Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
АНДЕЛ ПЕТКÖДЧÖ ЗАКАРЛЫ
Кык сюрс во сайын, кор заводитчисны Выль Кöсйысьöмын гижöм лоöмторъясыс, юдей войтырлöн муыс вöлi Рим кипод улын. Таöдз на вылын ыджыдалiсны Ассирия, Вавилон да Греция. Сё вояс чöж юдей войтырлöн эз вöв асланыс öксы. Медбöръя пророкыс, Малакей, олiс 5-öд нэмын Исус Кристос чужтöдз. Сы бöрти сэсся эз нин вöвны пророкъяс, эз вöвны и Енсянь юöръяс.
Тайö сьöкыд кадас юдей войтыр виччысис Мездысьлысь локтöм сö. Юдейяс эскисны, мый Сiйö мездас найöс Римлöн нартитöм улысь да бергöдас йöзыслысь сьöлöмсö Енлань. Та йылысь важысянь на висьтавлiсны пророкъяс. Но Мездысьлöн локтöм водзвылын Ен пондiс дасьтыны Ассьыс войтырсö. Сiйö ыстiс Аслас войтыр дiнö Иоан нима мортöс.
Иоанлöн Закар батьыс да Елизавета мамыс вöлiны бур оласногаöсь, пыдди пуктiсны Енмöс да юрбитiсны Сылы. Челядьыс налöн эз вöв, и найö кыкнанныс вöлiны ыджыд арлыдаöсь нин.
Öтчыд, кор Закар кесъялiс крамын, сылы петкöдчис андел. Закар ёна повзис. Андел шуис: «Эн пов, Закар. Енмыс кылöма тэнсьыд кевмöмтö. Елизавета гöтырыд чужтас тэныд пи. Пукты сылы Иоан ним. Долыд гажöн тырас тэнад сьöлöмыд, да уна йöзлы нимкодьлун ваяс сылöн чужöмыс. Господь водзын сiйö лоас ыджыд мортöн, вина-сур оз кут юны, мам кынöмас на сiйö тырас Вежа Лолöн. Израиль войтырысь сiйö унаöс бергöдас налöн Господь Енлань».
Закарлы сьöкыд вöлi эскыны анделлöн кывъясö. Сiйö юалiс: «Кыдзи ме тöдмала тайöс? Ачым пöрысь, дай гöтырöй абу нин том». Андел янöдiс Закарöс эскытöмсьыс да шуис: «Меным эскытöмыдла тэ воштан кыв-вортö, он вермы сёрнитнытö, кытчöдз оз инны менам кывъясöй».
Сэккостi йöзыс виччысисны Закарöс да шензисны крамын сылöн дыр олöмысь. Сэтысь петöм бöрын Закар эз вермы сёрнитнысö.
Лука 1:5-22
286 
