Choose Language
Old Testament Books
New Testament Books
1Дас кыкетӥ – Адар – толэзьлэн дас куинетӥ нуналаз эксэйлэн косонэзлэн, пуктон-косонэзлэн быдэсмон дырыз вуиз. Со нуналэ иудейёслэн тушмонъёссы малпало вал соосты киулазы кутыса возьыны, нош пӧрмиз чылкак мукет сямен – асьсэос, иудейёс, тушмонъёсынызы кивалтыса улыны кутскизы.2Артаксеркс эксэйлэн вань улосвылъёсысьтыз иудейёс городъёсазы люкаськизы соослы урод уж лэсьтыны малпасьёсты быдтыны; соослэн азязы сылыны нокин но ӧз быгаты, уго вань калыкъёс соослэсь кышканы-куалекъяны кутскизы.3Улосвылъёсысь вань покчи эксэйёс, кузёйыръёс, улосвылъёсын кивалтӥсьёс, эксэй ужъёсты быдэсъясьёс иудейёслы дурбасьтӥзы, Мардохейлэсь соос куалекъяны кутскизы уго.4Эксэй юртын Мардохей туж бадӟым адями луиз, солэн данлыкез вань улосвылъёсы вӧлмиз, та адями, Мардохей, вылэ но вылэ ӝутскиз.
5Иудейёс вань тушмонъёссэс тышказы, мечен коразы, виылӥзы, быдтылӥзы, асьсэ тодэмен, мар каремзы потӥз, тушмонъёссылы озьы каризы.6Сузы шоркарын иудейёс вить сю муртэ виизы-быдтӥзы;7Паршандафаез но, Далфонэз но, Асфафаез но,8Порафаез но, Адальяез но, Аридафаез но,9Пармашфаез но, Арисаез но, Аридаез но, Ваиезафаез,10иудейёслэсь тушмонзылэсь, Амадафлэн Аман пиезлэсь дас пиоссэ виизы, нош турканы-тарканы кизэс ӧз ӝутэ.
11Со нуналэ ик эксэйлы ивор вуттӥзы, кӧня адями виемын вал Сузы шоркарын.12Эксэй Есфирьлы, эксэй кышнолы, шуиз: «Сузы шоркарын иудейёс вить сю адямиез, Аманлэсь дас пиоссэ виизы; нош эксэйлэн мукет улосвылъёсаз мар соос лэсьтӥзы? Кыӵе мылкыд каронэд вань на? – со быдэстэмын луоз. Кыӵе куронэд вань на тынад? Со быдэстэмын луоз».13Соку Есфирь шуиз: «Эксэйлы ярамон ке, Сузы карысь иудейёслы эрик мед сётысалзы туннэ кадь ик, ӵуказе но сыӵе ик уж лэсьтыны, Аманлэсь дас пиоссэ писпуэ мед ошысалзы».14Эксэй тае быдэстыны косӥз; та ужез быдэстыны Сузы карын пуктон-косон сётэмын вал, Аманлэсь дас пиоссэ ошизы.
15Сузы карын улӥсь иудейёс огазе люкаськизы Адар толэзьлэн дас ньылетӥ нуналаз но, Сузыын соос куинь сю муртэ виизы, нош турканы-тарканы кизэс ӧз ӝутэ.16Эксэйлэн мукет улосвылъёсаз но улӥсь иудейёс огазе люкаськылӥзы асьсэлэсь улонзэс утён понна, тушмонъёссылэсь кышкатэк улыны мед быгатозы шуыса, тушмонъёссы пӧлысь сизьымдон вить сюрс муртэз виизы, нош турканы-тарканы кизэс ӧз ӝутэ.17Та вал Адар толэзьлэн дас куинетӥ нуналаз, нош дас ньылетӥ нуналаз соос буйгатскизы, со нуналэз соос сиён-юон, шулдыръяськон дырлы пӧрмытӥзы.18Нош Сузы карысь иудейёс та толэзьлэн дас куинетӥ нуналаз но, дас ньылетӥ нуналаз но люкаськылӥзы, нош дас витетӥ нуналаз буйгатскизы, со нуналэз сиён-юон, шулдыръяськон дырлы пӧрмытӥзы.19Соин ик гуртъёсын, борддорен котыртымтэ интыосын улӥсь иудейёс Адар толэзьлэн дас ньылетӥ нуналаз, праздник дыръя кадь, шулдыръяськыса, сиыса-юыса ортчыто, ог-огзылы саламъёс ысъяло; [нош бадӟым городъёсын улӥсьёс Адар толэзьлэсь дас витетӥ нуналзэ но ӟеч мылкыдын, шулдыръяськыса ортчыто, матысь муртъёссылы саламъёс-кузьымъёс ысъяло].
