Bible Stories
Выбрать язык
Choose Old Testament Story
Choose New Testament Story
ХРИСТОС УЛӞЫСА СУЛТӤЗ!
Суббота ортчон уе музъем кужмо зурказ, Кузё-Инмарлэн кылчинэз (ангелэз) Инмысь васькыса, ӧс бордысь изэз палэнтӥз. Соку Иисус Христос Кузё-Инмар шайгуысь улӟыса султӥз!
Кылчинлэн тусбуез чилекъям кадь, нош дӥськутэз лымы кадь тӧдьы вал. Шайгуэз возьмась солдатъёс кышкаса погразы, кулэм мурт кадесь луизы. Султыса городэ мынӥзы но луэм учыр сярысь радызъя ваньзэ архиерейёслы веразы. Нош соос, тӧроосын валче люкаськыса, кенеш каризы, солдатъёслы трос коньдон сётӥзы но шуизы: «Вералэ, ми изьыку, Солэн дышетскисьёсыз уин лыктыса, Сое лушказы. Та сярысь ивор кивалтӥсь доры вуиз ке, ми сое оскытомы, тӥледыз но шугадӟонлэсь мозмытомы».
Ӟардон азьын Иоаннэн Иаков апостолъёслэн анайзы Саломия, покчи Иаковлэн но Иосиялэн анайзы Мария, озьы ик Магдалина Мария садэ лыктӥзы (отын шайгу-пещера интыяськемын вал). Соос Иисуслэсь Мугорзэ ческыт зыно вӧйын зыраны ӧдъяло вал. Шайгу доры вуыса, соос адӟизы: из палэнтэмын, нош со из туж бадӟым вал. Шайгуэ пырем беразы, юг-тӧдьы дӥськутэн кылчинэз адӟизы. Кышномуртъёс туж куалектӥзы, нош кылчин соослы шуиз: «Эн кышкалэ, мон тодӥсько, тӥ кортӵогам Иисусэз утчаськоды шуыса. Со татын ӧвӧл: кызьы вераз, Со улӟыса султӥз. Лыктэлэ, Кузё-Инмарлэсь кыллем интызэ учкелэ. Ӝоггес мынэлэ но, Со кулэмысь улӟыса султӥз шуыса, дышетскисьёсызлы вералэ...»
Кышномуртъёс, шайгуысь потыса, куалектыса, но туж шумпотыса, Христослэн кулэмысь улӟыса султэмез сярысь иворез дышетскисьёсызлы вераны бызьыса кошкизы.
Матфейлэсь Ӟеч Ивор 28:1-8; Марклэсь Ӟеч Ивор 16:1-7; Лукалэсь Ӟеч Ивор 24:1-7
428 
