Bible
Choose Language
Old Testament Books
New Testament Books
ПСАЛТИРЬ
110-тӥ ПСАЛОМ
Аллилуия.
1Шонер улӥсьёслэн кенешазы, ӧтчамын [Тонэ], Кузё-Инмаре,
вань сюлмысьтым данъясько.
2Быдӟымесь Кузё-Инмарлэн ужъёсыз,
ваньмызлы соосты яратӥсьёслы – кулэ карымонэсь.
3Солэн ужез – дан но чеберлык,
Солэн шонерлыкез пумтэм вапумъёс улэ.
4Паймымон ужъёссэ Со вунэтонтэмлы лэсьтӥз;
гажась-жалясь, шырыт сямо Кузё-Инмар.
5Аслэсьтыз кышканэн улӥсьёслы Со сиён сётэ,
сӥзён-косонзэ пырак ӵоже тодаз возе.
6Ас калыкезлы ужъёсызлэсь кужымзэ Со возьматӥз
язычникъёслэсь люкетсэс соослы сётон понна.
7Солэн киызлэн ужъёсыз – зэмлык но шонерлык,
Солэн вань курон-косонъёсыз шонересь,
8дауръёсысь дауръёсы юнэсь,
соос зэмлык, шонерлык вылын кылдытэмын.
9Ас калыкезлы Со мозмытскон ыстӥз;
сӥзён-косонзэ пумтэм дауръёслы сётӥз.
Дун-чылкыт, кышкыт Солэн нимыз!
10Визьлыклэн кутсконэз – Кузё-Инмарлэсь кышканэн улон;
ваньмызлэн, Солэсь курон-косонъёссэ быдэсъясьёслэн,
визьзы-валанзы шонерлыко.
Сое ушъян пумтэм вапумъёс улоз.
Глава 110
