Bible
Choose Language
Old Testament Books
New Testament Books
ПСАЛТИРЬ
113-тӥ ПСАЛОМ
[Аллилуия.]
1Израиль Египетысь потэм бере,
Иаковлэн юртэз мурт калык пӧлысь потэм бере
2Иуда Солэн вӧсяськон интыез луиз,
Израиль Солэн киулысьтыз люкетэз луиз.
3Зарезь адӟиз но вайяськыса кошкиз,
Иордан берлань бызьыны кутскиз.
4Гурезьёс ыжъёс выллем тэтчазы, мувыръёс – ыжпиос кадь.
5Зарезь, мар тонэн луиз – бызьыса кошкид?
[Тонэн но,] Иордан, – берлань бызьыны кутскид?
6Гурезьёс, малы тӥ ыжъёс выллем тэтчаськоды,
тӥ но, мувыръёс, – ыжпиос кадь?
7Кузё-Инмарлэн азяз, Иаковлэн Инмарезлэн азяз, куалекъя, музъем!
8Кузё-Инмар изгурезез вуэн тылы пӧрмытэ,
изэз ву сётӥсь ошмес каре.
9Милемыз ӧвӧл, Кузё-Инмаре, милемыз ӧвӧл –
Тынэсьтыд нимдэ данъян луонлык сёт,
Уго Тон гажась-жалясь, зэмлыкез яратӥсь.
10Малы язычникъёс шуо: «Кытын соослэн Инмарзы?»
11Милям Инмармы – Инмын но, [музъем вылын но];
лэсьтэ ваньзэ, мае лэсьтэмез потэ.
12Нош соослэн сульдэръёссы азвесьлэсь но зарнилэсь –
адями киын лэсьтэм уж.
13Вань соослэн ымзы, но уг верасько;
вань соослэн синъёссы, но соос уг адӟо.
14Вань соослэн пельёссы, но соос уг кыло;
нырпасьёссы вань, но уг шӧдо.
15Вань соослэн киоссы, но соос уг кырмо;
вань соослэн пыдъёссы, но соос уг ветло;
гульыменызы но куара уг потто.
16Соос выллемесь ик мед луозы соосты лэсьтӥсьёс,
ваньзы, соослы оскиськыса улӥсьёс.
17Израиль [юрт]! Кузё-Инмарлы оскиськы:
Со – асьмелэн юрттӥсьмы, дурбасьтӥсьмы.
18Аарон юрт! Кузё-Инмарлы оскиськы:
Со – асьмелэн юрттӥсьмы, дурбасьтӥсьмы.
19Кузё-Инмарлэсь кышканэн улӥсьёс! Кузё-Инмарлы оскиське:
Со – асьмелэн юрттӥсьмы, дурбасьтӥсьмы.
20Кузё-Инмар асьмеды тодаз возе, [асьмеды] бакель каре,
Израиль юртэз бакель каре, Аарон юртэз бакель каре.
21Кузё-Инмарлэсь кышканэн улӥсьёсты –
покчиоссэ но, бадӟымъёссэ но – бакель каре.
22Кузё-Инмар тросгес но тросгес ӟечлык мед сётоз
тӥледлы но, тӥляд нылпиостылы но.
23Инмез но, музъемез но кылдытӥсь Кузё-Инмар
тӥледыз бакель кариз.
24Вылысь ин Кузё-Инмарлэн, нош музъемез Со адямиослы сётӥз.
25Кулэмъёс, шайгуэ васькисьёс, Кузё-Инмарез уз ушъялэ.
26Нош ми, [улэпъёс], Кузё-Инмарез данъяломы али но,
пумтэм вапумъёс ӵоже.
Аллилуия.
Глава 113
