Bible Stories
Выбрать язык
Choose Old Testament Story
Choose New Testament Story
ПАЛКЫШНОЛЭСЬ ПИЗЭ УЛӞЫТОН
Кӧня ке улыса, Илиялэн юон шурез куасьмиз. Соку Инмар сое, Сидонлэн Сарепта караз мыныса, отысь палкышнолэн юртаз улыны косӥз. Та юртэ вуыса, Илия кышномуртлэсь ву но шорем нянь куриз. Палкышно пиеныз уртче гинэ но туж куанер улӥзы. Одӥг кырым пызез но кувшин пыдэсаз ӧжытак вӧез сяна, солэн номыриз но ӧй вал. Илиялы та сярысь верам бераз, соиз тазьы шуиз: «Эн кышка. Кузё-Инмар музъем вылэ зор лэзьытозь, вышкыысь пызед уз быры, кувшинысьтыд вӧед но уз кулэсмы».
Илия пророк палкышнолэн юртаз улыны интыяськиз. Кузё-Инмар паймымон уж лэсьтӥз: нуналлы быдэ соос нянь пыжизы но, кызьы вераз Илия, вӧйзы но, пызьзы но ӧз кулэсмылэ.
Ӝоген палкышнолэн пиез черлаз но кулӥз. Куректӥсь анай малпаз, сое Инмар азьвыл сьӧлыкъёсыз понна вӧсь кариз шуыса. Синвуэн, кияз кулэм нунызэ кутыса, со пророк доры лыктӥз. Илия солы шуиз: «Вай мон кие пидэ». Анайлэн киысьтыз кулэм пиез басьтыса, сое со аслаз комнатаяз нуиз. Аслаз валес вылаз сое понӥз но вӧсяськыса Кузё-Инмарлы вазиськиз: «Инмаре, Кузё-Инмаре! Оло, та палкышнолы, кин дорын мон улӥсько, урод лэсьтод – пизэ кулыны лэзёд?» Собере со нош ик Инмарлы вазиськиз: «Инмаре, Кузё-Инмаре! Та мугор пушкы лул мед пырысал!» Кузё-Инмар оскиськымон пророкезлэсь куриськемзэ кылӥз но палкышнолэсь пизэ улӟытӥз. Сое анаез доры вайыса, Илия солы шуиз: «Учкы, пиед улэп». Шумпотэм кышномурт пророклы шуиз: «Табере мон тодӥсько, тон Инмарлэн адямиез луиськод, Кузё-Инмарлэсь зэмлыко кылъёссэ вераськод».
3 Эксэйлык 17:7-24
194 
