Библия
Выбрать язык
Книги Ветхого Завета
Книги Нового Завета
с русским текстом
PSALMOIDEN KIRJ
16 Psalm
Davidan loičend.1Sur’ Sünduižem, kulišta minun tozi,
kulišta minun kirgund,
ota vastha loičend puhthas suspäi!
Minä en kelasta.
2Sinuspäi tuleb minei oiged sud,
sinun sil’mäd nägeba tot.
3Sinä kacuid hüvin minun südäimen,
tulid öl minunnoks, kodvid minun melid,
no nimidä pahad ed löudand.
Minun sanad ei erinegoi minun melišpäi.
4Kaikid maižid radoid tehtes
minä püžuin sinun sanas,
pidimoiš vägivaldaspäi laptemba.
5Vahvenzoita minun haškud sinun teid asttes,
miše minun jaugad ei säraidaižigoi.
6Minä kucun sindai abuhu,
ved’ sinä kuled mindai, minun Jumal,
kärauda korv minuhupäi,
kulišta minun sanad.
7Ozuta ičeiž čudosižed armod,
sinä kaikiden sinuhu uskojiden Päzutai.
Sinä ičeiž vägeval kädel
päzutad heid vihanikoišpäi.
8Kaiče mindai kut sil’män terad,
peitä mindai sinun suugiden alle
9jumalatomišpäi, tartujišpäi minuhu,
minun hengen vihanikoišpäi, olijoišpäi ümbri minus.
10Heiden südäin om kovan koren al,
heiden sanad oma surendelijad.
11Hö tarkištaba ümbärtes kaikuččen haškun,
vaiše kacuba-ki, miše polkta mindai maha.
12Hö oma kuti sal’hen himokaz lev,
kuti olii peitos levan poig, mitte varastab sališt korvad püštti.
13Sur’ Sünduižem, libu i ole ezmäine,
paina jumalatomid maha.
Päzuta mindai jumalatomišpäi sinun surel veičel.
14Päzuta mindai sinun kädel, Sur’ Sünduižem,
pahoiden mehiden valdaspäi,
ked tahtoiba eläda vaiše necidä elod.
Sinä täutad heiden vacad sinun eloaitaspäi ülimärašti,
heiden lapsed söba külläks,
da völ jäb heiden lapsiden lapsile-ki.
15A minä olen vigatoi,
ka sikš voin nägištada sindai.
Heraštuden unespäi en tahtoi ani nimidä,
vaiše kut kacta sinuhu.
Глава 16
