Choose Language
Old Testament Books
New Testament Books
1Иов ответ сётыса шуиз:
2«Туннэ но мынам верано кылъёсы курытэсь:
мынам курадӟонъёсы лулӟылӥськонъёсылэсь секытгес.
3Э, тодысал ке мон кытысь Сое шедьтыны,
быгатысал ке Солэн престол дораз лыктыны!
4Со азьын мон аслэсьтым ужме верасал-усьтысал,
трос кылъёс вераса, асме шонере поттысал.
5Солэсь мыным ответ сётэм кылъёссэ тодысал,
валасал, мар Со мыным шуоз.
6Аслаз пачыл кужыменыз Со кутскысал шат
монэн ӵошатскыны-нюръяськыны?
Ӧй! Со мон шоры мед гинэ учкысал.
7Шонер улӥсь Соин ӵошатскыны-нюръяськыны быгатысал, –
соку монэ, шонер улӥсез,
Судьяе пырак ӵожелы эрике лэзьысал.
8Но тани, мон азьлане мынӥсько – нош Со ӧвӧл,
берлане мынӥсько – нош Сое уг шедьтӥськы;
9паллян палан маке лэсьтэ-а Со – мон уг адӟиськы;
бурпала ватӥське-а – уг валаськы.
10Со мынэсьтым сюресме тодэ;
монэ эскерыса-чакласа мед возёз, соку мон зарни кадь луыса пото.
11Солэн сюрес вылаз мынам пыды юн сылэ,
Солэн сюресъёсыз вылысь мон ӧй кожылы.
12Солэн сётэм курон-косонъёсызлэсь ӧй палэнскылы;
аслам мылкыд каронъёсы сярысь,
Солэсь верам кылъёссэ золгес ути.
13Солэн кылыз юнлыко – кин Сое палэнтоз?
Инмарлы мар кулэ, сое Со лэсьтэ.
14Озьы, мыным кулэзэ Со быдэстоз,
Солэн трос мон пумысен малпанэз-планэз.
15Соин ик Солэн ымныр азяз мон куалекъясько;
малпаськисько, но Солэсь кышкасько.
16Инмар лябӟытӥз мынэсьтым сюлэмме,
Дунне Кутӥсь монэ кышкатӥз.
17Малы мон та пеймытлэсь азьло быдтэмын ӧй вал,
малы Со мынам ымныр азьысьтым пеймытэз ӧз ваты!»
Глава 23
