Choose Language
Old Testament Books
New Testament Books
1Савхейысь Вилдад ответ сётыса шуиз:
2«Ку тӥ тазьы вераськемысь дугдоды?
Пыр-поч малпалэ, собере вераськомы.
3Малы милемыз пудо-живот шуыса лыдъяны кулэ,
тӥляд син азяды ултӥямын луыны кулэ?
4Нош тон, йыркуръяськыкуд лулдэ кесясь!
Тон понна музъем, оло, тырттэм кыльыны кулэ-а,
изгурезьлы ас интыысьтыз, оло, вырӟоно-а?
5Бен, законлы пумит улӥсьлэн тылыз кысоз,
тылгизьыез но солэн тылызлэсь уз кыльы.
6Солэн улон интыысьтыз тылыз кысоз,
югыт сётӥсез но со вылын кысоз.
7Кужымлыкезлэн вамышъёсыз вакчиёмозы,
аслаз малпанэз сое погыртоз.
8Со уго ас пыдъёсыныз сьӧлтэтэ сюроз но вотэс вылтӥ ветлоз.
9Солэсь пыдзэ кыӵес шӧдьытоз но талась мурт сое кутоз.
10Солы музъем вылтӥ лушкем сьӧлтэтъёс пуктылэмын,
сюрес вылын капканъёс сыло.
11Котыр ласянь сое шимес макеос кышкатылозы,
отчы-татчы бызьылытозы.
12Сютэм улыса, кужымез быроз,
кулон эзелез дась, солэн урдэсказ сылэ.
13Солэсь мугор люкетъёссэ сиёз,
кулонлэн нырысь вордскемез солэсь люкетъёссэ сиёз.
14Улон интыысьтыз солэн оскиськонэз уллямын луоз,
та сое туж шимес макеослэн эксэйзы доры вуттоз.
15Солэн тылысаз улыны интыяськозы,
малы ке шуоно со солэн ӧвӧл ини уго;
солэн улон интыяз сера киськалозы.
16Улласянь солэн выжыосыз куасьмозы,
вылласянь вайёсыз шуялозы.
17Со сярысь тодэ ваён музъем вылысь ышоз-быроз,
падвожын солэсь нимзэ верась уз ни луы.
18Югытысь пеймытэ сое уллялозы,
музъем вылысь сое ӵушыса куштозы.
19Солэн пиез но, пиезлэн пиез но аслаз калыкез пӧлын уз улы ни,
солэн улон интыосаз нокин но уз кыльы.
20Солэн нуналыз пумысен вуоно выжыосыз туж кышкатскозы,
соин ӵош улӥсьёс куалектозы.
21Сыӵеесь законлы пумит улӥсьлэн улон интыосыз,
Инмарез тодӥсьтэм муртлэн сыӵе интыез».
Глава 18
