Choose Language
Old Testament Books
New Testament Books
1«Лулылэсь яратон муртсэ мон уйин валес вылысьтым утчай,
утчай мон сое, но ӧй шедьты мон сое.
2Султо но город кузя вамышто,
ульчаосыз, падвожъёсыз кузя мон мыно,
лулылэсь яратон муртсэ утчало;
утчай мон сое, но ӧй шедьты мон сое.
3Город котыртӥ ветлӥсь возьмаськисьёс монэ пумитазы:
”Лулылэсь яратоно муртсэ тӥ ӧд адӟе-а?”
4Нош мон соос дорысь ӧжытак гинэ кошкыса вуи,
соку ик мон лулылэсь яратоно муртсэ шедьтӥ,
со борды кутӥськи но сое анаелэн корказ,
солэн коркасьтыз висъетъёсыз пушкы вайытозям
со бордысь ӧй ни лэзиськы».
5«Иерусалим нылъёс, мон тӥледыз кыркечъёсын,
бусыысь пужейёсын ӵош тэльмырыса курисько:
эн сайкатэ, эн ёртэ гажанме, уммез тырытозь, со мед кӧлоз».
6Кин со сыӵе луоё кыр дуннеысь ӵын юбо кадь ӝутӥськись,
мирраен, фимиамен, миро пӧзьтон интыысь пӧртэм ватсэтъёсын
ӵындытыса ческыт зын поттӥсь?
7Тани солэн – Соломонлэн – валесэз:
солэн котыраз куатьтон кужмоос,
Израильысь кужмоос пӧлысь кужмоос.
8Ваньзылэн киязы меч, ожмаськыны быгатӥсесь;
уйлэн кӧшкематонъёсызлэсь утиськон понна
кус бордазы меч шедьытэмын.
9Ливан писпуослэсь Соломон эксэй
киын ӝутыса нуллон валес аслыз лэсьтӥз;
10Юбооссэ азвесьлэсь лэсьтӥз, пыкъяськонзэ – зарнилэсь,
пукон интызэ нап-горд басмаен шобыртӥз;
солэсь пушсэ Иерусалим нылъёс яратыса чебермазы.
11Сӥон нылъёс, мынэлэ, учкелэ
венец изьыен пукись Соломон эксэй шоры,
солэн кышнояськон нуналаз, сюлмызлэн шумпотон нуналаз,
со изьыез йыр вылаз анаез понӥз.
Глава 3
