Choose Language
Old Testament Books
New Testament Books
1Хорлэн кивалтӥсезлы. Дышетон. Корей пиослэн.
2Инмаре, ми асьмелэн пельынымы кылӥмы,
милемлы атайёсмы Тынад лэсьтэм ужед сярысь вераллязы,
сое Тон соослэн улон нуналъёсазы, вашкала дыръёсы лэсьтӥд.
3Тон Аслад киыныд калыкъёсты*а улляд, нош соосты*б улыны интыяд;
калыкъёсты погыръяд, нош соослы улон сётӥд.
4Уго соос асьсэлэн палашенызы музъем ӧз басьтэ,
суйбыгытсы но соослы ӧз юртты, –
Тынад бур киыд, Тынад суйбыгытэд,
Тынад ымнырыдлэн югытэз юрттӥзы,
уго Тон соослы ӟеч мылкыддэ сётӥд.
5Инмаре – Тон мынам Эксэе! Иаковлы утиськон сёт.
6Тон юрттӥд ке, тушмонъёсмес сюръёсынымы лекаломы,
милемлы пумит султӥсьёсты Тынад нимыныд пыд уламы лёгаломы.
7Уго пукыӵе вылын оскиськонэ ӧвӧл, палаше но монэ уз утьы;
8Тон гинэ милемыз тушмонъёсмылэсь утиськод,
милемыз адӟемпотостэм карисьёсты возьытэ вуттӥськод.
9Котькуд нуналэ ми Инмарез ушъяськомы,
Тынэсьтыд нимдэ пумтэм вапуме данъяса уломы.
10Нош та виын Тон милемыз палэнтӥд, возьытэ вуттӥд,
милям ожмаськись муртъёсынымы ӵош ӧд поты.
11Тушмон дорысь милемыз берлане чигнатӥд,
адӟемпотостэм карисьёс милемыз таласа-качаса уло.
12Ыжъёсты кадь Тон милемыз сиыны сётӥд,
пӧртэм калыкъёс пӧлы милемыз улыны пазьгид.
13Дунтэк Тон сётӥд Аслэсьтыд калыктэ, пайда басьтонэз ӧд утча.
14Бускельёсмылы сантэманы милемыз кельтӥд,
ёросамы улӥсьёслы серекъяны, ултӥяны милемыз сётӥд.
15Калыкъёс пӧлын милемыз мадёнлы пӧрмытӥд,
мурт выжыос ми пумысен йырынызы сэзъяло.
16Нуналлы быдэ возьытэ вуисько, возьытлык ымнырме шобыртэ.
17Серем карисьлэн, ултӥясьлэн кылъёсынызы, тушмонлэн,
пунэмзэ берыктӥсьлэн мыльккиськеменызы сэрен чигиськисько.
18Ваньмыз та ми вылэ вуиз, нош ми Тонэ ӧм вунэтэ,
Тынэсьтыд сӥзён-косондэ ӧм тӥялэ.
19Сюлэммы берлане ӧз чигна,
пыдъёсмы сюрес вылысьтыд ӧз кожылэ.
20Уродлыклэн музъемаз милемыз куашкатӥд,
кулонлэн вужереныз шобыртӥд.
21Ми асьмелэн Инмармылэсь нимзэ вунэтысалмы но
муртлэн инмарезлы кимес мычысалмы ке,
22та понна Инмар кылмес ӧй юасал-а?
Со уго сюлэмлэсь лушкем малпанзэ но тодэ.
23Тон понна милемыз нуналлы быдэ виыло,
милемыз вандыны дасям ыжъёс шуыса лыдъяло.
24Сайка, Кузё-Инмаре, малы кӧлӥськод!?
Султы, пырак ӵожелы эн кельты!
25Малы Аслэсьтыд ымнырдэ ватӥськод?
Милесьтым куректон-кайгумес, ултӥян улэ сюреммес вунэтӥськод?
26Милям лулмы пыдул сюй интые кельтэмын,
милям пушмы музъеме лякиськемын.
27Милемлы юрттӥськыны султы,
Аслад гажан-жалянэныд мозмыты милемыз.
*а 43:3 калыкъёсты – татын вераськон мынэ сульдэръёслы-идолъёслы йыбыртъяса улӥсь калыкъёс сярысь;
*б 43:3 соосты – татын вераськон мынэ израиль калык сярысь
Глава 43
