Bible Stories
Choose language
Choose Old Testament Story
Choose New Testament Story
ИСУС МЫСЬКАЛÖ ВЕЛÖДЧЫСЬЯСЛЫСЬ КОКСÖ
Ыджыд лунся ыжöс сёйöм дырйи Исус чеччис, пöрччис вылыс паськöмсö да вöнясис ки чышкöдöн. Кисьтiс дозйö ва да кутiс мыськавны велöдчысьяслысь коксö. Исус матыстчис Симон-Петыр дiнö. Петыр шуис: «Господьöй, Тэ-ö менсьым кокöс мыськан?» Исус вочавидзис: «Тэ öнi он на гöгöрво, мый Ме вöча, но бöрынджык гöгöрвоан».
Налысь кокнысö мыськалöм бöрын Исус пасьтасис да бара пуксис сёйны. Сiйö шуис велöдчысьясыслы: «Гöгöрвоанныд-ö, мый Ме öнi вöчи? Тi шуанныд Менö Велöдысьöн да Господьöн. Тi веськыда шуанныд, Ме буретш сiйö. Ме кö, тiян Господь да Велöдысь, мыськалi тiянлысь кокнытö, сiдзкö, тiянлы тшöтш колö мыськавны öта-мöдныдлысь кокнытö. Тадзи Ме вöчи, медым тi вöчинныд Ме моз. Веськыда, веськыда висьтала тiянлы: кесйöг абу ыджыдджык аслас ыджыдысь, да мöдöдöм морт абу ыджыдджык сiйöс мöдöдысьысь. Тайöс кö тöданныд да та серти оланныд, тi шудаöсь. Ме ог висьтав ставныд йылысь, öд Ассьым бöрйöмаясöс Ме тöда. Но Гижöдыслы колö инны: ”Мекöд сёйысьыс мунас Меным паныд”».
Тайöс висьталöм бöрын Исуслöн нормис сьöлöмыс. Сiйö шуис: «Веськыда, веськыда висьтала тiянлы: тiян пиысь öти вузалас Менö». Сэки велöдчысьяс видзöдлiсны öта-мöдныс вылö. Найö эз гöгöрвоны, код йылысь Сiйö сёрнитö. Иоан юалiс: «Господьöй, кодi нö сiйö?» Исус вочавидзис: «Сiйö мортыслы Ме сета кöтöдöм нянь тор». Исус кöтöдiс нянь тор да сетiс сiйöс Симон-Искариот Иудалы. Нянь торсö босьтöм бöрын Иуда дзик пыр петiс ывлаö. Вöлi вой.
Иудалöн петöм бöрын Исус шуис: «Выль тшöктöм сета тiянлы: радейтöй öта-мöднытö! Кыдзи Ме радейта тiянöс, сiдзи тi радейтöй öта-мöднытö. Радейтанныд кö öта-мöднытö, сэки быдöн аддзас, мый тi – Менам велöдчысьяс».
Сэсся Исус шуис велöдчысьясыслы: «Тавой тi ставныд эновтанныд Менö». Петыр шуис: «Ставныс кö эновтасны Тэнö, ме ог». Исус вочавидзис: «Веськыда висьтала тэныд: тавой петук чукöсттöдз на тэ куимысь соссян Меысь».
Иоан 13:4-38, Матвей 26:31-34
412 
