Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИИСУСЭЗ КОРТӴОГАН
Иисусэн ӵош кык йыруж лэсьтӥсьёсты виыны нуизы. «Кымес» шуон интые вуэм беразы, отын Сое кортӵогазы, йыруж лэсьтӥсьёсты – одӥгзэ бур палаз, нош мукетсэ – паллян палаз. Иисус шуиз: «Атае! Соослы простить кар, уго соос мар лэсьтэмзэс уг тодо» (Лк. 23:32-34). Пилат пул вылэ гожтӥз но сое кирос вылэ шуккиз. Тазьы гожтэмын вал: «Иисус Назорей, иудейёслэн Эксэйзы» – гожтэмын вал еврей сямен, грек сямен, рим сямен. Иисусэз кортӵогамзы бере, солдатъёс Солэсь дӥськутсэ басьтӥзы но ньыль кесэглы люкизы. Котькуд солдатлы люкет сюриз, нош выл дӥсянэз пумысен пус чӧлтӥзы (Ин. 19:19-23).
Йыруж лэсьтӥсьёс пӧлысь одӥгез Иисуслы шуиз: «Аслад Эксэйлыкад вуид ке, монэ буре вай, Кузё-Инмаре!» Иисус солы шуиз: «Зэм ик тыныд верасько, туннэ ик Монэн огазьын райын тон луод» (Лк. 23:35-43).
Куатетӥ часысен укмысэтӥ часозь*а быдэс дунне вылын пеймыт улӥз. Укмысэтӥ час котырын Иисус бадӟым куараен кеськыса вераз: «Или, Или! Лама савахфани?» яке: «Инмаре! Инмаре! Малы Тон Монэ кельтӥд?» (Мф. 27:45-48). Соку Иисус бадӟым куараен вазиськыса шуиз: «Атай! Тынад кияд Аслэсьтым лулме сётӥсько». Тае верам бераз, лулыз потӥз (Лк. 23:46). Со куспын ик храм пушкысь катанчи йылысеныз улӥозяз шорияк кесиськиз; музъем зурказ, изъёс пильылӥськизы. Сю солдатэн кивалтӥсь но соин ӵош Иисусэз возьмасьёс, музъем зуркамез, вань луэмъёсты адӟыса, туж юн курдазы, соос шуизы: «Зэм ик Со Инмар Пи вал» (Мф. 27:51-54).
*а Туала дыръя: 12 часысен 3 часозь.
424 
