Choose Language
Old Testament Books
New Testament Books
[Аллилуия.]
1Кузё-Инмарлы тау каре, Со ӟеч,
Солэн гажан-жалянэз пумтэм вапумъёс улэ!
2Тазьы мед шуозы Кузё-Инмарлэн мозмытэм муртъёсыз,
тушмон киулысь поттэмъёсыз.
3Пӧртэм шаеръёсысь соосты Со люказ –
шундыӝужанысь но шундыпуксёнысь,
уйпалась но зарезь котырысь.
4Кыр дуннеетӥ, калыктэм сюрес кузя соос йыромыса ветлӥзы,
калыко улон интыез ӧз шедьтэ.
5Сютэм, сю куасьмыса улонэз чидано луизы,
соослэн лулзы катьтэммылӥз.
6Куректыса-кайгырыса улон дыръязы
Кузё-Инмарлы тэльмырыса вазиськизы но,
шугадӟонъёссылэсь соосты Со мозмытӥз.
7Улыны ярамон интые мед вуозы шуыса,
соосты шонер сюрес кузя нуиз.
8Солэн гажан-жалянэз понна,
адями пиослы паймымон ужъёсыз понна
Кузё-Инмарез мед данъялозы!
9Уго сюэз куасьмем луллэсь сюзэ юзматӥз,
кӧтыз сюмась лулэз Со тыр кариз.
10Начар улонэн, корт жильыен сьӧлтаськыса,
пеймыт азьын, кулонлэн вужераз соос пукизы.
11Инмарлэн кылъёсызлы ӧз тэрытске уго,
Вылысь Инмарлэсь визь-кенешсэ санэ ӧз понэ.
12Соослэсь сюлэмзэс уж пыр зӥбыт кариз,
соос сьӧлтаськизы, нош юрттӥськись ӧз луы.
13Куректыса-кайгырыса улон дыръязы
Кузё-Инмарлы тэльмырыса вазиськизы но,
шугадӟонъёссылэсь соосты Со мозмытӥз.
14Пеймыт азьысь, кулонлэн вужерысьтыз соосты поттӥз,
сьӧлтэтъёссэс тӥяз.
15Солэн гажан-жалянэз понна,
адями пиослы паймымон ужъёсыз понна
Кузё-Инмарез мед данъялозы!
16Уго Со ыргон капкаез куашкатӥз, корт тунгонэз тӥялтӥз.
17Законлы пумит сюрестӥ мынэмзы понна,
шонертэм улэмзы понна визьзэс ыштэмъёс курадӟон адӟизы.
18Котькыӵе сиёнлэсь соос палэнскылӥзы,
кулонлэн капкаезлы матэ вуизы.
19Куректыса-кайгырыса улон дыръязы
Кузё-Инмарлы тэльмырыса вазиськизы но,
шугадӟонъёссылэсь соосты Со мозмытӥз.
20Кылзэ Со вераз но соосты бурмытӥз,
сисьмонлэсь соосты мозмытӥз.
21Солэн гажан-жалянэз понна,
адями пиослы паймымон ужъёсыз понна
Кузё-Инмарез мед данъялозы!
22Солы тау карон курбонъёс мед ваёзы,
Солэн ужъёсыз сярысь кырӟаса мед ивортозы!
23Быдӟым пыжъёсын зарезе потӥсьёс,
быдӟым вуос вылын уж лэсьтӥсьёс
24Кузё-Инмарлэсь ужъёссэ чаклало,
пыдэстэм зарезь вуысь паймымон ужъёссэ адӟо:
25Со вазе но, кужмо сильтӧл ӝутскыса,
солэсь тулкымъёссэ вылӥе ӝутэ.
26Инбамозь ӝутӥсько, зарезь пыдэсозь лэзисько,
курадӟыса соослэн лулзы чылкак катьтэмме.
27Кудӟем мурт кадь соос бергало, шонасько но,
вань визьлыксы ыше-быре.
28Куректыса-кайгырыса улон дыръязы
Кузё-Инмарлы тэльмырыса вазиськизы но,
шугадӟонъёсысьтызы соосты Со мозмытӥз.
29Тӧлпериез Со чус каре но, тулкымъёс шып карисько.
30Чусомизы шуыса, соос шумпото,
соосты мынэм потон интыязы Со вуттэ.
31Солэн гажан-жалянэз понна,
адями пиослы паймымон ужъёсыз понна
Кузё-Инмарез мед данъялозы!
32Калыклэн ӧтчамаз Сое мед ушъялозы,
тӧроослэн люкаськоназы Сое мед данъялозы!
33Шуръёсты Со кӧс ӧр каре, вуо ошмесъёсты кӧс кырлы пӧрмытэ.
34Удалтӥсь музъемез,
со вылын сьӧлыклэсь кышкатэк улӥсьёслы луыса,
сылало сюйлы пӧрмытэ.
35Кыр дуннеез Со трос вуо ты каре,
куасьмем музъемез ошмесъёслы пӧрмытэ.
36Отчы Со сютэм муртъёсты интыя но,
соос асьсэлы улон инты пукто.
37Бусыосты кизё, виноград бакчазэс мертто но,
соослы удалтэм емыш соос сёто.
38Соосты Со бакель каре но,
соос туж йыло, пудозэс но уг кулэсты.
39Шугадӟон улын зӥбыса воземен,
куректон-кайгуэн сэрен мыкырскизы,
покчи радэ кылизы соос.
40Музъем выл эксэйёс вылэ Со ултӥян кисьтэ но
кыр дуннее, сюрестэм интые йыромыса ветлыны кельтэ,
41нош куанер муртэ шугадӟонысь поттэ но,
ыж уллёосты музэн, солэсь выжызэ йылэтэ.
42Шонер улӥсьёс тае адӟыса шумпото,
нош законлы пумит улӥсьёслэн ымзы ворсамын луоз.
43Визьмо мурт тае адӟоз но Кузё-Инмарлэсь гажан-жалянзэ валалоз.
Глава 106
