Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
15 Псалом
Давидлӧн сьыланкы́в.1 Енӧ, видз менӧ,
ме эд Тэ вылӧ надейтча.
2 Дӧсвидзисьлӧ ме висьталі:
«Тэ ─ менам Дӧсвидзись,
Тэныт месянь нем оз ков».
3 Менӧ сьӧлӧмӧ кыскӧ му вылісь вежа отир
*а дынӧ,
Тэнат отир вылӧ видзӧттӧн диво кутӧ.
4 Сьӧлӧм шогныс ась содӧ нылӧн,
кӧдна мунӧны мӧдік еннэз дынӧ.
Ны еннэзлӧ езъяла́н козинӧн
ме некӧр ог кисьт пода вир.
Ны еннэзлісь нельки ниммесӧ ме ог шу аслам ӧмӧн.
5 Дӧсвидзисьӧ,
менам медбур пайӧ ─ Тэ,
Тэ менчим дозӧс тыртін.
Менам ола́нӧ Тэнат киын.
6 Меным дӧнзис медбур му,
менам пайӧ сьӧлӧмӧс гажӧтӧ.
7 Ошка Дӧсвидзисьсӧ!
Сія менӧ туйдӧтӧ.
Сылісь велӧтӧ́мсӧ сьӧлӧмам
ме нельки ойнас кыла.
8 Одзсим ме пыр адзза Дӧсвидзисьсӧ,
Сія веськыт ладорам,
и ме ог усь.
9 Сысянь гажмис менам сьӧлӧмӧ,
кыв вывсим гажӧтча́н кыввез петӧны.
Нельки вывты́рӧ лӧньсьӧ,
Тэ вылӧ надейтчӧ да.
10 Тэ эд он коль менчим лолӧс кулӧммез коласын,
Ассит вежатӧ он коль сісьмыны.
11 Тэ меным мыччалін ола́н туйӧс.
Тэ одзын менам гажӧ сьӧлӧмтыр.
Менам шудӧ ─ лоны веськыт ладорат,
Тэ дынын матын пырся-пыр.
*а 15:3 вежа отир ─ Енлӧ веритісь отир
Глава 15
