Bible Stories
Выбрать язык
Choose Old Testament Story
Choose New Testament Story
ГУРЕЗЬ ЙЫЛЫН ТОДЫТОН:
ЯРАТОН СЯРЫСЬ, ВӦСЯСЬКОН СЯРЫСЬ
«Тӥляд кылэмды вань тазьы верамез: “Син понна син, пинь понна пинь“. Нош Мон тӥледлы верасько: эн пумитъяськы уродлы. Кин ке бур пал бамад чабкиз, мукет палзэ но солы берыкты. Кин ке тонэ судэ пырыны но дэремдэ басьтыны турттӥз ке, солы вылысь дӥсьтэ но сёт. Тонэн кин ке одӥг иськем ӵош мыныны чортӥз ке, мын соин кыксэ. Курисьлы сёт, пунэманы турттӥсьлэсь эн палэнскы.
Тӥ кылӥды тазьы шуэмез: “Матысьтэ яраты, тушмондэ адӟемпотостэм кар“. Нош Мон тӥледлы шуисько: тушмонъёстэс яратэлэ, тӥледыз каргасьёсты бакель каре, адӟемпотостэм карисьёслы ӟеч каре, ултӥясьёс, уллясьёс понна вӧсяськелэ, Инмысь Атайдылэн пиосыз мед луоды; Со уго шундызэ уродъёс но, ӟечъёс но вылэ ӝужаны косэ, зорзэ шонер улӥсьёслы но, шонер улӥсьтэмъёслы но лэзе. Тӥледыз яратӥсьёсыз гинэ яратӥды ке, тӥляд кыӵе медды-кузьымды луоз?... Кызьы Инмысь Атайды дун-шектэм, озьы ик тӥ но дун-шектэмесь луэ.
Учкелэ, ёрмисьёслы сётондэс калык азьын, соос мед адӟозы шуыса, эн лэсьтэ: соку уго Инмысь Атайдылэсь медзэ-кузьымзэ уд басьтэ. Озьыен, ёрмисьёслы сётыкуд, калык азьын чеберъяськисьёс кадь эн куашеты. Соос синагогаосын но, ульчаосын но, калык мед данъялоз шуыса, озьы каро. Зэм ик тӥледлы верасько: асьсэлэсь медзэс-кузьымзэс соос басьто ини. Тынад нош, ёрмисьлы сётыкуд, паллян киыд медаз тоды, мар лэсьтэ бур киыд. Ёрмисьлы сётонэд лушкем мед луоз; лушкемез адӟись Атаед тыныд пунэмзэ шара берыктоз...
Вӧсяськыкуды, язычникъёс кадь, мултэссэ эн вералэ; соос уго малпало, трос кылъёс веразы ке, кылэмын луозы шуыса. Соос кадь эн кариське; Атайды уго Солэсь куриськемдылэсь азьвыл ик тодэ, мар тӥледлы кулэ. Тӥ тазьы вӧсяськелэ: “Инмысь Атаймы...“»
Матфейлэсь Ӟеч Ивор 5:38-48; 6:1-9
Инмысь Атаймы!
Инмысь Атаймы!
Тынад нимыд дано мед луоз;
Тынад Эксэйлыкед мед лыктоз;
Тынад эрикедъя мед луоз
музъем вылын но инмын кадь ик.
Милемлы туннэ улымон няньмес сёты;
Пунэмъёсмес но кушты,
милемлы пунэмо луисьёслэсь пунэмъёссэс
ми куштэм кадь ик;
Милемыз визь сынаськонлэсь но утьы,
уродлэсь но мозмыты милемыз.
Тынад Эксэйлыкед, кужымед но данэд
пумтэм вапуме.
Аминь.
334 - 345 
