Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
103 Псалом
[Му аркмӧтӧ́м йылісь Давидлӧн псалом.]1 Ошкы Дӧсвидзисьсӧ, менам лолӧ!
Дӧсвидзисьӧ, менам Енӧ,
Тэ сэтшӧм вына, диво кутӧ!
Тэ кытшӧвтӧм югьялӧ́мӧн да юрала́н вынӧн.
2 Тэ Асьтӧ кыдз паськӧмӧн югытнас вевттян,
енӧжжесӧ ӧн моз паськӧтан.
3 Енӧжас Аслыт оланiнсӧ ваэз весьтын лӧсьӧтан,
кымӧррезісь Аслыт колесницаэз керан,
тӧв борддэз вылын ветлӧтан.
4 Ассит ангеллэтӧ Тэ керан тӧввезӧн,
Ассит уджаліссетӧ ─ ӧграла́н биӧн.
5 Мусӧ Тэ ён увт вылӧ сувтӧтін.
Сія некӧр оз вӧрзьы.
6 Пыдӧстӧм ванас сійӧ кыдз паськӧмӧн вевттин,
нельки керӧс йыввез вӧлісӧ ва пытшкын.
7 Тэнат ӧлӧ́мсянь ваэз пышшисӧ,
Тэнат горӧн гымалӧ́мсянь нiя чожа мунiсӧ.
8 Ваэз керӧссэз вылӧдз кайлісӧ,
сэсся лажмытіннэзӧ визывтісӧ.
Нія визывтісӧ сэтчӧ,
кытчӧ Тэ нылӧ лӧсьӧтін.
9 Тэ ваэсӧ йӧртін,
и сэтісь нiя озӧ петӧ,
мусӧ вевттьыны озӧ бертӧ.
10 Лажмытіннэзас Тэ лӧсьӧтін ва петаніннэз,
керӧссэз коласӧт визывтӧны ваэз.
11 Нiя юкталӧны му вылісь вӧрпаэсӧ быдӧннысӧ,
сэтӧн вӧрись осёллэз веськӧтӧны горшнысӧ.
12 Ва дорас енӧжись кайез поздiсьӧны,
уввез коласын дзульзьӧны.
13 Вылісянь Тэ Ачыт юкталан керӧссэсӧ,
Тэнат киӧн сетӧ́ммезсянь муыс пӧтӧ.
14 Подалӧ Тэ быдтан турун,
мортлӧ ─ быдкодь быдмас,
медбы му вылын быдмӧ́мись керны сёя́н:
15 вина, кӧда мортлісь сьӧлӧм гажӧтӧ,
ви, кӧдасянь сылӧн чужӧ́м мичамӧ,
нянь, кӧда вывты́р вынсьӧтӧ.
16 Ливанісь сыспуэз, Дӧсвидзисьлӧн пуэз,
кӧднӧ Сія садитіс,
васӧ пӧттӧдз юӧны.
17 Ны вылын кайез поздiсьӧны,
кӧззэз вылын аисттэз поздiсьӧны.
18 Вылын керӧссэз сетӧмась кӧррезлӧ
*а,
из керӧссэзын даманнэз
*б сайласьӧны.
19 Тэ аркмӧтін тӧлісьсӧ, медбы мыччавны кадсӧ.
Шонді тӧдӧ рытланьӧ лэдзча́н кадсӧ.
20 Тэ паськӧтан пемытсӧ, и локтӧ ой.
Ойнас вӧрпаэз петӧны ветлӧтны.
21 Леввез эрзӧны,
кинӧскӧ кутны кошшӧны,
Енлісь сёя́н корӧны.
22 Шонді петікӧ нiя ӧтлаӧ ӧксьӧны,
асланыс позӧ водӧны.
23 Асылӧн морт уджавны петӧ,
Ассис уджсӧ рытӧдз керӧ.
24 Дӧсвидзисьӧ,
кытшӧм уна Тэнат керӧ́ммет!
Тэ быдӧс керин ыджыт мывкыдӧн.
Муыс тыра Тэнат керӧ́ммезӧн.
25 То, дортӧм ыджыт саридз!
Сэтісь оліссесӧ лыддьыны он вермы.
Нiя и ыджытӧсь, и учӧтӧсь.
26 Сэті уялӧны корабллез,
Сэтчин левиафа́н,
кӧдӧ Тэ аркмӧтін сэтчин орсны.
27 Тэнат аркмӧтӧ́ммес видзчисьӧны,
медбы Тэ аскадӧ сетін нылӧ сёя́н.
28 Тэ сетан нылӧ, и нiя босьтӧны,
осьтан Ассит китӧ, нiя пӧттӧдз сёйӧны.
29 Тэ сайӧвтан Ассит чужӧ́мтӧ,
и нiя тӧждӧны.
Босьтан нылісь ловсӧ,
нiя кулӧны и бӧр муӧ пӧртчӧны.
30 Тэ ыстан Ассит Ловтӧ,
и нiя аркмӧны.
Сідз Тэ мулісь чужӧ́мсӧ вильмӧтан.
31 Дӧсвидзисьлӧн югьяла́н выныс
ась пырся-пыр тыдалӧ!
Дӧсвидзись Аслас керӧ́ммезсянь ась гажӧтчӧ!
32 Сія видзӧтӧ му вылас, и муыс зэгалӧ,
павкӧтчас керӧс бердӧ, и сія тшынӧтӧ.
33 Олікам пыр понда сьывны Дӧсвидзисьлӧ,
понда сьывны Енӧлӧ, кытчӧдз ловья.
34 Менам сьылӧ́мӧ Сылӧ ась лоӧ сьӧлӧмви.
Ме понда гажӧтчыны-сьывны Дӧсвидзись йылісь.
35 Умӧльсӧ кериссез му вывсис ась ӧшӧны,
Туйдӧ́ттӧг оліссез ась озӧ лоӧ.
Ошкы Дӧсвидзисьсӧ, менам лолӧ!
Аллилуйя
*в!
Ошкӧ́м.
*а 103:18 кӧр ─ олень
*б 103:18 даман ─ кӧч ыжда вӧрпа, олӧ Израиль керӧссэзын
*в 103:35 «Аллилуйя» кывсӧ позьӧ вуджӧтны «ошкӧ Дӧсвидзисьсӧ!»
Глава 103
