Choose Language
Old Testament Books
New Testament Books
1Веранзэ азинтыса, Елиуй шуиз:
2«Визьнодоос, кылзӥське мынэсьтым верамме,
валатскисьёс, мон пала пельдэс каре!
3Уго пель кылъёсты чакла-эскере, ньылон сиёнлэсь шӧмзэ шӧдэ.
4Куспамы вераськоме-чакласькоме но мар умой, сое тодмаломе.
5Тани, Иов шуиз:
”Мон шонер, нош Инмар монэ шонер судить ӧз кары.
6Шонерлыке сярысь кулэ-а мон ӧрекчаськыса вераны?
Янгыштэк мон бурмонтэм яраё луэмын”.
7Вань-а сыӵе адями, кин вуэз выллем серем каронэз Иов кадь юэ,
8законлы пумит улӥсьёслэн кенешазы пыре но
сьӧлыклэсь кышкасьтэмъёсын огазьын ветлэ?
9Уго со шуиз:
”Инмарлы тэрытскыса улонын адямилы пайдаез ӧвӧл”.
10Озьыен, визьнодо воргоронъёс, монэ кылзӥське!
Ӧрекчаськон Инмар дорысь уг поты,
шонертэм суд Дунне Кутӥсь дорысь уг лыкты.
11Уго Со адямилы ужъёсызъя пунэмзэ берыктэ,
воргоронлы но мар лэсьтӥз, соя пунэмзэ берыктэ.
12Зэм ик, Инмар шонертэм ужез уг лэсьты,
Дунне Кутӥсь шонертэм суд уг ортчыты.
13Кин, Со сяна, быдэс музъемлы кузё луэ?
Кин, Со сяна, быдэс дуннеен кивалтэ?
14Со Аслэсьтыз сюлэмзэ Ас палаз берыктысал ке,
Аслэсьтыз духсэ, шоканзэ Ас дораз басьтысал ке,
15соку ик вань лулмугор бырысал,
адями сюй-тузонлы берыктӥськысал.
16Озьыен, тынад визьмыд вань ке, соку тае кылзы но
мынэсьтым верам кылъёсме валаны тыршы.
17Шонерлыкез адӟонтэм карыса улӥсь быгатэ-а кузёяськыны?
Ваньмызлэсь Шонерлыкоез быгатӥськод-а янгыше уськытыны?
18Эксэйлы вераны луэ-а: ”Тон – сьӧлыклэсь кышкасьтэм”,
кивалтӥсьёслы: ”Тӥ – законлы пумит улӥсьёс”?
19Но Со уг учкы кивалтӥсьёслэн ымныр шоразы,
узырез но куанерлэсь вылӥе уг пукты,
малы ке шуоно ваньзы соос Солэн киызлэн кылдытэмъёсыз.
20Шӧдтэк шорысь соос куло;
уйлэн шораз калык бугырске но соос ышо-быро;
кужмоосты но кужым поныса уг улляло.
21Солэн синъёсыз адямилэсь улон сюресъёссэ чаклало,
Со солэсь вань вамышъёссэ адӟе.
22Пеймыт азе но, кулонлэн вужераз но
законлы пумит улӥсьёс ватскыны уг быгато.
23Соин ик Со адямиослэсь уг ни куры,
Инмарен судэ пырыны мед мыноз шуыса.
24Чаклатэк-эскерытэк Со кужмоосты куашкатъя но
мукетъёссэ соослэн интыязы пуктылэ,
25соослэсь ужъёссэс Со тодмо каре уго, уйин соосты виыса куштэ.
26Соосты Со, законлы пумит улӥсьёсты,
мукетъёслэн син азязы виылэ –
27Со бордысь куштӥськемзы понна,
Солэсь вань сюресъёссэ валамтэзы понна,
28озьы, куанеръёслэн викышъяса бӧрдэмзы Со доры вуиз,
ултӥямъёслэсь секытэн лулӟылӥськылэмъёссэс Со кылӥз.
29Со шыпыт улон кузьмаз ке, кин бугыртыны быгатоз?
Со Аслэсьтыз ымнырзэ ватӥз ке, кин Сое адӟыны быгатоз?
Луоз-а та быдэс калык понна яке одӥг адями понна гинэ,
30калыклэсь визьзэ тугаса, эксэй пуконэ чеберъяськись
медаз ни пуксьы шуыса?
31Инмарлы тазьы вераны кулэ:
”Мон курадӟон адӟи, азьланяз уг ни сьӧлыка.
32Нош мае ке мон уг ке тодӥськы, Тон монэ дышеты;
законлы пумит уж лэсьтӥськем ке, азьланяз сыӵе ужез уг ни лэсьты”.
33Тынад малпанэдъя-а Со пунэмзэ берыктыны кулэ?
Тон кулэтэм кариськод бере, тыныд бырйыны кулэ, мыным ӧвӧл;
вера, мар тодӥськод.
34Валась муртъёс, монэ кылзӥськись визьнодо воргорон но
мыным шуозы:
35”Иов визьмо уг вераськы, верам кылъёсыз но солэн валантэмесь”.
36Мынам потэ вал, Иовез, солэсь ответъёссэ
пыр-поч чакланы-эскерыны кулэ,
малы ке шуоно со сьӧлыклэсь кышкасьтэмъёс кадь вераське.
37Озьы ке ӧз луы,
аслаз сьӧлыкез вӧзы Инмарлэсь куштӥськонзэ ватсалоз на,
асьме пӧлын кизэ чабыса улоз но
Инмарлы пумит эшшо но тросгес вералоз на».
Глава 34
