Bible Stories
Choose language
Choose Old Testament Story
Choose New Testament Story
КЕРÖСВЫВ ВЕЛÖДÖМ
2. ИНДÖД ТОРКАЛÖМ, ЛÖГАЛÖМ, ГОЗЪЯ ОЛÖМ ПЕЖАЛÖМ ДА КЫВ СЕТÖМ ЙЫЛЫСЬ
«Тi чайтанныд, Ме локтi бырöдны Индöдсö да пророк гижöдъяс? Энö мöвпалöй тадзи. Ме эг лок бырöдны, а локтi олöмö пöртны. Веськыда висьтала тiянлы: енэжыс да муыс быртöдз, ставыс збыльмытöдз весиг öти ичöт шыпас да чуттор оз вош Индöдысь. Кодi торкас Ен тшöктöмъясысь весиг öти ичöттор да велöдас тадзи вöчны мукöдöс, Енэжвыв Юраланiнын сiйöс медiчöтö пуктасны. Кодi олас тшöктöмъясыс серти да велöдас тадзи овны мукöдöс, Енэжвыв Юраланiнын сiйöс ыджыд мортö пуктасны. Висьтала тiянлы: тiян веськыда олöмныд кö оз ло Индöдö велöдысьяслöн да фарисейяслöн дорысь бурджык, Енэжвыв Юраланiнö онö пырöй.
Тi кывлiнныд, важ йöзлы вöлi шуöма: ”Эн ви”, и нöшта шуöма: ”Виысьöс мыждасны”. Ме шуа тiянлы: кодi лöгалö вокыс вылö, сiйöс мыждасны. Кодi вокыслы шуас: ”Тэ бöб”, сiйöс вылыс ёрд*а мыждас. Кодi йöйöн шуас, сiйö куслытöм биö веськалас. Ен водзö сетантортö вайигад кö висьпуктанiн дорын тöд вылад усяс, мый вокыд лöгалö тэ вылö, сэки коль висьпуктанiн дорö сетантортö. Мун, водзджык бурась вокыдкöд, сэсся лок да пукты висьпуктанiнö сетантортö.
Тi кывлiнныд, важ йöзлы вöлi шуöма: ”Гозъя олöмтö эн пежав!” Ме шуа тiянлы: ань вылö ыштöмöн видзöдысь сьöлöмас гозъя олöмсö пежалiс нин. Нöшта шуöма: ”Гöтырсö эновтысь мед сетас сылы торйöдчан гижöд”. Ме шуа тiянлы: верöсыс кö эновтö гöтырсö, а гöтырыс оз кырсав, сiйö сетö помка гöтырыслы пежавны гозъя олöмсö. Юксьöм аньöс гöтырö босьтысь тшöтш пежалö.
Тi кывлiнныд, важ йöзлы вöлi шуöма: ”Сетöм кывтö эн торк! Господь водзын сетöм кывтö кут!” Шуа тiянлы: кыв сеттöг ов! Эн сет кывтö енэж водзын – сiйö Енлöн пукаланiныс. Эн сет кывтö му водзын – сiйö Енлöн кок улыс. Эн сет кывтö Ерусалим кар водзын – сiйö ыджыд Öксылöн кар. Аслад юрöн эн кöсйысь, öд тэ весиг öти юрси сi он вермы пöртны еджыдö либö сьöдö. Тiян ”да”-ныд мед лоö сöмын ”да”, тiян ”ог”-ныд мед лоö сöмын ”ог”, а содтöд кывъясыс – омöльсяньыс».
Матвей 5:17-24, 27-28, 31-37
*а ёрд – суд
332 
