Choose Language
Old Testament Books
New Testament Books
1«Кышноос пӧлысь чеберлэсь но чебер кышномурт,
кытчы мынӥз тынад яратонэд?
Кудпала берытскиз тынад яратонэд?
Сое асьмеос тонэн ӵош утчалом».
2«Мынам яратонэ аслаз садаз,
ческыт зын поттӥсь сяська садаз, мынӥз,
садаз пудо возьманы,
лилия сяськаос бичаны мынӥз.
3Яратонэлэн киулаз мон улӥсько, со мынам киулам улэ;
лилия сяськаос пӧлын со пудозэ возьма».
4«Фирца кадь чеберлэсь но чебер тон, мынам яратонэ!
Иерусалим кадь синмаськымон,
знамяосын лыктӥсь ожгарчиослэн полксы кадь кышкыт.
5Мон палась синъёстэ басьты,
малы ке шуоно соос мынэсьтым пушме бугырто.
6Йырсиосыд тынад Галаадысь васькись кеч уллё кадесь;
пиньёсыд тынад ыж миськон интыысь потӥсь ыж уллё кадесь, –
котькуд ыжлэн кузэн-кузэн ыжпиез,
соос пӧлын ыжпи вайисьтэмез ӧвӧл;
7баблес йырси улысьтыд бамъёсыд –
гранатпулэн улмоезлэн ӝыны люкетэз кадесь.
8Вань куатьтон эксэй кышномуртъёс,
тямыстон ляльчи кышноос, лыдтэм трос нылъёс,
9нош мынам кадез одӥгез но ӧвӧл,
со – мынам дыдыке, дун-чылкытэ мынам;
анаезлэн со огназ гинэ, вордэм анаезлэн умойлэсь но умой нылыз.
Нылмуртъёс сое адӟизы но вылӥ-дано каризы,
эксэй кышнооос, ляльчи кышноос адӟизы но сое ушъязы.
10Кин со сыӵе ӵук ӟардон кадь пиштӥсь,
толэзь кадь чеберлэсь но чебер, шунды кадь югыт,
знамяосын лыктӥсь ожгарчиос кадь кышкыт».
11«Пашпу садэ, нёжалысь вож турын-куар шоры учкыны мон васьки,
виноградпудлэн вайыз куарзэ поттэм-а ни,
гранатпуос сяська поттӥллям-а ни?
12Уг тодӥськы, кызьы мынам лулы монэ ас калыкелэн,
нимо-дано адямиослэн, ворттылон уробооссы доры валтӥз».
Глава 6
