Choose Language
New Testament Books
view with a second Bible
1Эта гижӧтын Еныслӧн Кристос Исуслӧ осьтӧмыс*а. Кристосыслӧ коліс мыччавны Аслас раббезлӧ, мый чожа лоас. Кристосыс Ассис ангелсӧ ыстӧм мыччавны сійӧ осьтӧмсӧ Аслас Иоан раблӧ.2Эстӧн Иоаныс висьтасьӧ Енлісь Кывсӧ, Кристос Исуслісь висьталӧмсӧ да сійӧ, мый ачыс адззыліс.
3Шуда*б этӧ гижӧмсӧ мӧдіккезлӧ лыддьӧтісьыс. Шудаӧсь Енсянь юӧртӧм кыввесӧ кывзіссес да ны сьӧрті оліссес. Эта керсьӧмлӧн кадыс эд матын ни.
4Иоан гижӧ Асияись сизим вичкулӧ. Бурсетӧм*г да лӧнь олан*д тіянлӧ Сысянь, Кӧда эм, вӧлі да локтас. Сідз и сизим ловсянь, кӧдна сулалӧны Сылӧн юралан пукӧс*е одзын5да Кристос Исуссянь. Сія Висьталісьыс надейнӧй. Медодз Сія ловзис кулӧммес коласісь да юралӧ му вылас юраліссез вылын. Сія радейтӧ миянӧс. Аслас вирӧн Сія мездіс миянӧс умӧль керӧммезсиным,6Аслас Ен Айлӧ сувтӧтіс миянӧс ӧксуэзӧн да вежауджаліссезӧн*ж. Сылӧн югьялӧмыс*з да юралӧмыс пыр кежӧ! Аминь.
7─ То, Сія локтӧ кымӧррез вылын,
быдыс казялас Сійӧ аслас синнэзӧн.
Казяласӧ и Сійӧ бытшкиссес.
Му вывсис быдӧс увтыррес Сы одзын
бӧрдны-горзыны пондасӧ.
Сідз быдӧс и лоас! Аминь.
8«Ме ─ Альфа да Омега*и, Пондӧтісь да Пӧдналісь», шуӧ Дӧсвидзись, Кӧда эм, вӧлі да локтас. Сія ─ Дӧсвермись.
9Ме, Иоан, тіян вон. Тіянкӧт ӧтвыв ме песся-мырся*к. Тіянлӧ моз меным лӧсьӧтӧм Енлӧн Юралӧм да Кристос Исуссянь сетӧм ыджыт мыла*л. Енлӧн Кыв понда да Кристос Исус йылісь висьтасьӧмӧ понда менӧ ыстісӧ саридз*м шӧрын Патмос му вылӧ.10Дӧсвидзисьлӧн лунӧ*н ме тыри Лолӧн. Мышкам ме кылі гора шы, кыдз буксанісь. Сія висьталіс: «Ме ─ Альфа да Омега, Медодззаыс да Медбӧрьяыс.11Ӧні мый адззан, гиж да ысты Учӧт Азияись вичкуэзӧ: Ефесӧ, Смирнаӧ, Пергамӧ, Фиатираӧ, Сардисӧ, Филадельфияӧ да Лаодикияӧ».
12Ме бергӧтчи шыысланьӧ видзӧтны мекӧт баитісьсӧ. Ме казялі зарниись керӧм сизим бивидзан.13Ны коласын ветлӧтіс кинкӧ Морт Зон кодь. Сія вӧлі кузь паськӧма, морос вылӧттяс кӧртасьӧм зарни йыӧн.14Сылӧн юрыс да юрсиыс вӧлісӧ чочкомӧсь, чочком вурун да лым кодьӧсь. Синнэс Сылӧн вӧлісӧ ыпьялана би кодьӧсь.15Коккес вачкисисӧ горын калитӧм югьялан ыргӧн*о вылӧ. Голосыс вачкисис уна ва киссян шы вылӧ.16Веськыт киас Сія видзис сизим кӧдзув*п. Сы ӧмись петӧ вӧлі ӧтмӧдӧрсянь лэчыт шыпурт*р. Сылӧн чужӧмыс югьяліс луншӧрся шонді моз.
17Ме казялі Сійӧ да кыдз кулӧм уси Сылӧ коккезас. Сэк Сія пуктіс ме вылӧ веськыт кисӧ да висьталіс: «Эн пов. Ме ─ Медодззаыс да Медбӧрьяыс.18Ме ловья. Ме вӧлі кулӧм, но ӧні Ме ловья да понда пыр овны. Аминь. Адсис да кулӧмсис*с ключчес Менам киын.19Гиж, мый адззылін, мый эм да мый лоас сэсся.20Тэ адззылін менам веськыт киись сизим кӧдзув, адззылін и зарниись сизим бивидзан. Ныын тӧдлытӧмыс*т то мый: сизим кӧдзулыс ─ сизим вичкулӧн ангеллэс, сизим бивидзаныс ─ сизим вичку».
*а 1.1 осьтӧм ─ откровение
*б 1.3 шуда ─ счастливый, блаженный
*в 1.4 вичку ─ церковь, община верующих
*г 1.4 бурсетӧм ─ благодать
*д 1.4 лӧнь олан ─ мир
*е 1.4 юралан пукӧс ─ престол, трон
*ж 1.6 вежауджалісь ─ священник
*з 1.6 югьялӧм ─ слава
*и 1.8 Альфа да Омега ─ грек азбукаын медодзза да медбӧрья букваэз
*к 1.9 пессьыны-мырсьыны ─ страдать
*л 1.9 мыла ─ терпение
*м 1.9 саридз ─ море
*н 1.10 Дӧсвидзисьлӧн лун ─ сідз веритіссез шуисӧ кресення лунсӧ
*о 1.15 ыргӧн ─ медь
*п 1.16 кӧдзув ─ звезда
*р 1.16 шыпурт ─ меч
*с 1.18 кулӧм ─ смерть
*т 1.20 тӧдлытӧм ─ тайна
Глава 1
