Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
САМАРИЯСА БУР СЬÖЛÖМА МОРТ
Индöдö велöдысьясысь öти Исусöс кыйöм могысь юалiс: «Велöдысь, мый меным колö вöчны, мед вичмис меным помтöм олöм?» Исус юалiс сылысь: «Мый гижöма Индöдас? Мый сэтысь лыддян?» Индöдö велöдысь вочавидзис: «Радейт ассьыд Господь Ентö став сьöлöмнад, став олöмнад, став выннад, став мывкыднад да радейт матыссатö асьтö моз». Исус шуис сылы: «Бура вочавидзин. Вöч тадзи, сэки кутан овны». Асьсö дорйöм могысь Индöдö велöдысь юалiс Исуслысь: «Кодi меным матыссаыс?»
Исус вочавидзис тадзи: «Öти морт ветлас Ерусалимысь Ерикон карö. Туяс сiйö веськалас лёк вöчысьяс киö. Найö пöрччöдасны сiйöс, вирöдз нöйтасны да колясны туй вылас кулан выйын. Сiйö туйöдыс мунас поп*а, казялас нöйтöм мортöс да туй мöдарас вуджас. Сы моз вöчас тшöтш левит: воас сэтчö, аддзас нöйтöм мортöс да вуджас туй мöдарас.
Сэсся локтас сэтчö самарияса морт. Кор аддзас нöйтöм мортöс, сылöн сьöлöмыс нормас. Матыстчас сы дiнö, дойяссö мыськалас винаöн, мавтас выйöн да кöртавлас. Пуксьöдас сiйöс аслас осёл вылö да ваяс туйморт керкаö*б, сэнi тöждысяс сы вöсна. Аскинас самарияса морт сетас туйморт керка кутысьлы*в кык динар да шуас: ”Тöждысь сы вöсна. Оз кö тырмы, локтöм бöрын содтöд мынтыся”. Тэ ногöн, кодi тайö куим письыс нöйтöм мортыслы матыссаыс?» Индöдö велöдысь вочавидзис: «Сылы бур вöчысьыс». Исус шуис сылы: «Мун да тшöтш тадзи вöч».
Лука 10:25-37
*а Православнöй вичко пытшкын тайö кывнас оз вöдитчыны, вужъясьöма ”ерей” кыв.
*б туйморт керка – гостиница
*в керка кутысь – кöзяин
360 
