Choose Language
Old Testament Books
New Testament Books
1«Мон юн кыл сётӥ: синъёсме медам берыкъя нылъёс пала.
2Вылысь Инмар дорын кыӵе меда мынам адӟонэ луоз?
Инмысь Дунне Кутӥсь дорысь кыӵе меда люкет басьто?
3Бырон сьӧлыклэсь кышкасьтэмъёслы дасямын ӧвӧл шат,
урод ужъёс лэсьтӥсьёс доры куректон-кайгу уз вуы шат?
4Мынэсьтым сюресъёсме Со ӧз-а адӟылы,
мынэсьтым вань вамышъёсме но ӧз-а лыдъялля?
5Юнме алекъяськыса улон пӧлтӥ мон ветлӥ ке,
мынам пыды кескич уж лэсьтонэ дыртылӥз ке,
6зэмлыклэн весъёсыз вылын монэ мед мерталозы но,
соку Инмар тодоз мынэсьтым дун-шектэм луэмме.
7Мынам пыдтышъёсы шонер сюрес вылысь кожылӥллям ке,
сюлмы синъёсы сьӧрын ветлэм ке,
ки борды кыӵе ке кырсь маке лякиськем ке,
8соку мон мае кизи, мукетыз сое мед сиёз,
мынам пушъетъёсы но быдтэмын мед луозы.
9Мынам сюлмы мурт кышно вылэ лӧптылэм ке,
аслам матыселэн ӧс выжыяз сьӧлтаськон уж лэсьтылӥськем ке, –
10мынам кышное мукетызлы мед изоз,
мукетъёс сое мед мыскыллялозы,
11малы ке шуоно со – йыруж,
законлы пумит улэм понна судэ сётыны ярамон уж;
12со – тыл, быдтытозь сиись-сутӥсь тыл,
со мынэсьтым вань ваньбурме быдтысал.
13Медо пиосылэн, медо кышноосылэн кулэяськонъёссылы
саклык мон ӧй висъялля ке,
соос монэн ченгешылыку,
14Инмар султысал ке, соку мон мар лэсьтысал?
Нош Со мон шоры учкысал ке, соку мон Солы кыӵе ответ сётысал?
15Со ик ӧвӧл-а, Кин монэ кылдытӥз,
Со ик медоме но кылдытӥз,
милемыз кыкнамес но одӥг кадь ӧз-а кылдыты?
16Ёрмыса улӥсьёс курыку, мон ӧй сётъя-а,
монэн йырин палкышно синъёссэ улэ лэзьылӥз-а?
17Аслэсьтым шорем няньме огнам сиылӥ-а,
анайтэм-атайтэм нылпиос но со нянез ик ӧз сиылэ-а?
18Пичи дыръям ик соос мон бордын атай бордын кадь будӥзы,
пичи дырысеным ик мон палкышноослы юрттылӥ.
19Дӥсьтэк-куттэк кулон калэ вуисез мон адӟылыкум,
куанер муртэ шобреттэк кылемен синйылтылыкум,
20ыжъёсылэн гонэнызы куанерез ӧй шунтылы-а но
со понна со мыным тау ӧз карылы-а?
21Капка дорысен аслым юрттэт вуэмез адӟыкум,
анайтэм-атайтэм нылпи вылэ киме мон урдылӥ ке,
22соку тыбыр бордысьтым пельпумы урыса мед усёз,
киы но гырпум бордысьтым чигиськыса мед усёз,
23мон понна кышкыт уго Инмарлэн вӧсь каронэз:
Солэн быдӟымлыкез азьын сылыны мон ӧй быгатысал.
24Зарни бордысь мон аслым пыкъет утчалляй-а,
узырлыклы шуылӥ-а: ”Тон – мынам оскиськонэ?”
25Узырлыке мынам туж бадӟым, киы мынам трос ваньбур
люказ ни шуыса, мон шумпотылӥ-а?
26Шунды шоры учкыса, солэсь пиштэмзэ адӟыса,
толэзь шоры учкыса но солэсь сокем йӧно мынэмзэ адӟыса,
27сюлмыным лушкемен визьмы тугаськиз-а,
ымдуръёсы чупаллязы-а аслэсьтым киосме?
28Та озьы ик судэ сётыны ярась йыруж луысал,
малы ке шуоно мон соку Дунне Кутӥсь Инмарелэсь
куштӥськемын луысал.
29Аслам тушмонэлэн кулэмезлы мон шумпотылӥ-а,
со доры шудтэм учыр вуылыку, шулдыръяськылӥ-а?
30Кылыным-ымыным со вылэ каргаськыса-юриськыса
сьӧлыканы асме лэзьылӥ-а?
31Мынам юртысьтым адямиос ӧз шуылэ-а:
”Э, солэн сӥльёсыныз милям кӧтмы ӧз-а тырылы?”
32Пыдйылчи ульчаын ӧз кӧлалля;
мынӥсь-ветлӥсьлы мынам ӧсэ усьтэмын вал.
33Аслэсьтым сьӧлыко ужъёсме мон ватылысал ке,
адями кадь, шекъёсме гадь пушкам ватыса возьысал ке,
34соку мон трос калык люкаськонлэсь кышкасал,
ас выжы калыкелэн синазькыль каронэзлэсь но мон курдасал,
чус улысал, ӧс сьӧры но ӧй потасал.
35Э, кин ке но монэ пумозяз кылзӥськысал ке!
Тани мынам кулэ каронэ:
Дунне Кутӥсь мыным ответ мед сётысал,
Дурбасьтӥсе, мынам палам пырыса, гожтэт мед гожтысал.
36Мон сое пельпум вылам пуктыса нуллысал,
венец изьыез кадь сое йыр вылам понысал;
37вань лэсьтэм вамышъёсме мон солы ялысал,
кивалтӥсь доры кадь солы матэ кариськысал.
38Аслам музъеме мон вылэ бӧрдыса ӝожтӥськылӥз ке,
солэн гырем чуръёсыз мон вылэ урттылӥськизы ке,
39солэсь емышъёссэ дун тырытэк мон сиылӥ ке,
музъем ужасьёслэсь улонзэс секытомытылӥ ке,
40соку бусыям чабей интые бышкись жаг турын мед потоз,
йыды интые – сьӧд турын».
Иовлэн кылъёсыз быризы.
Глава 31
