Bible Stories
Choose language
Choose Old Testament Story
Choose New Testament Story
СТЕПАНÖС ВИÖМ
Апостолъяслöн вöзйöм серти велöдчысьяс ас пöвстсьыныс бöрйисны сизим отсасьысьöс, медым найö тöждысисны гöль эскысьяс вöсна. Бöрйöмаяс пöвстын вöлi Степан, зумыда эскысь морт. Сiйö вöлi тырöма Енсянь вынöн, вöчис йöз пöвстын ыджыд шензьöданаторъяс. Та вöсна унаöн Кристос эскöмлы паныд сув тысьяс лöгалiсны Степан вылö. Öтчыд найö панiсны Степанкöд вен, но веннысö эз вермыны, öд сiйö сёрнитiс ыджыд мывкыдлунöн да Лов вынöн. Сэки вензьысьяс кодсюрööс ыззьöдiсны висьтавны, мый сiйö лёка сёрнитö Мöисей да Ен йылысь. Тадзи найö кыпöдiсны йöзсö, пöрысьясöс да Индöдö велöдысьясöс Степанлы паныд. Сэсся босьтiсны сiйöс да вайöдiсны веськöдлан котыр водзö. Ылöгвисьталысьяс шуисны, тайö мортыс пö век омöльтö миянлысь вежаиннымöс да Индöднымöс. Та дырйи веськöдлан котырын пукалысьяс синсö вештывтöг видзöдiсны Степан вылö, сылöн чужöмыс вöлi анделлöн кодь.
Став мыжалöмсö кывзöм бöрын аркирей юалiс Степанлысь: «Тайö тадз?» Степан пондiс гöгöрвоöдны налы Вежа Гижöдсö, висьталiс, мый Öвраам кадсянь нин юдейяс öтдортiсны Енлы кесъялысьясöс да пророкъясöс. Помалiгас Степан шуис: «Асныралысьяс, тiян сьöлöмныд оз тöд Енсö да тiян пельныд оз кыв Сiйöс! Асланыд батьяс моз тi пыр паныд мунанныд Вежа Ловлы. Эз вöв пророк, кодöс эськö эз вöтлыны тiян батьяс. Найö виисны пророкъясöс, кодъяс висьтавлiсны Веськыда Олысьлöн локтöм йылысь. Тайö Веськыда Олысьсö тi вузалiнныд да виинныд».
Тайöс кывзiгöн веськöдлан котырö чукöртчöмаяс пузисны скöрысла, пондiсны пиньнысö йирны. Вежа Лолöн тырöм Степан видзöдлiс енэжö да шуис: «Ме аддза восьса енэж да Ен веськыдладорын сулалысь Морт Пиöс». Сэки чукöртчысьяс пельнысö тупкöмöн лёк горшöн пондiсны равзыны, ставныс уськöдчисны Степан вылö. Сэсся петкöдiсны сiйöс кар сайö да изъялiсны. А Степан та дырйи кевмысис: «Господьöй, эн мыжды найöс таысь». Тайöс шуöм бöрын Степанлöн лолыс петiс.
Апостолъяслöн уджъяс 6:2-15, 7:1-60
452 