20Та югдурез Мардохей гожъяз но Артаксеркс эксэйлэн вань улосвылъёсаз улӥсь вань иудейёслы гожтэт ысъяз, матысьёсызлы но, кыдёкысьёсызлы но,21таӵе косон сётӥз: арлы быдэ Адар толэзьлэн дас ньылетӥ но дас витетӥ нуналаз праздник мед ортчытозы,22уго со нуналъёсы соос тушмонъёссылэсь кышкатэк улыны кутскизы, со толэзе ӝожен улонзы шумпотонлы пӧрмиз, куректон-кайгуэн улонзы праздник нуналлы пӧрмиз, – со нуналъёсты сиыса-юыса, шулдыръяськыса, ог-огедлы саламъёс-кузьымъёс ысъяса, куанеръёслы кӧттыр сётъяса ортчытыны косэмын вал.23Иудейёс, мае асьсэос лэсьтыны кутскизы ни, мар сярысь соослы Мардохей гожъяз, сое кабыл басьтӥзы,24кызьы Вугей пилэн Амадафлэн Аман пиез, вань иудейёслэн тушмонзы, иудейёсты быдтыны малпаса пус (пур) чӧлтылӥз, жеребе куяз,25кызьы Есфирь эксэй доры вуиз, кызьы эксэй иудейёсты быдтыны малпась Аманлэсь лек малпанзэ аслаз йыр вылаз берыктон вылысь, ассэ но, пиоссэ но писпуэ ошон вылысь выль гожтэт гожтыны косӥз.26Соин ик та нуналъёсты Пурим шуыса нимазы, та ним потэ пур (пус) кыл бордысь, [уго соослэн кылазы пус чӧлтонэз пурим шуо]. Та гожтэтлэсь вань кылъёссэ лыдэ басьтыса, нош озьы ик соослэн асьсэлэн адӟем, асэнызы луэм учырез лыдэ басьтыса,27иудейёс кыл сётӥзы, соос асьсэос но, нылпиоссы но, соос борды кариськем вань адямиос но та пуктон-косонэз кабыл басьто: соос одно ик та кык нуналъёсы, кызьы соос сярысь гожтэмын, соослы тупатэм дыре, арлы быдэ, праздник ортчытозы;28вань улосвылъёсын, котькуд городын, вань выжыос, улыос-бечеос пӧлын та нуналъёс тодмо мед луозы, выжыысь-выжыосы праздник мед ортчылоз; та нуналъёсы иудейёс пӧлын Пуримез праздник каремысь медаз дугдэ, таос сярысь тодэ ваён нылпиоссы пӧлын но медаз быры.
29Абихаиллэн нылыз Есфирь эксэй кышно но, иудей пи Мардохей но, гижысь-пиньысь басьтӥськыса, гожтэт гожтӥзы, Пурим сярысь гожтэм выль гожтэтлэсь куронъёссэ быдэсъяса улыны куризы;30Артаксеркслэн эксэйлыказ интыяськем сю кызь сизьым улосвылъёсаз улӥсь вань иудейёслы каньылэн, шонерлыкен улон сӥзьыса ыстэмын вал со гожтэтъёс,31иудей пи Мардохейлэн, Есфирь эксэй кышнолэн Пурим праздникез кызьы ас дыраз ӟеч-ӟеч ортчытон сярысь косонзы отын верамын вал, кызьы соос асьсэос но, нылпиоссы но та праздникез быдэсъяны кутскизы, – визяса, куараен бӧрдыса улон нуналъёсазы со косон сётэмын вал.32Тазьы Пурим сярысь веран кылэз Есфирьлэн косонэз юнматӥз, со книгае гожтэмын.
Глава 9
