Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИАИРЛЭСЬ НЫЛЗЭ ЛУЛЪЯСЬКЫТОН
Иисус доры синагогалэн Иаир нимо одӥгез кивалтӥсез лыктӥз. Со Иисуслэн азяз пыдесъяськиз но тэльмырыса куриз: «Нылы кулӥське ни, лыктыса со вылэ кидэ пон, мед бурмысал, улэп мед кыльысал». Иисус Иаирен ӵош мынӥз. Со бӧрсьы трос калык мынӥз, Сое котыр ласянь ӝиптӥзы.
Татчы учыраз вирыз кошкыса, дас кык ар ӵоже курадӟыса улӥсь кышномурт. Со трос эмъясьёс дорын эмъяськиз, но пайдаез ӧз луы. Иисус сярысь кылыса, со, калык пыр чуртнаськыса, Иисуслэн мышкиназ лыктӥз но лушкемак Солэн дӥськут бордаз йӧтӥськиз. Та кышномурт малпаз вал: «Дӥськут бордаз гинэ йӧтӥськи ке – бурмо». Со виын ик кышномурт шӧдӥз аслэсьтыз бурмемзэ.
Со дыре ик Иисус Ас пушкысьтыз кужмызлэсь потэмзэ шӧдӥз но калык пала кариськыса шуиз: «Кин Мынам дӥськут бордам йӧтӥськиз?» Дышетскисьёсыз Солы шуизы: «Адӟиськод, калык кызьы Тонэ ӝиптэ, эшшо юаськод: “Кин Мон борды йӧтӥськиз?“» Туж кышкаса, куалектыса, Со доры кышномурт лыктӥз, азяз пыдесъяськиз но, номыре ватытэк, ваньзэ вераз. Нош Иисус солы шуиз: «Нылмурт! Тынад осконэд тонэ мозмытӥз, каньылэн берт, та висёнэныд эн ни висьы».
Та кылъёссэ вераку, синагогаысь кузё доры солэн адямиосыз лыктыса шуо: «Нылыд кулӥз ни, малы раньӟытӥськод на Дышетӥсез?» Тае кылыса, Иисус Иаирлы шуиз: «Эн кышка, оскы гинэ». Иаирлэн корказ пырем бере, Иисус адӟиз куалектэм, викышъяса, куараен бӧрдӥсь адямиосты. Со соослы шуиз: «Малы чигиськиськоды, бӧрдӥськоды? Нылды кулэмын ӧвӧл, со изе гинэ». Солэсь та верамзэ серем каризы. Ас бӧрсяз Петрез, Иаковез, Иоаннэз, кулэм ныллэсь анай-атайзэ басьтыса, Иисус пыриз ныллэн кыллён висъетаз. Нылмуртэз китӥз кутыса шуиз: «Нылаш, тыныд верасько: султы!» Нылмурт соку ик султӥз но ветлыны кутскиз. Таӵе паймымон ужез адӟыса, калык абдраз.
Марклэсь Ӟеч Ивор 5:21-42
350 
