Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ВОТ МЫНТÖМ ЙЫЛЫСЬ
Фарисейяс мустöмтiсны Исусöс. Асланыс юалöмъясöн найö зiлисны кыйны Сiйöс. Öтчыд фарисейяссянь йöз локтiсны Исус дiнö да шуисны: «Велöдысь, ми тöдам, мый Тэ веськыда сёрнитан да веськыда велöдан Енлöн туйö. Тэ он пов йöзлöн шуасьöмысь, он видзöд морт вылö. Висьтав, колö-ö кесарлы*а вот мынтыны?» Фарисейяс мöвпалiсны, вочавидзас кö, мый кесарлы колö мынтыны вотсö, Сiйöс позяс мыжавны Ас войтырсö вузалöмысь. А вочавидзас кö, мый оз позь мынтынысö, Сiйö лоö кесарлы паныд сувтысьöн.
Налысь наянлунсö тöдöмöн Исус шуис: «Кык бана шаньгаяс! Мыйла тi зiлянныд кыйны Менö? Петкöдлöй Меным вот мынтан сьöмнытö». Найö мыччисны Сылы динар. Исус юалiс: «Кодлöн танi чужöмыс-нимыс?» Найö вочавидзисны: «Кесарлöн». Исус шуис налы: «Кесарлысь сетöй кесарлы, а Енлысь – Енлы». Тайöс кылöмысь найö чуймисны, сэсся колисны Исусöс да мунiсны.
Та бöрын Исус висьталiс йöз чукöрлы да велöдчысьясыслы: «Мöисей пуклöсö пуксисны Индöдö велöдысьяс да фарисейяс. Кывзöй найöс да вöчöй ставсö налöн шуöм серти. Сöмын на ног энö олöй: найö öтитор шуöны, а мöдтор вöчöны. Найö кöртавлöны нуны вермытöм нöбъяс да пуктöны йöзлы пельпом вылас. Но асьныс весиг чунь помнас вöрзьöдны оз кöсйыны. Найö ставсö вöчöны йöзлы асьнысö петкöдлöм могысь».
Матвей 22:15-22, 23:1-5
*а Кесар – тайö Римса империяöн веськöдлысь, код улын сэки вöлi юдей войтыр.
398 
