Bible Stories
Choose language
Choose Old Testament Story
Choose New Testament Story
ПАВЕЛ АФИНЫН
Буръюöртiгöн мöд ветлöм дырйи, кыдзи ми лыддим нин, Павел локтiс Афинö. Афин вöлi тырöма идолъясöн. Кор Павел аддзис тайöс, сiйö ловнас пузис. Павел сёрнитiс юдейяскöд синагогаын, а мукöд йöзыскöд сiйö быд лун сёрнитiс ывла вылын. Кодсюрö философъяс вензисны Павелкöд. Öтияс шуалiсны, сiйö пö нинöм абусö сöрö! Мöдъяс шуалiсны, кутшöмкö пö тöдтöм енъяс йылысь висьталö. Павел жö висьталiс налы Исус йылысь да кулöмысь ловзьöм йылысь. Сэки босьтiсны да вайöдiсны Павелöс Ареопагö*а. Сэнi пондiсны юасьны: «Вермам-ö ми тöдны, мыйсяма выль велöдöм тэ висьталан? Мыйкö тешкодьтор тэ тэчан миян пельясö. Кöсъям тöдны, мый тайö».
Павел сувтiс Ареопаг шöрö да шуис: «Афинса войтыр! Став сертиыс ме аддза, мый тi ёна юрбитысь йöз. Ветлöдлiгöн ме видзöдалi тiянлысь юрбитанiнъястö да аддзи ”тöдтöм енлы” гижöда висьпуктанiн. Буретш тайö тöдтöм Ен йывсьыс, кодлы тi юрбитанныд, ме и висьтала. Муюгыдсö да ставсö вöчысь Ен, енэжыслöн да муыслöн Господь, оз ов киöн вöчöм крамъясын. Сылы оз ков мортсянь отсöг, Сылöн ставыс эм. Сiйö Ачыс сетö быдöнлы олöм, ловшы да ставсö. Öти вирсянь Сiйö вöчис став мувывса йöзсö да овмöдiс найöс му пасьтала, торйöдiс налы муяс да индiс олан кадъяс, мед найö корсисны Енсö. Сiйö абу ылын миянысь быдöнысь. Сыöн ми олам, Сысянь лолалам да Сы улын ветлам. Тiян гижысьяс кодсюрö весиг шулöмаöсь: ”Ми ставным Сысянь чужысьяс”. Ми кö Енсянь чужысьяс, миянлы оз ков öткодявны Енсö зарни, эзысь либö изйысь вöчöмторъяскöд. Енмыс дыр кад чöж терпитiс йöзлысь гöгöрвотöмлунсö. Öнi Сiйö тшöктö быдлаын да быдöнлы бергöдчыны мыжъясысь. Öд Сiйö индiс лун, кор пондас веськыда мыждыны став муюгыдсö водзвыв индöм Морт пыр, да вынсьöдiс Ассьыс шуöмсö быдöнлы тöдмöн, кор ловзьöдiс Сiйöс».
Кор кылiсны кулöмысь ловзьöм йылысь, öтияс пондiсны серавны, а мöдъяс шуисны, та йылысь пö коркö мöдысь тэнö кывзам. Но кодсюрö эскисны.
Апостолъяслöн уджъяс 17:16-34
*а Ареопаг – ёрд ним
474 
