Лука врач гожтэ: «Ми Риме вуэм бере, сю солдатэн кивалтӥсь жильыетын пукисьёсты ожйырлэн ки улаз сётӥз, нош Павеллы нимаз, сое возьмась солдатэн ӵош, улыны лэземын вал. Куинь нунал ортчыса, Павел иудейёс пӧлысь нимо-дано адямиосты ӧтчаз. Тупатэм нуналэ туж трос муртъёс со доры лыктӥзы. Ӵукнаысен ӝытозь Павел Инмар Эксэйлык сярысь вераса улӥз, Моисей законысь но пророкъёслэсь Иисус сярысь ивортэмзэс тодытыса, соосты оскытыны тыршиз. Одӥгъёсыз солэн кылъёсызлы оскизы, нош мукетъёсыз – ӧз оске. Куспазы огкыл шедьтымтэен сэрен, соос кошкыны дасясько вал ини, но соку Павел та кылъёсты вераз: «Исаия пророк пыр Святой Дух асьмелэн атайёсмылы умой вераз: “Мын та калык доры но шу: пельыныды кылоды но, уд валалэ; синмыныды учкоды но, уд адӟе, – уго та калыклэн сюлмыз чурытомиз, пельынызы но мырдэм кыло, синъёссэс но кыниллям; синъёсынызы уз адӟе, пельёсынызы уз кылэ, сюлмынызы уз валалэ, Мон соосты мед бурмытом шуыса уз но берытске“ (Ис. 6:9-10). Озьыен, тӥледлы тодмо мед луоз: Инмарлэн утиськонэз мукет калыкъёслы ыстэмын – верам кылэз соос кабыл басьтозы». Со тае верам бере, иудейёс куспазы юн ченгешыса кошкизы.
Кык ар ӵоже Павел одӥг коркан улӥз, со понна ачиз коньдон тыриз. Ваньзэс дораз лыктӥсьёсты со ӟеч мылкыдын пумиталляз, Инмар Эксэйлык сярысь тодытылӥз, Кузё-Инмар Иисус Христос сярысь кышкатэк, дугдылытэк дышетылӥз».
Та кылъёсын “Апостолъёслэн ужъёссы“ книга йылпумъяське.Лыдӟисьёслэн тодэмзы потэ, дыр, мар луиз азьланяз Павел апостолэн. Библиын та сярысь шонерак верамын ӧвӧл. Калык веранъя, Павел апостол курадӟытыса виемын вал христиан калыкез ӝикатыса-ёртыса возись Рим кунлэн шимес лек Нерон эксэез дыръя.
486 
