Choose Language
Old Testament Books
New Testament Books
1«Малы Дунне Кутӥсьлэсь вапумъёс ватэмын ӧвӧл,
малы Сое тодӥсьёс Солэсь нуналъёссэ уг адӟо?
2Межаосты интыысьтызы вырӟытъяло,
пудо уллёосты лушкаса нуо но асьсэ дорын возьмало;
3анайтэм-атайтэм муртъёслэсь ишаксэс нуо,
палкышнолэсь пунэмзэ тырытозьлы ошсэ нуо;
4куанеръёсты сюрес вылысь донгыса лэзё,
музъем вылысь вань ултӥямъёс пегаса улыны кылемын.
5Тани соос, кыр дуннеысь кыр ишакъёс кадесь, вазь ик султыса,
асьсэлы люкет утчаны пото;
кыр музъем соослы нянь сётэ, соослэн нылпиоссылы но;
6мурт бусыын соос арало,
сьӧлыклэсь кышкасьтэм дорын виноград бичало;
7гольык кылемъёс шобыртӥськытэк уйзэс пото,
дӥськуттэк кезьыт азьын изё;
8гурезьысь зоръёс улын шульыкмо,
ватӥськон интызы луымтэен, изгурезь борды ӝиптӥсько;
9анайтэк-атайтэк кылем нуныез нонытэк возё,
кураськисьлэсь пунэмзэ тырытозязлы марзэ ке но басьто;
10гольык, дӥськуттэк, ветлыны косо,
ю шепъёс нуллыса, асьсэос сютэм уло;
11борддоръёс вискын вӧйпу мульыысь вӧй пызьырто,
вина виятон гуын лёгало, нош сюзэс юзматыны эрик уг сёто.
12Городын адямиос ӝушто,
погыртэмъёслэн лулъёссы инме вазисько,
нош Инмар тае санэ уг поны.
13Соос пӧлын югытлэн тушмонъёсыз вань,
солэсь сюресъёссэ соос уг тодо, солэн сюрес вылтӥз уг ветло.
14Ӟардон азьын адями виылӥсь султэ но куанерез, кураськисез вие,
нош уйин лушкаськыса ветлэ.
15Азон сьӧлыке пырисьлэн синмыз ӝомал усемез возьмаса улэ,
со шуэ: ”Нокинлэн но синмыз монэ уз адӟы”, –
ымнырзэ ватэ.
16Пеймыт дыръя, нуназе синйылтэм коркаос улэ гудӟиськыса пыро;
нуналлэсь югытсэ тодытэк уло.
17Соос понна ӵукна ӟардон – кулон вужер кадь кышкыт,
уго соос тодо кулон вужерлэсь туж шимес луэмзэ.
18Таӵе мурт ву вылын кадь капчиен возиське,
музъем вылысь солэн люкетэз каргамын,
виноград садэ нуись сюрес шоры со уг но учкы.
19Кызьы кӧс ар, пӧсь куазьёс лымы вуэз ньыло,
озьы дунне пыдэс сьӧлыкоосты ньылэ.
20Анаез сое мед вунэтоз; сое нумыр ческыт потыса мед сиёз;
со сярысь тодэ ваён медаз кыльы;
законлы пумит улӥсь писпу кадь мед чигиськоз,
21уго со ултӥяса возе нылпитэм, нылпи вайылымтэ муртэ,
палкышнолы но уг юрттӥськы.
22Кужмоосты но со аслаз кужмыныз ас палаз нуэ; со султэ ке,
улэп кылёз шуыса, нокин но оскиськыны уг ни быгаты.
23Кышкатэк улон понна солы Со ваньзэ сётэ, со оскиськыса улэ,
Солэн синъёсыз соослэсь улон сюресъёссэс адӟо.
24Вылэ ӝутскизы, – но тани, соос ӧвӧл ни: усё но куло,
ваньмыз кадь ик, шепез музэн вандыса басьто.
25Та тазьы ӧвӧл ке, кин монэ ӧрекчаськисько шуыса пыкылоз,
кин мынам верамъёсы шонер ӧвӧл шуыса возьматоз?»
Глава 24
