Bible Stories
Выбрать язык
Choose Old Testament Story
Choose New Testament Story
САВЛ ДАМАСКЫСЬ ПЕГӞЕ
Савллэсь веранъёссэ кылӥсьёс паймыса шуизы: «Та самой со ӧвӧла, кудӥз Иерусалимын та Нимлы вазиськисьёсты быдтыны тыршиз? Татчы но со ӧза лыкты, соосты думылыса архиерейёс доры нуон понна?» Нош Савл кужмогес но кужмогес тодытыны кутскиз. Дамаскын улӥсь иудейёсты со куалекъятӥз Иисус Христос – Утись луэ шуыса дышетэменыз.
Кӧня ке но дыр ортчем бере, иудейёс сое виыны вераськизы. Но соослэсь та урод малпанзэс Савл тодӥз. Иудейёс уй но нунал, сое виён понна, кар капкаос доры возьмаськисьёсты пуктылӥзы. Соин ик дышетскисьёсыз сое уин корзинае пуктыса, борддор кузя васькытӥзы. Озьы, Дамаскысь пегӟыса, Савл Иерусалиме вуиз. Татысен со тыршиз вал Иисуслэн дышетскисьёсыз борды кариськыны, но соос ваньзы, солэн дышетскись луэмезлы оскытэк, солэсь кышкаса улӥзы. Нош Варнава сое эш кариз но апостолъёс доры ваиз. Соослы со вераз, кызьы Савл сюрес вылысен Кузё-Инмарез адӟиз но, мар солы Кузё-Инмар вераз, кызьы со Дамаскын Иисуслэн нимыныз кышкатэк тодытӥз. Соку апостолъёс, быдэс черк сое асьсэ радэ кутӥзы. Бӧрысьгес сое Павел апостол шуыса нимазы. Та дырысен со вань улонзэ Христосэз тодытонлы сӥзиз, язычникъёслэсь дуннезэс югдытыса Инмар пала берыктыны кутскиз.
Пӧртэм городъёсысь черкъёслы Павел апостол трос гожтэтъёс ыстӥз. Со ыстэм гожтэмъёсыз Выль Сӥзёнэ пыртэмын. Одӥгаз гожтэтаз со шуэ: «Нош мар мон понна вылӥлыко-пайдалыко вал, Христосэз тодэм берам, ваньзэ сое жуг-жаг луэ шуыса лыдъяны кутски. Кузё-Инмаре Иисус Христос ваньмызлэсь вылӥ луэ шуыса тодэм берам, ваньзэ мукетсэ кулэтэмен лыдъясько...»
Апостолъёслэн ужъёссы 9:21-28; Филиппы карын улӥсьёслы ыстэм гожтэт 3:7-9
460 
