Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
102 Псалом
Давидлӧн псалом.1 Менам лолӧ, ошкы Дӧсвидзисьсӧ!
Быдсӧн пытшкӧ, ошкы Сылісь вежа нимсӧ!
2 Менам лолӧ, ошкы Дӧсвидзисьсӧ
да эн вунӧт Сылісь быдӧс бур керӧ́ммесӧ.
3 Сія проститӧ тэнчит быд умӧль керӧ́м,
Тэнчит шогӧттэтӧ веськӧтӧ,
4 ола́нтӧ шойнаись мездӧ.
Небыт сьӧлӧмсянь отсасьӧ́мнас
да бурсетӧ́мнас тэнӧ кытшӧвтӧ.
5 Тэнчит ола́нтӧ бурнас тыртӧ.
Тэнат том кадыт вильмӧ,
тэ лоан кутш
*а кодь вына.
6 Дӧсвидзись веськыта керӧ,
дзескӧтӧммесӧ Сія дорйӧ.
7 Моисейлӧ Сія мыччаліс Ассис туйесӧ,
Израиль отирлӧ ─ Ассис керӧ́ммесӧ.
8 Дӧсвидзисьыс небыт сьӧлӧма да ёна радейтісь,
ыджыт мылаа да ӧддьӧн жалейтісь.
9 Сія оз лӧгав медбӧрӧдз,
Ассис лӧгсӧ пыр оз видз.
10 Умӧль керӧ́мным сьӧрті Сія миянлӧ оз вешты,
лёк керӧ́мным сьӧрті миянлӧ оз сет.
11 Мый вылына енӧжыс му дынсянь,
сэтшӧм ыджыт
[Дӧсвидзисьлӧн] небыт сьӧлӧмсянь керӧ́мыс
Сыись поліссезлӧ.
12 Мый ылына шонді пета́ныс шонді пукся́нсянь,
сы ылынаӧ Сія чапкис умӧль керӧ́ммезнымӧс.
13 Кыдз ай радейтӧ ассис челядьсӧ,
сідз Дӧсвидзись радейтӧ Сыись поліссесӧ.
14 Сія эд тӧдӧ, мыйись мийӧ керӧмӧсь,
видзӧ тӧдвылас: мийӧ ─ дзир бус.
15 Мортлӧн ола́н луннэс кыдз турун,
сія дзоридза́сьӧ ыб вылісь дзоридз моз.
16 Сы весьтӧт пӧльтыштас тӧв,
и сія абу ни.
Некин ни оз тӧд, кытӧн сія оліс.
17 Дӧсвидзись Сыись поліссез дынӧ
пыр небыт сьӧлӧма.
18 Кӧдна Сыкӧт керӧм йитӧ́тсӧ озӧ вунӧтлӧ,
Сылісь тшӧктӧ́ммесӧ тӧдвыланыс видзӧны,
медбы ны сьӧрті овны,
нылӧ Дӧсвидзисьыс веськыта керӧ.
Сылӧн веськыта керӧ́мыс
ны челядьлӧн челядьлӧ вуджӧ.
19 Дӧсвидзись Ассис юрала́н пукӧ́ссӧ енӧжас сувтӧтіс.
Сія быдӧнныс вылын юралӧ.
20 Ошкӧ Дӧсвидзисьсӧ,
вына ангеллэз [быдӧнныт],
Сылӧн тшӧктӧ́м сьӧрті кериссез,
Сылісь висьталӧ́мсӧ кывзiссез.
21 Ошкӧ Дӧсвидзисьсӧ,
Сылӧн енӧжись тышкася́н выннэз,
Сылӧн кысъяліссез
*б быдӧнныт,
Сы тшӧктӧ́м сьӧрті кериссез!
22 Ошкӧ Дӧсвидзисьсӧ,
Сылӧн быдӧс керӧ́ммез!
Ошкӧ Сійӧ быдлаын, кытӧн Сія юралӧ!
Ошкы Дӧсвидзисьсӧ, менам лолӧ!
Ошкӧ́м.
*а 102:5 102:5 кутш ─ орёл
*б 102:21 102:21 кысъялісь ─ слуга, служанка
Глава 102
