Bible Stories
Choose language
Choose Old Testament Story
Choose New Testament Story
ИЛЛЯ ДА ВААЛЛÖН ПРОРОКЪЯС
Ен тшöктiс мунны Иллялы Акав öксы дiнö да корны, медым сiйö чукöртас Кармил керöсö став войтырсö, Вааллысь да мукöд идолъяслысь пророкъяссö. Чукöртчöм бöрын Илля шыасис йöзыс дiнö: «Дыр-ö тi кутанныд чотны кыкнан кокнаныд? Господь кö эм Ен, кывзысьöй Сылысь, Ваал кö Енмыс, сылысь кывзысьöй». Некод эз вочавидз сылы. Сэки Илля шуис йöзыслы: «Господьлöн пророкъясысь ме öтнам коли, а Вааллöн пророкъясыс – нёльсё ветымын морт. Вайöдöй миянлы кык öшкöс. Вааллöн пророкъяс мед босьтасны öти öшсö, начкасны сiйöс да пуктасны пес вылö, но бисö мед оз öзтыны. Ме начка мöд öшсö, тшöтш пукта пес вылö да бисö ог öзты. Мед найö шыасясны асланыс ен дiнö, а ме шыася Господь дiнö. Кодi бисö ыстас, сiйö эм Ен». Ставныс вочавидзисны: «Бур. Вöчам тадзи».
Вааллöн пророкъяс пуктiсны öшкöс пес вылö да кутiсны горзыны: «Ваал! Вочавидз миянлы!» Тадзи найö горзiсны асывсяньыс лун шöрöдзыс, но весьшöрö. Сэки Илля шуис йöзыслы: «Матыстчöй ме дiнö». Ставныс матыстчисны. Илля босьтiс дас кык из да тэчис висьпуктанiн. Лöдiс сэтчö пес, начкис öшкöс да пуктiс пес вылö. Сэсся вись вылас да пес вылас тшöктiс куимысь кисьтны нёль ыджыд гырнич тыр ва. Висьпуктанiн гöгöр кодйöм гуыс тыри ваöн.
Сэсся Илля кутiс кевмысьны: «Господьöй, Öвраамлöн, Исааклöн да Израильлöн Ен! Талун мед ставныс тöдмаласны, мый Израильын эм Ен. Мед аддзасны, мый ме – Тэнад кесйöг, да ставсö вöчи Тэнад тшöктöм серти. Вочавидз меным, Господьöй. Вочавидз, медым тайö войтырыс тöдмалас, мый Тэ, Господьöй, эм Ен. Бергöд налысь сьöлöмсö Ас дiнад». Ен кылiс Иллялысь кевмысьöмсö. Сэки сяркнитiс енэжсяньыс би да сотiс висьсö, пессö да весиг гöгöрсьыс изъяссö. Кор йöзыс аддзисны тайöс, ставныс усисны муö да шуисны: «Господь эм Ен! Господь эм Ен!»
Тадзи Господь петкöдлiс ставныслы, мый Сiйö – ловъя Ен, а Вааллöн пророкъясыс – ылöдчысьяс.
Öксыяслöн коймöд небöг 18:18-39
196 
