Bible Stories
Choose language
Choose Old Testament Story
Choose New Testament Story
ИСУС ДА НИКОДИМ
Юдейяслöн веськöдлысьяс пöвстын вöлi Никодим нима фарисей. Войнас сiйö локтiс Исус дiнö да шуис Сылы: «Велöдысьöй, ми тöдам: Тэ Енсянь локтöм Велöдысь. Öд Тэ моз некод оз вермы вöчны шензьöданаторъяс, оз кö ло сыкöд Ен». Исус вочавидзис: «Веськыда, веськыда висьтала тэныд: мортыс оз вермы аддзыны Енлысь Юраланiнсö*а, оз кö сiйö выльысь чуж». Никодим юалiс Сылысь: «Вермас-ö мортыс выльысь чужны, сiйö кö пöрысь нин? Öд сiйö оз вермы мам кынöмас бöр пырны да мöдысь чужны». Исус вочавидзис: «Веськыда, веськыда висьтала тэныд: мортыс кö оз чуж васянь да Ловсянь, сiйö оз вермы пырны Енлöн Юраланiнö. Вир-яйсянь чужысь эм вир-яй, а Ловсянь чужысь эм лов. Эн шензьы, Ме кö висьтала, мый тiянлы колö выльысь чужны».
Но Никодим эз гöгöрво да юалiс: «Вермас öмöй тадзи лоны?» Исус сэки кутiс гöгöрвоöдны сылы му вылö Ассьыс локтöмсö да йöзöс мыжъясысь мездöмсö. Сiйö шуис: «Кыдзи овтöминын Мöисей вывлань кыпöдiс змейöс, тадзи лоö кыпöдöма тшöтш Морт Пиöс, медым Сылы эскысь эз быр, а помтöг олiс. ÖД ЕНМЫСЛЫ СЭТШÖМ МУСАÖСЬ ЙÖЗЫС, МЫЙ СЕТIС АССЬЫС ÖТКА ПИСÖ, МЕДЫМ СЫЛЫ ЭСКЫСЬ ЭЗ БЫР, А ПОМТÖГ ОЛIС. Енмыс мöдöдiс Ассьыс Писö муюгыдас йöзöс мездыны, а эз мыждыны. Сылы эскысьöс оз ло мыждöма, а эскытöмöс мыждöма нин, öд сiйö эз эскы Енлöн öтка Пилы. Мыждöмыс сыын, мый му вылас локтiс югыдыс, но йöзыслы мусаджык вöлöм пемыдыс, öд налöн уджъясыс лёкöсь. Лёксö вöчысь мустöмтö югыдсö. Сiйö оз лок югыдас, медым сылöн лёк уджъясыс эз йöзасьны. Збыль серти олысь локтö югыдас, медым тыдовтчисны сылöн Енсянь уджъясыс».
Иоан 3:1-21
*а Енлöн Юраланiн – Царство Божье
322 
