Choose Language
Old Testament Books
New Testament Books
Хорлэн кивалтӥсезлы. Давидлэн крезьгурез.*а
1Данъяськонэлэн Инмарез, вазьылытэк эн улы.
2Сьӧлыклэсь кышкасьтэм, кескич ымъёс мон шоры усьтӥськизы,
ӧрекчаськыса монэн верасько.
3Синазькыль карись кылъёсын котькуд ласянь монэ котырто,
нокыӵе мугтэк мыным пумит нюръясько.
4Яратэме понна соос монэн тушмонъясько, нош мон – вӧсяськисько.
5Ӟеч карем поннам уродэн пунэмзэ берыкто,
яратэм поннам синазькыль каро.
6Солы пумит сьӧлыклэсь кышкасьтэмез пукты,
солэн бурпалаз янгыше уськытӥсь мед султоз.
7Судэ пыриз ке, янгыш луыса, отысь мед потоз,
вӧсяськемез сьӧлыклы мед луоз.
8Улоно нуналъёсыз вакчиесь мед луозы,
ужан-тыршон интызэ мукетыз мед басьтоз.
9Нылпиосыз атайтэк мед кылёзы, кышноез палкышно мед луоз.
10Нылпиосыз кураськыса, костаськыса,
куашкам юрт бервылысьтызы нянь утчаса мед ветлозы.
11Пунэмен сётӥсь, маиз солэн вань, ваньзэ мед киултоз,
мурт адямиос солэсь ужам ужзэ мед таркалозы.
12Сое жалясь мурт медаз луы, сирота нылпиоссэ жалясь медаз луы.
13Нылыз-пиез мед быроз,
соослэн нимъёссы вуоно выжы пӧлысь мед ӵушиськозы.
14Атайёсызлэн законлы пумит улэмзы
Кузё-Инмар азьын тодэ ваемын мед луоз,
анаезлэн но сьӧлыкез медаз ӵушиськы.
15Соослэсь сьӧлыкъёссэс Кузё-Инмар син азяз мед возёз,
музъем вылысь соосты буре ваён мед быроз.
16Ӟеч карыны со ӧз тыршы уго,
нош куанерез, кураськыса, сюлмыныз чигиськыса улӥсез
виён вылысь со ёртыса возьылӥз.
17Юриськонэз яратӥз – со ик лыктоз со вылэ;
бакель каремез кулэ ӧз кары – со палэнтӥськоз со бордысь.
18Дӥськутэн кадь юриськонэн мед шобырскоз,
солэн пушказ со ву кадь мед пыроз, лыосаз вӧй кадь мед пыӵалоз.
19Солы со дӥсям дӥськутэз кадь,
думиськылоно кускерттонэз кадь мед луоз.
20Сыӵе луэ тушмонъёсылы, лулы сярысь уродзэ верасьёслы
Кузё-Инмарлэн пунэм берыктонэз!
21Нош Тон, Кузё-Инмаре, Кузё-Инмаре,
нимыдлэсь данзэ утён понна мыным дурбасьты:
Тынад гажан-жалянэд ӟеч, уть монэ.
22Мон куанер, кураськись, сюлмы но пушкам чигиськемын.
23Кошкись вужер кадь мон сылмисько, ӟозэз кадь монэ лобӟыто.
24Визяса пыдесъёсы лябӟизы ни, мугорылэн быгытэз быриз.
25Соослы мон серекъян-веранлы пӧрми,
монэ адӟо ке, йырынызы сэзъяло.
26Эй, Инмаре, Кузё-Инмаре, юртты мыным,
Аслад гажан-жалянэныд уть монэ,
27мед тодозы, та Тынад киыд шуыса,
Тон, Кузё-Инмаре, тае лэсьтӥд шуыса.
28Соос юрисько, нош Тон бакель кар;
пумит султӥсьёс возьытэ вуттэмын мед луозы,
нош Тынад ляльчиед шумпотыса мед улоз.
29Янгыше уськытӥсьёсы сӥтэм-сантэм луонэн мед шобырскозы,
дӥськутэн кадь, возьытэ вуонэн мед дӥсяськозы.
30Вань сюлмысьтым Кузё-Инмарлы тау каро,
трос калык пӧлын Сое данъяса верало:
31Со куанерлэн бурпалаз сылэ, лулзэ судить карисьёслэсь уте.
*а 108.0 та псаломын вераськон мынэ ӧпкельыса сьӧлыкъёссылэсь куштӥськисьтэм, лек сямо муртъёслэн азьпал адӟонзы сярысь (учкы: Ап.уж. 1:15-20)
Глава 108
