалӧм гырнич кодь.
Кылӧ ӧмам лякасис.
Тэ сетін менӧ кулӧ́млӧн
*г гыжжезӧ.
17 Менӧ поннэз кытшӧвтісӧ,
лёк отир ме гӧгӧрӧ ӧксисӧ,
киэзӧс, коккезӧс менчим бытшкалісӧ.
18 Менчим позьӧ лыэзӧс лыддьыны,
а отирыс тай ме вылӧ видзӧтӧны да сералӧны.
19 Ас коласаныс менчим паськӧмӧс янсӧтӧны,
кыскӧ́м сьӧрті
*д паськӧмӧс босьтӧны.
20 Дӧсвидзисьӧ, ме дынісь ылӧ эн мун,
менам вынӧ ─ Тэ.
Тэрмась меным отсавны!
21 Менчим лолӧс шыпурт увтісь кыскы,
поннэз ӧмись менчим ола́нӧс мезды!
22 Мезды менӧ лев аннэзісь
да ӧшка сюррезісь!
Кыв менӧ да мезды!
23 Тэнат ним йылісь понда висьтасьны воннэзӧлӧ,
Тэнат ӧксьӧм отир одзын понда ошкыны Тэнӧ.
24 Дӧсвидзисись поліссез, ошкӧ Сійӧ!
Яков увтыр, сьылӧтӧ Сійӧ!
Быдӧс Израиль увтыр,
кывзісьӧ-полӧ Сыись!
25 Дӧсвидзисьыс эд эз вашӧт пессись-мырсисьсӧ,
сылісь сьӧлӧм шогсӧ эз пукты абутӧм туйӧ.
Сія эз сайӧвт сы шогья Ассис чужӧ́мсӧ,
сылісь отсӧт корӧ́мсӧ Сія кыліс.
26 Тэнат уна ӧксьӧм отир одзын ме ошка Тэнӧ.
Тэись поліссез одзын кера кӧсйисьӧ́мӧ сьӧрті.
27 Кинлӧн нем абу, нія пондасӧ сёйны пӧттӧдз.
Дӧсвидзисьсӧ кошшиссес пондасӧ ошкыны Сійӧ.
Еныс ась сетас тіянлӧ кузь да бур ола́н!
28 Му вывсис быд пельӧсокись отирыс
Дӧсвидзисьсӧ тӧдвыланыс уськӧтасӧ
да Сыланьӧ бергӧтчасӧ.
Сылӧ копыртчас быд кыв вылын баитісь йӧз.
29 Дӧсвидзисьыс ─ Ӧксу,
Сія отиррез вылын Юралісь.
30 Му вылын бура оліссез да юраліссез
пондасӧ копрасьны дзир Сылӧ.
Сылӧ копыртчасӧ быдӧнныс,
кӧдна кулӧны да бусӧ пӧртчӧны,
кӧдна озӧ вермӧ нюжӧтны ассиныс ола́нсӧ.
31 Менам увтырӧ пыр пондас Сылӧ кысъявны
*е.
Нійӧ пыр пондасӧ шуны Дӧсвидзисьлӧн отирӧн.
32 Нія локтасӧ да пондасӧ висьтасьны отирлӧ
Сылӧн веськыта керӧ́ммез йылісь,
сёрӧнжык шогмӧммезлӧ висьтасясӧ
Дӧсвидзисьлӧн аркмӧтӧ́ммез йылісь.
*а 21:3 лич оз лэдз ─ нет облегчения
*б 21:4 юрала́н пукӧ́с ─ престол
*в 21:6 гӧрдӧтны ─ постыдиться
*г 21:16 кулӧ́м ─ смерть
*д 21:19 кыскӧ́м сьӧрті ─ по жребию
*е 21:31 кысъявны ─ служить
Глава 21
