Choose Language
Old Testament Books
New Testament Books
1Хорлэн кивалтӥсезлы. Ӟардон азьын. Давидлэн крезьгурез.
2Инмаре мынам! Инмаре! [Кыл монэ.]
Мар понна Тон монэ кельтӥд?
Викышъяса верам кылъёсы утиськонэлы кыдёкын уло.
3Инмаре! Нуназе мон тэльмырыса курисько,
нош Тон монэ уд кылӥськы,
уйин но, – буйгатскыны уг быгатӥськы.
4Нош Тон, Дун-Сьӧлыктэм,
Израильлэн данъян кылъёсыз пӧлын улӥськод.
5Милям атайёсмы Тыныд оскиськыса улӥзы;
оскиськизы но, Тон соосты утид.
6Тыныд куриськыса вазиськылӥзы но соос утиськылӥзы;
Тыныд оскиськыса улӥзы, соос возьдаськоно ӧз луылэ.
7Мон нош нумыр ук, адями но ӧвӧл,
адямиослэн курлан-серекъянзы, калыклэн синазькылез.
8Ваньмыз монэ адӟисьёс монэ тышкасько;
йырынызы сэзъяса, ымъёссэс паськыт усьтыса верало:
9«Кузё-Инмарлы со оскиськыса улӥз, – мед сое мозмытоз;
Солы ярамон ке со, мед утёз».
10Тон монэ анаелэсь вордскытӥд,
солэн гадь бордысеныз ик мыным оскиськон сётӥд.
11Анае пушкысен ик мон Тон кие утьыны сётэмын,
аслам анаелэсь вордскем дырысен ик Тон – мынам Инмаре.
12Эн палэнскы мон дорысь;
куректон-кайгу адӟонэ матын, нош юрттӥсе ӧвӧл.
13Туж трос ошъёс мон котыре люкаськизы;
Васан музъемысь ошъёс монэ котыртӥзы,
14сиёнзэ йырйыса бурсӥсь лев музэн, мон шоры ым пасьсэс усьтӥзы.
15Мон ву кадь кисьтӥськи; вань лыосы ёзнаськизы,
сюлмы сюсь кадь луиз, пушкам со ӵыжаз.
16Горшок чалеп кадь кужыме куасьмиз,
кылы ньылон бордам лякиськиз,
Тон монэ шӧй сюйлы пӧрмытӥськод.
17Пуныос монэ котыртӥзы, урмем уллё монэ ёртӥз,
бышкалтӥзы мынэсьтым киосме, пыдъёсме.
18Вань лыосме лыдъяны луысал,
нош соос мыльккиськыса учко, чаклало монэ.
19Дӥсянме куспазы люкыло, дӥськутэ пумысен пус чӧлто.
20Нош Тон, Кузё-Инмаре, мон бордысь эн палэнскы,
Кужыме мынам, дырты мыным юрттыны;
21палашлэсь уть мынэсьтым лулме,
пуныослэсь уть огназ кылем лулме;
22сьӧсь пӧйшурлэн ым пасезлэсь, кыр ошлэн сюрызлэсь уть монэ,
кылӥд ке, мозмыты монэ.
23Тынэсьтыд нимдэ агай-вынъёсылы тодыто,
калык люкаськон пӧлын Тонэ ушъяло.
24Кузё-Инмарлэсь кышкасьёс! Ушъялэ Сое.
Иаковлэн кидысэз! Данъялэ Сое.
Израильлэн вань выжыез Со азьын куалекъяса мед улоз!
25Куанерлэсь куректон-кайгузэ Со адӟытэк ӧз кыльы,
кулэтэм ӧз кары, Аслэсьтыз ымнырзэ солэсь ӧз ваты,
Солы вазиськиз но, Со сое кылӥз.
26Туж трос калык люкаськонын Тонэ ушъясько;
Солэсь кышкасьёс азьын сӥзиськем пунэмме берыкто.
27Куанеръёс мед сиёзы но кӧтсы мед тыроз;
Кузё-Инмарез мед ушъялозы Сое утчасьёс;
тӥляд сюлэмъёсты пумтэм вапумъёс ӵоже улэп мед луозы!
28Тодазы ваёзы но дуннелэн вань палъёсыз
Кузё-Инмар пала берытскозы,
язычникъёслэн вань выжыоссы Тон азе йыбырттозы.
29Кузё-Инмарлэн эксэйлыкез вань, Со – вань калыкъёслы Кузё.
30Сиёзы но йыбырттозы музъем вылысь ваньмыз тыр луэмъёс;
Со азе пыдесъяськозы ваньмыз сюе пырисьёс,
асьсэлэсь улонзэс кутыса возьыны быгатӥсьтэмъёс.
31[Мынам] выжые Солы ужаса-тыршыса улоз,
пумтэм вапумъёс ӵоже со Кузё-Инмарлэн шуыса нимаськоз:
32лыктозы но Солэсь шонерлыксэ вордӥськоно калыклы ивортозы,
мае Кузё-Инмар лэсьтӥз.
Глава 21
